العروبي و عروس الريح

الجزء 8

🌾العروبي و عروسة الريح 🌾
💄الخنساء 💄

كايشوف وي عاود فلفيديو جهد عشرة لمرات..
كل ما كاتوصل اللقطة المهمة كايحبسو..

جاو فبالو ذكريات مختلطة...

فلاش باك 1:

بين ممرات سبيطار حكومي؛

الطبيبة بلباسها الخاص خارجا من لبلوك بين يديها مانطة صغيرة ملفوفة بإحكام على الجسد الصغير..

كان جاي كايجري بحوايج العامل المبتدأ ريحة لخميرة لاصقا فيهم..

ما عقلش كيف دار حتى وصل للسبيطار كايجري فرحان ماخلى شكون قال ليه ليوم مراتي غاتولد..

وصل مع الطبيبة قد قد..

لي عطاتها ليه بكل رفق..

بلقد لي فرح و بكا من لقائها.. حس برعشة و فكرة وحدة فبالو..

واش غايكون قد المسؤولية؟

ما كملش اللقطة حتى طاحت فبالو ذكرى خرا..

فلاش باك 2:

ها هو سي عبد الرحيم شاد وجدان من يديها مدخلها معاه للبحر..
كانت بعمر 6 سنوات..

الشعر مشتت على وجهها و الفم بسنينات طايحين كاضحك لباباها..

هو كايجر باش يدخلها و هي كاتجر باش تهرب..

حتى نجحات فلهرب منو.. كاتنقز من هنا للهيه بلا ما ضرب حسبا للمسافة معاونها وزنها لخفيف..
مشات كاتجري بين لباراصولات مخلياه تابعها بلا عقل..

كايجري بزز عليه واخا صحتو الضعيفة..

حتى غبرات عليه ..
بقا واقف كايدور براسو..
جميع الإحتمالات حطهم قدامو..
و الخوف تمكن من قلب الأب..

كايدور على راسو مسرح عينيه حتال أبعد نقطة ممكنة عالله تبان ليه وجدان الصغيرة..

حتى فقد الأمل و بدا كايحس بداتو كاتنمل عليه رجليه فشلو و طاح على ركابيه فوق الرملة..
النفس بدات كاتقطع فيه دور راسو للبلاصة فين گالسين.. كون صاب يطير للصاك لي فيه دواه..

واخا هادشي باقي ففمو غي إسمها..

عبد الرحيم؛ بنتي... وجدااان كح وجدان.. كح كح..

بداو كايتجمعو عليه الناس حتى تدخلات يد الطفلة كاتبعد فالناس مدخلا راسها باش طل عليه..
لكن قوتها كانت ظعيفة مقارنة بيديهم

ما كان عندها حتى خيار من غريب ترجع تعيط على الأم ديالها..
لي كيف سمعات لخبار..
أول ما دارت حلات ساكها جابدا منو الدوا و ناضت كاتجري ورا بنتها لي سابقاها..

بزز باش نقزات حسنا داك لقوم لمجموع على راسو..
غي عطاتو دواه و حل عينو..
كانت وجدان قدامو..