العروبي و عروس الريح

الجزء 32

🌾العروبي و عروسة الريح 🌾
💄الخنساء 💄

فاطمة سكتات.. و طلات من ورا لخامية دالشرجم :ها هو جا يله الله يدير ليك لي فيها لخير

يوسف :آمين..

دازو جلسو فالصالون الصغير فين كانت طبيلة حاطين عليها لفطور..
داكشي بسيط و ديال الدار..

الإمام دخل من الباب بجلبابو لبيض:السلام عليكم..

يوسف+فاطمة:و عليكم السلام..

فاطمة ضورات الصينية عندها كاتخوي فلكيسان.. واخا كايفطرو ملي كاينوظو للفجر.. ما كاتجي توصل لعشرة تا كايخصهم يعاودو لفطور..

مدو يديهم كلها كايهز لي عجبو..
يوسف كل شوية يشوف فمو و كايدير ليها بعينو زعما دوي..

و فاطمة كاتصبر فيه..
كاتسنا لوقت لمناسب..

أب يوسف لمعروف بلقب الإمام.. كيف فالدار ولا فالزنقة كلشي كايعيط ليه غي بالإمام..
كان متبع حركاتهم.. كايتسناهم حتى ينطقو على خاطر خاطرهم..

فاطمة كاتكحب و تقرقب فكاسها باش يشوفو فيها..
و داكشي لي كان..

الإمام:خبار لخير إن شاء الله..

فاطمة:كل الخير.. كيف كاتشوف ولدي يوسف اللهم بارك كبر و خدم..
ما خاصو خير الحمد لله..
قلت زعما... أحم.. و إلى قبلتي.. يدير حتى هو دارو.. و نشوفو ولادو..

الإمام محمد هز عينو فيوسف.. من تعابير وجهو باينا فيه لخبار فراسو..
عاد كايتسنا جوابو بلهفة
:إذا توالمتو ما عندي غي اللهم بارك..

وقف بعدما قال هاد لجملة داير بعينيه ل فاطمة باش تلحقو..

داك الساع تبعاتو.. مخلين يوسف كايضور فراسو.. ما عرف يفرح و لا يتسنا شي صدمة من شنو غايقول لمو..

الإمام محمد:. شكون هادي؟فين عرفها؟

فاطمة: و الله ما عندي علم.. على ما قال شافها من بعيد بانت لو مزيانة.. و طلبني نمشي نشوفها و نسول عائلتها..

الإمام محمد كايوصيها :راك عارفة مانوصيكش المهم تكون إنسانة عارفة بينها و بين لي خلقها..

فهمات فاطمة بلي قصد أنها ماتكونش من المتبرجات.. و لا تكون معرية شعرها..عاد تكون منظابطة مع خالقها بالصلاة..
خلاصة ماتكونش من بنات الوقت لي كل همهم يحطو لمرايا وي تقاضو.. خاصها تكون مرا دالزمان..

فاطمة:لهلا يخيبنا يا ربي.. إن شاء الله يتيسرو الأمور و نشوفوه بدارو بحال خوتو..

الإمام:إن شاء الله..

فاطمة:آ.. سي محمد.. إلى كان ممكن غانمشي نتلاقاها هاد لعشية و نشوف أمها..

الإمام فكر شوية:خير البر عاجله.. اللهم يسر و إذنك معاك..
لازمكم شي حاجة؟