العروبي و عروس الريح

الجزء 46

🌾العروبي و عروسة الريح 🌾
💄الخنساء 💄

نجمة: لعجب.. ياكما داك لولد غبر تاني..

الزاهية : وا نكدب... الله أعلم.. يتگاد لمجاج و  نسول فيها..
فين دوك لهيشات؟

نجمة:تخشاو عند ديك الصفيحة تاني.. غانوض ندير شوية لما نتوضى و  نصلي ليا لمغرب..
قبل لايدخل وقت لعشا..

دازت نجمة كاتجر فرجليها باش تسخن لما.. و بقات الزاهية كاضور فعينيها..

الزاهية دغيا ستاراحت و وقفات :هاو نبقا هوك.. لاواه..

خرجات كاتزرب خطواتها لعند وجدان و سامية تشوف شكايرونو مع بعضهم..
غي دخلات عليهم و هوما يقفزو..

الزاهية:تا شسايرين ترونو؟

سدات وجدان لبيسي :والو..

الزاهية تخشات صحة وسطهم:نوضي تگعدي تي.. حيدي هاد الشراوط.. و تعالي نسمعو شكنتو تعاودو تي وياه..
هاو حلي حلي أبنيتي خانسقيو عويناتنا..

سامية:غي سيري أ مي دابا نجي و نعاود لك..

الزاهية دفعاتها :تي تگعدي.. كوني كي لالياتك.. مايگلسو تا ينضيو شغلهم..

يله غايتشادو تدخلات وجدان:هاااكي هاااه...

حلات ليها وجدان لبيسي عارت الله غي تهنيهم..
سدات لي باج لي كانو حالين؛
ودارت ليها  أفلام كانو مسجلين عندهم..
بقات الزاهية مضاربا معاهم باغا تفهم بزز واخا ما قارياش حاضيا لحركات و متبعا التصاور و كاتربط فالأحداث.. باش تعرف علاش كايهضرو..

عين فلبيسي و عين على وجدان و سامية لي رجعو بعدو منها شادين لقنت بجوج كايدويو بالهمس..

وجدان:وا نطقي أ زمر.. عصبتيني..

سامية :شغانگول لك مزال.. را لي عندي عاودتو..

وجدان:تي آش گلتي.. من هاد الروينة ديالك..باينا كاذبة عليا.. غي نطقي

سامية كاضور فعينيها كاتحاول ما تسمعش لوجدان باش ماتصدقش معاودا كلشي
:وا صافي.. هضرا باينا..

وجدان كاتلوي فعينيها.. مزال ما شافت آش سجل تيفليفونها.. يعني غاتعرف غاتعرف آش وقع بالتفصيل
:دابا نشوف..
و دابا شنو ما كاين عرس؟ بغيت نشط

سامية:واش طايحا على راسك.. آشمن عرس.. نهار يسني ورقة طلاق و نشوفو..

وجدان:يااااك. .. و لحنة و داكشي لي كانو داوين عليه آش قاديتو؟

سامية هزات عينيها فالزاهية: مايمكنش نضيع فرصة بحال هادي.. ماعلانا
ماغاتفهمينيش..
لي كاين  دابا هو ما سمعتي.. داك التخربيق دلخطبة و لحنة هوما لي بغاوه  غاندوزوه بلخاطر.. و لعقد نهار يطلق..

وجدان:مافهمتش أنا بعدا آش هاد الروينة.. ماعرفناك باغا ولا لا.. و لاما طلقش

سامية: ماعندك ماتفهمي..و غايطلق..