العروبي و عروس الريح

الجزء 58

🌾العروبي و عروسة الريح 🌾
💄الخنساء 💄

نجمة:هانا مشيت أوليدي

بوبكر شافها كاتعتر فجلايلها ما فيها لي يطلع دوك الدروج :غاتبقاي طالعا فالدروج بزاف عليك.. دوزي ترتاحي

نجمة:هاو نخلي لفريريج يموت ليا.. لواه

بوبكر :آنكمل و نطل عليه

نجمة بقات مكملة طريقها و كادوي معاه :هاايه واخا

بوبكر كايشوف فهاد لعيالات لي ضايرين بيه.. وحدة كاتخيل و تبني عا بوحدها و لخرا معروفة من نهارها كلامها فجيه و فعايلها فجيه..
نفض راسو و رجع كمل شغالو..
وجد الطبلة و بقا جالس حداها.. كايشوف فيها و تشوف فيه

لا وجدان خرجات من بيتها لا نجمة رجعات من السطح..
غي وجدان نعسات بمرة و نجمة سرحات رجليها لشمش كاتقطع فلخبز و تلوح للفروج لي كايضور حداها..

نجمة كاتهضر مع لفروج:بقيتي ليا عا نتا يا حنيني.. هاد لمدينة كاتجيب لغمَّا.. مصاب يرجعوني لخيمتي.. التواسع ديال ربي..
ولا هاد لقفص السما مانطلوش عليها..

بقا بوبكر كايتسنا شحال فلخر تسدات ليه حتى هو الشهية رجع غطا الطباسل مخليهم ليهم فوق الطبلة..
و تكا فوق أول مخدة لقا حداه.. مدام ما عندوش لخدمة فلعشية.. يريح عينو شوية..

وصلات الثمنية دلعشية..
تحل باب لابارطومو.. و دخلات وجدان شادا فيها نجمة كاتلهت بالسخفة..
شادا فيديها صباط نجمة لي عياها فرجليها حيت ماموالفاش بيه..

نجمة :الله.. هادي لخرة لحنَّاك.. ليوم نزور لحاج.. هادشي مادياليشاي

وجدان كاتنش على راسها بزز جارا نجمة:الصهد.. غاندوب

دخلو تالفات.. وجدان حلات الثلاجة كاتبرد راسها.. حيدات التيشورت كاتنش بيه على راسها..
و نجمة جلسات فوق الزربية گاتلك باغا تريح عظامها فلرض..
هاد لخرجة رجعاتهم مهلوكات..

نجمة؛ مقابلا مع وجدان لي شدات كرسي و جلسات حدا الثلاجة: تي حيدي من عند ديك لبرادة ضورك يصوط فك لبرد

سدات وجدان الثلاجة و ناضت لعند نجمة لقاتها عرات على داكشي لي خلا بوبكر..

وجدان جلسات كاتاكل بلا عقل:شفتي لماكلة كاتزيان ملي كاتنسايها..

نجمة :گلسي.. عتقي الروح.. تجمعي شوية اللحم تي بقاو فك عا لعظام.. بوبكر شتو گاعما ضاگو..

وجدان باستغراب عارفاه عزيز عليه هادشي :غايكون عا لفاخر گلبو على لقبلة..

نجمة:گولي وحلتيها ليه

وجدان:أنا؟

نجمة :عا غادا تفرفري لزناقي هوكاك لله .. تي الدمعات لي تكسابي گطرتيهم على دوك لحناك هاو سايرا تحنقزي عليا..
لگيتي ليام عاطياك.. كون جيتي فوقت لحاج.... إيييه أ ليام..را يضور بيك كحل الراس حتى يعيا و آخرتها يزيد وي خليك.. وزني.. و قيدي عندك