العروبي و عروس الريح

الجزء 18

🌾العروبي و عروسة الريح 🌾
💄الخنساء 💄

حطات تيلي على وذنيها مرققة صوتها :هييلو..

هز بوبكر حاجبو هادي مالها مدفقة عليه..
كحب كايقاد صوتو..
أما هي غي سمعة لكحبة خرجات عينيها..

وجدان مع راسها:هاد الصوت ماعرت فييين فايتا سامعاه

الحمد لله نطق بوبكر اما كانت تزبلها معاه كثر يصدقو لا سفر لا حب لملوك.

بوبكر :السلام عليكم

وجدان قادات لجلسة.. كاتبت راسها ما باغاش تخرج شي حاجة دلعيب..
ولات كاتعطي ما قل و دل :السلام

بوبكر:أنا عند لباب.. بغيت نعلمك توجدي راسك..
هانا كانتسناك

وجدان وقفات كاترعد دغيا قربات عند لفاليز ديالها..
كادوي بزربة.. حرف تخرجو و حرف يهرب ليها
:هاا.. لا لا بلاش هادشي كامل و نزيد نتسنا..

بوبكر باستغراب:كيفاش زعما؟

وجدان عاقت بلي دارت زربة خايبة؛لوحدة هي لي تقل شوية..
:لا والو.. هانا غي شوية و نكون نازلة...

بوبكر:خودي وقتك.. أنا كانتسنا

قطعات معاه و دخلات للمينيتور ضبطاتو على نص ساعة بلحساب..
و دازت حلات واحد الشرجم.. كاطل و ترجع تخبا باش مايشوفهاش..

واخا بوبكر كان متكي على لكوسان و معلي راسو فالدار..
ضرب على الشرجم لي تحل..
شوية كايبان ليه شي خيال كايطل وي رجع يتخبا..

ما عرفها غي من دوك الزغيبات لي مصبغة فالأشقر و مع الشمش كايبان صفر..

ضحك على عقلها الصغير:الله على بنت لفشوش و علامن عولنا..

خلاها على راحتها كاتحنزز..

حتا بانت ليه زعمات و دوزات الريدو و وقفات وراه..

تا هو ما كانش من لعاگزين خرج يدو من الشرجم دار ليها بايباي..

و رجع دخلها كايضحك على راسو وي شوف فيديه لي حركها بلا مايخمم
:على أخر يامك وليتي تلعب لعب الدراري الصغار..
قاتليك هيلو..
وااقيلا خاصني بزاااف غي باش نفهمها..

هي غي شافتو هز ليها يدو عرفاتو شافها..

حناكها تزنگو ما رضاتش يحصلها كاطل عليه..

وجدان:يخخ.. تا نتي كاطيري.. غايقول مع راسو عا عجبتها..

تربعات على الزربية فلرض كاضرب فجبهتها بيديها...
و رجعات كاتكمل على كلامها..

و الصراحة راه زيين.. و لابس لبيض بحالي.. ناري خاص ناخدو شي تصويرة غانبانو كوبل من دااااكشي..

حسنا نازلة كاتجبد باقي فيها النعاس..
كانت غادا لكوزينة.. تا حسات بلبرد كايسوط فيها من الصالون..