العروبي و عروس الريح

الجزء 35

🌾العروبي و عروسة الريح 🌾
💄الخنساء 💄

وجدان علات راسها كادوي بنفخة:حسبتك ما غاتجيش ملي شفتك تعطلتي..
هادا عشايا بوحدي..

أبو بكر كايضحك عارفها مغددة على داك التخربيق د لمشة لي ولات ساكنة معاهم..
هو فلأصل جاب علاش وصاتو غي خلاهم فلكوفر.. مع التقدية مالقاش كي يهز كلشي.. و ختار يهز داكشي لي كايخسر بحال لخضرة و اللحوم.. أما شي لاخر يتسنا..

:ياك..ماحشمتيش و أنا ؟

وجدان قبل ما يدخل للكوزينة وقفات قدامو كاتجبد.. :شوف ما كاين لا بنتي لا ختي..
و عشايا ديالي بوحدي أنا لي طيبتو..
گاليك نساني..

بوبكر حل فيها عينو :يااك...ألبزقولة.. شو كي كاتجبد.. يرضي على بنتي..
يله حيدي حيدي نشوفو آش وجدتي..

وقفات قدامو ما مخلياش ليه منين يدوز :وا لا..

بوبكر رجع داير غادي بحالو:صافي كوليه و لا عومي بيه أنا غادي نتعشا برا...

وجدان :شنو؟فين... أ ويلي يمشي و نبقا هنا بوحدي.. لااا.. أجي عا أجي أ خويا..

تبعاتو كاتزرب.. لقاتو غادي جيهة صباطو :شوف أندير معاك لمزيان... حيت راجلي و داكشي..
نتعشاو بجوج و لايني تغسل معايا لماعن.

بوبكر ضحكاتو حتى شد من راسو؛ الضحكة مع لآلام مايمكنش :شنو داكشي..

وجدان كاضور فعينيها:هاداكشي... ماعرفت عجباتني و گلتها..

شير ليها بوبكر بصندالة عند رجليها :لبسي.. بعدا و نشوفو هاد لعشا كي داير عاد ندوزو للماعن..
غلبوك أ سخيفينة..

وجدان :دابا تشوف.. لاهيلا عشا من داااكشي...

دخلات للكوزينة و ضربات على داك الجبل دالمواعين لي كايتسنا..
حالفة تا تخليه يفكها منهم...
واه تبقا هي غي تغسل فيهم...

جالس بوبكر قدام التلفازة.. بعدما بدل عليه و خدا دواه..
مخدم قناة ثقافية..
و متبع معاهم على لموضوع لي داوين عليه...

شاف فالساعة بانت ليه العشرة :آ سخيفينة...
حرقتي لعشا؟

وجدان من لبيت:هانا جايا

حيدات لبيجامة لي كانت كاتشقا فيها فلكوزينة رجعاتها حالتها...
و لبسات وحدة خرا..
نص كم و طويلة تال الركبة..

سبحان الله عمرها حشمات قدام شي حد فاللبس.. تال عند هادا..
واخا فالدار.. كاتلبس داكشي زوين و كاتحاول طول شوية..
غي فاش كاتحصل عليه شي شوفة ماشي تال هيه فشي قنت..
كاطير تبدل بشي حاجة مغطية كثر..

خرجات للكوزينة هزات جوج طبيسلات مقادين مصايبين..
فيهم ستيك دالدجاج مقطع صغير.. حداه بيري دبطاطا منسمة و حداها خضرة سوطي فالزبدة و الزعتر..