العروبي و عروس الريح

الجزء 6

🌾العروبي و عروسة الريح 🌾
💄الخنساء 💄

نجمة:الله يرضي عليك أ بنيتي و تباركالله عليك ديما شغلك متقون كايحمر لوجه..

الزاهية عرفاتها كا دق عليها..
مولفين حشيان لهضرا بيناتهم.. واخا ما عرت شنو دير الزاهية كاتعيب ليها نجمة بلحق بطريقة لبقة..

حسناء مدات كأس للزاهية:الزاهية.. مرحبا بيك من شحال ما بقيتي جيتي لعندي

الزاهية شدات من عندها الكأس :يا بسم الله.. وا الشغل راك عارفا جري عليا نجري عليك

مدات كأس لسامية لي غي كاتفرج فالطابلة لمنوعة و تقيد فدماغها.. عشقها الكوزينا.. فين ما كانت الوصفة تجربها تجربها و ربي كبير واخا الزاهية كاتبقا تبرگم عليها ما عاجبهاش داك التفاتف و لايني مصطفى لي حطاتها كا ياكل وي قول تباركالله..
الشيء لي مساندها تكمل فبحثها و تجاربها.. بلا ما تهز الهم..

حسناء حيدات الزيف ملي ما كاين رجال..
غي المصطفى و بو بكر وصلوهم لقاو السلام و مشاو.. عيات تشد فيهم يدخلو رفضو رفضاً قاطعاً حتى يكون عبد الرحيم عاد يدخلو.
و طلقات عليهم الشعر لي كان كاري كحل جامعاه لور غي بمقبط..

حسناء :يا ختي كون غي دخلو بقاو فيا مساكن يبقاو يدورو تال لعشيا..

الزاهية نقزات قبل ما دوي نجمة باغا تبان :لا ماكاين لاش يبقاو فيك مراهمش گاعدين فالزنقا را ولدي عندو محال فديك لي تسميوها لالا زهرا ما يكونو مشاو غي يطلو على الشغل فين وصل تباااركالله وليدي الله يحجبو تيسرات ليه التجارة فيديه..

دورات نجمة راسها مال هاد السيدة على هاد الشرح كامل..

حسناء فداخلها عجبها لحال ملي زادت تأكدات بلي حالتو المادية مزيانة..
و لايني ما بين اتش و هزات حلوة من لي جابو كادوق فيها :
إوا الله يكمل عليه.. هاد الحلوة زوينا

الزاهية بحال شي مصطيا كاتنقز فالهضرا :بنتي سامية لي دارتها..

حسناء :زوينا الله يعطيك الصحة أ بنتي هزي تفطري ماتحشميش راك بحالا فداركم..

سامية بتقالا :شكراً خالتي بصحتك.. عاد فطرت داكشي علاش

حسناء :إوا شربو شربو بعدا غي كويس داتاي يحيد عليكم السخفا دالطريق..

نجمة :عندك الصح ملي شربتو عاد تگاد ليا لمجاج.. راسي كان يزدح عليا..

بقاو كايدويو وي تعاودو و مرة مرة تنقز الزاهية باش تگول ليهم را ولدي كي دير را ولدي عندو..
نجمة ولات غي كاتحمر فيها بعينيها..

الزاهية:لا مكاين عداب داكشي غي خفيف كون حضرتي ف...

دوات نجمة حيت عرفاتها غاتقول عرس ولدي لول.. و تبدا تعاود بلا سوال