العروبي و عروس الريح

الجزء 3

🌾العروبي و عروسة الريح 🌾
💄الخنساء 💄

كيف كانقولو تمسكنات حتى تمكنات..
و ولات كاتجيب خبارات العائلة من لكبير لصغير

لدرجة لون شعر مو عرفاتو..
رقم صباط باه عندها..
نمرة التيلي جديد دنادية طليقة أبو بكر خداتها..

و بيها جابت ليهم الضربة القادية..
كانو يقدرو يتصالحو بعد داك النقاش حول الشوميز دونوي وي دوزها بجغمة لما فختارت تزيد تشعلها باش مايبقا عندهم أمل..

خلات شكوك أبو بكر فكون نادية بنت فاسدة أو كيف كايسميها خارجة على الطريق تتأكد ليه..
هو طلبات منو مو يشري تيلي لعروستو و نفد بلا ما يتردد..
غافل على أن الطلب جاي من عند ختو لي حتى هي كيف البيدق فيد مريم...

  لي أكدات على سامية بلي البنت باقا صغيرة..
عاد تحولات لبلاصة جديدة عليها.. تقدر توضر فشوارعها..
و لا توقع ليها شي حاجة لاخرجات تجيب غي كيلو دبطاطا..
و ماتلقا شكون يعتقها...

إوا شراو لنادية تليفون  من نوع سامسونج متوسط  الحجم.. فيه الأساسيات من التطبيقات لي تقدر تحتاج..واخا ما كاتعرف فيه حتى حاجة من غير تجاوب لاعيط شي حد ولا تعيط على جوج ناس مها و أبو بكر..

كيف عرفات بلي حما السوق بين نادية و أبو بكر....

بدات كاتصيفط ليها فميساجات فالأول كان غي باسم شاب واحد..

فؤاد؛
لي بدات المحادثة بأوديو دولد كاتعرفو :سلام نادية أنا فؤاد را جبت
نمرتك جديدة من عند ختك و عطاتني الفلوس علاش تافقنا لهاد الشهور لي ما غاتكونيش فيهم..
شويا نصيفط ليك علاش تافقنا ولا حصلتي ماتعرفيني ما نعرفك كي لعادة.. تشاو..

و سالاتها بفيديوهات كلهم مسخ؛ عرى و علاقات مقززة..

تسنات تمشي نادية تقوليه زعما شوف لي هاد الميساجات ساعاتي ما بانت نتيجة و عرفات بلي غايكون ما شافهمش...

الأكيد أنها ماوقفاتش هنا..
و دارت أرقام خرى كاتصيفط بيهم رسالات غرام و هيام هالي باغي يدخل معاها فعلاقة..
هالي كايقول ليها أنا مول الفران لي عطيتيني النمرة فالصباح..

دارتها كي داك السرباي غادا و تفرق فالنمرة تا خلات الحي و السوق كامل يتجمع عندها...

الحاصول غرقات لباباها الشقف و مع هي ما قارياش غي لايحا داك التيلي مامسوقا گاااع للميساجات..

بقا تايدور تايدور من فوق سداري لعلى الحيط حتى جا فوق الطبلة..
و سمحات الفرصة لأبو بكر يشدو..
حس بوجهو تغمس فالتراب كيفاش هو عند بالو كاتخرج تقدا و هي كاتجمع فالهجيج..
الرجولة حسها طارت..
ما عقل على راسو حتى رما التيلي على الحيط جابو مفرتت و رما معاه الطلاق على نادية...
حس براسو رتاح و عاد رجعات فيه الروح ملي حيد عليه هاد المصيبة و غايقدر يرجع يخرج تاني براسو مرفوع..