العروبي و عروس الريح

الجزء 27

🌾العروبي و عروسة الريح 🌾
💄الخنساء 💄

وجدان:مالك؟ هييه.. فين مشيتي..
نوض خلينا نقلبو عليهم..

بدات غادا و جرها من يديها واقف قدامها..

بوبكر:وجدان..

جرات يديها :شنو.. را و الله ما نگلس.. بلاما تبقا تزيد عليا..
لي فيا كافيني هاد الساعة..

بوبكر:خلي إيمانك فالله..
را ربي لاكتب شي حاجة كاتوصل كاتوصل..
خليك قوية..

وجدان :مالك على هاد لهضرة..
هادشي قلتيه ليا گبيلا و فهمتو..

بوبكر:گبيلا قلتو و دابا خاصك طبقيه..

كمشات حجبانها باستغراب..
قبل ما يضورها بوبكر..

حلات عينيها على وجه حسنا لي حاطا يديها على فمها حابسا شهقاتها..

و رجعات حناتهم على داك الكرسي المتحرك لي قدامها..

حركات راسها ب لا..

وجدان رجعات بلور :لا.. لا..

ما متيقاش.. كيفاش داك الراجل لي شحال هزها بين يديه و ركبها على ظهرو..
ها هو دابا جالس بلا رجل..

مشات ليه رجل بسباب طغيان شباب و تهورهم..

كان حاني راسو بتعب..
ماشي بزاف باش فاق...
و باقي ما قدر ينطق.. لسانو كايحسو تقيل عليه..

ملي فاق لقا قدامو وجه حسنا لباكي..
لمخلط بين دموع الحزن و الفرح..

بعدها لقا راسو بين الطبيب و الممرضات..
كايطمنو على صحتو الجسدية..

و بعدهم دخل الطبيب النفسي كايبشرو بفقدان رجليه..

كان حاس بشي حاجة ماشي فبلاصتها..
من دوك الشوفات دالأطباء..
و انعدام الإحساس فرجلو..

واخا ما قدرش ينطق بالصدمة..
فالداخل ديالو كلو إيمان فالله..
و كايقول الحمد لله غي ملي مزال ربي مطول ليا فلعمر..

خرجاتو حسنا باش يدير التحاليل لي عطاه الطبيب..
و هوما غادين شافو بزاف دلحالات كل وحدة كثر من لخرا..

لي ما عارفش بلي هادا سبيطار غايقول غي باطوار د الجزارة..

هالي جاي براسو محلول..
هالي هاز صبعو مقطع ليه..
هالي كان غي كايلعب تا طاح و تشتو حداه سنانو..
أما لوليدات الصغار منهم عداااد..
هالي مدفق عليه آتاي طايب حتى حرق لحمو..
هالي شارب جافيل..
كلها و حالو..

و بعد كل حالة كايتنهد عبد الرحيم..

سالاو شغلهم بعد ساعتين من الانتظار..
و كانو راجعين لغرفتهم..

حتى وقفات حسنا ما بقات تحركات..

هز راسو بزز..
حتى بانت ليه وجدان واقفة و كاتشوف فيه..