العروبي و عروس الريح

الجزء 13

🌾العروبي و عروسة الريح 🌾
💄الخنساء 💄

الرجال ما دخلوش بقاو برا حتى دخلو لعيالات و خوات الطريق عاد تقدموا...

كان زايد عليهم واحد الصديق د بوبكر و هو نيت لي مكلف بلحانوت لي عندو..
كان شاب باينا فيه بعقلو و لحيتو فيها شوية الشيب..

لابس جلابة فلبلومارين مخيطا بلبيض..
و بلغة فرجليه..
ما جاش بيديه خاوين بل جاب معاه..
الدهاز لي وصى عليه بوبكر..
داكشي مخبي فصنادق بلااا شوهة د شنو جايب ليها حتى تحلهم و تعرف..

دخلو الرجال فصالون و لعيالات فصالون آخر..

الطوابل كانو ديجا محطوطين عليهم حليوات و مشروبات..
باش يتلفو...

الزاهية غي كاتبلبل قدام صحاباتها..
باغا تبان عليهم غي كاتشكر فعائلة وجدان و تعاود..

بعد الضحك و النشاط.. ناض عبد الرحيم واخد معاه بوبكر باش يدويو و حتى يشوف وجدان..
مايمكنش يزوجوهم بلاما يشوفو بعضهم وي عرفو الشروط لي باغي كل واحد..

دخل عبد الرحيم مع بوبكر لواحد لبيت فيه جليسة صغيرة..
و بداو فالهضرة..

عبد الرحيم:شوف ا وليدي خصايلك مايخفاوش عليا و غي تربية بَّا ليك مكفياني و موفياني نعرف معدنك..
غي هو أوليدي بنية وحدة لي عندي ما نكدبش عليك.. راسها قاصح و زبايلها كثر منها..
يمكن لو مشيتي تخطب شي بنت خرا كانو يشكروها ليك..
بلحق أ وليدي أنا لي كان نگولو ليك..
بغيتك تعرف بلي كيف ربيتها و كبرتها و تقبلتها بعيوبها..
باغي نعطيها للي يكمل على ما بديت ماشي نبداوها بالزواق و من بعد يتقلبو لوجوه..
ها نتا راني عارفها قليلة عقل بلحق غي سايس أ وليدي..
را ربي لي عالم شحال راك عزيز و كون ما عرفتك نتا لي تستاهلها مانعطيها لشي حد..

قرب ليه بوبكر شاد يديه و بايسها :عمي كلامك كلو على راسي ماتحتاجش تفكرني بيه..
العيوب ما كاينش لي معروف عليه لقلم منهم..

و هوما كايدويو وجدان كانت فبيتها باغا طير و تهبط تشوف هاد لعريس كي داير و هوما حالفين لا خلاوها تخرج.. عارفينها كاريثة تمشي تفرتك الشغل قبل لا يديرو فالطاجين ما يتحرق..

كانت كاطل من الشرجم حتى تحل عليها الباب كانت زينب لي مصيفطينها زعما تونسها..

وجدان:آش بغيتي؟

زينب جلسات فجنب الناموسية خايفا من وجدان:ماما لي صيفطاتني نونسك..

وجدان يله غاتعايرها و تجري عليها تا گالت آجي بلاتي نشوف آش عارفا :آجي نتي شتيهم ملي دخلو ؟

زينب:هاا... شكون؟

وجدان جاتها نيشان  :شكون غايكون  لعروبي لآخر.. شتيه

زينب:إيه لا شتو بلحق غي شوية مع طليت غي من الدروج ما باليش مزيان..

وجدان بحماس:إوا..