العروبي و عروس الريح

الجزء 41

🌾العروبي و عروسة الريح 🌾
💄الخنساء 💄

نزل بوبكر و جنبو سامية.. جامعين حوايجهم و كايتسناو..
حتى تم جاي مصطفى باقي بنفس لحوايج ماخلاوهش يدخل عندهم لبيت..

بوبكر :حصلتي

مصطفى :هانتا تشوف.. اودي عا ليلة مادات ما جابت..

بوبكر:وا شرحها ليهم نتا..

جلسو مستفين على واحد السداري.. كايتسناو.. على قلبهم..
مابقاوش بزاف و هي تبدا نازلة..

وجدان فالمقدمة نزلات كاتجري و حيدات من الطريق كاتفرنس.. و كاتصور ردت الفعل ديالهم..

بوبكر:صافي ساليتو..
فين مي؟

وجدان كادير ليهم بيديها سكتو زعما..
شوية سمعو الزاهية نازلة..

أول ما شاف بوبكر هوما سيگانها و هو يطلع حاجبو كايخنزر وي نفخ..
سامية حابسة الضحكة.. و دايرا يديها على فمها.. بحال شي بنية صغيرة..
مصطفى هاداك بوحدو لي عاجبو لحال..

مصطفى :تا فين بنت لقابلة توما شتكم بدلتو ليها لكاغيط..

بوبكر كايشوف لعكر و الرموش مجبدين :استغفر الله العلي العظيم..

الزاهية كاتفرنس:هاناااا.. كي جيتكم..
صغاريت و زيانيت ياااك؟
هاو توما دويو..

بوبكر شاف فوجدان خلاها تجمع ضحكتها..

وجدان:جات فنة ياكو؟

بوبكر كتيتصنع الهدوء:مي..

الزاهية كاضحك:آ وليدي

بوبكر :ميمتي..

الزاهية:تا هاشنو.. ماعجبتكش؟

بوبكر:ماتعطلوناش كتر.. و يله لبسي حوايجك باش نمشيو..

الزاهية كاتوريه حوايجها:هاو راني لابسة.. جاوني على من زيناتهم..
وليت نبان تانا همة و شان..

بوبكر ضار عند مولات لمصايب :وجدااان

وجدان كاتفرج من بعيد.. عيط ليها و هي تمشي حداه.. و زربات عليه:هي لي طلباتني أنا عا عاونتها فسبيل الله..
مالها ماشي مرت عمي..
حشومة.. نگول ليها لا

بوبكر بلحس:نتي كاتعرفي الحشمة..
سبحان مبدل الأحوال.. دوزي حيدي هاد الروينة و بلاتي و نتفاهمو غي قيدي عندك..

وجدان:تا أنا دابا مالي..
مادرت والو عا عاونت فسبيييل الله مابقاش لواحد يدي معاكم لآجر...

خلاتو و رجعات لبلاصتها.. كانت سامية كاتشكر فالزاهية.. ماتقدرش تقول ليها خايبة لا تلصق ليها ديك لبلغة مع كمارتها..

سامية كاضحك على الزاهية و لخرا عاجبها لحال و هازا راسها بكل ثقة
:فنة.. لاهيلا صغاريتي..