العروبي و عروس الريح

الجزء 48

🌾العروبي و عروسة الريح 🌾
💄الخنساء 💄

اللقطة دموت هدى مزال قدام عينين وداد..
كاتمشي حتى تقول نسيتها و ترجع تبان قدامها..

حادة :غاتبقاي على هاد لحالة..

وداد:شي حاجة مامفهوماش.. وااه بزاف على صدفة

حادة:نكدب عليك.. أنا ماعرفتكشاي علاش سايرا تمعني..

وداد كاتقاد فراشها:ما عندك ماتعرفي.. لي كتاب كتاب ما عند العبد ما يدير..

حادة:محال نعس هاد السيمانة.. آ واخا ما كنت نحمل هدى.. موتها مايقبلوش الخاطر..

وداد:هانتي گلتيها لموت.. نخممو تا نعياو آخرتنا نساوها حتال نهار نجربوها..

تكاو فبلايصهم و طلقو لقرآن عند روسهم.. وداد شادا تيليفون الزوهرة بين يديها بالتلفة ما بقاتش رجعاتو ليها..

الزوهرة غادا جايا؛كل شوية يسخرها سعيد بحالة ماعندوش الرجلين يهبط يجيب بيهم ما بغا..

سعيد بعدما دخل فالطبسيل بالطول و العرض.. رجع لور كايتبنن:هادشي مسوس..

الزوهرة دايرا براسها ناعسة و قالت تحت نيفها :حولك خليتيه..

سعيد:الزوهرة.. وا الزوهرة

الزوهرة:شكاين تاني..

سعيد:إيوا شنو الطباسل يبقاو معرمين هنا.. توليو تغسلو بالنقطة على ختها..
جمعي كلشي يدوز مرة وحدة بلاش من الضياع..

الزوهرة:تال الصباح عا خليهم..

سعيد:الصباح يبان شغل خر..

رجعات الزوهرة تاني حادرا راسها تنزل داكشي بزز منها..
دازت من حدا بيت عبد الرحمان و دقات بالشوية ما جاوبها حد.. حطات وذنيها على لباب

كاتسمع صوت عبد الرحمان كايرتل فالقرآن..
بعدا رتاحت عليه شوية..

بعدا هادي أحسن طريقة لقاها باش يخفف على راسو...
جالس تقريباً نص نهار حتال دابا و هو  فنفس لبلاصة بدون ملل

خلاتو على راحتو و كملات طريقها..
بعدما طرقات وداد لقاتها مزال داويا هي و حادة..
ماطولاتش معاهم بزاف و رجعات ترتاح تا هي شوية..

فالدار عند وجدان..

داز النهار بيخير عندها.. مع لقات لي يهز عليها الطياب و الشقا..
حسناء و شيريهان واقفين بجوج و هي جالسا كاتفرج فيهم..
عبد الرحيم كايبقا النهار كامل شاد لمجلات الثقافية و الجورنال كايقلب فيهم وي عاود..
ما طاح عليه غي فوقاش يرجع لخدمتو و يشغل وقتو..
زاد كمل عليه الدوا لي غي يشربو كايرخيه.. ما كايبقاش عاقل على راسو..

بوبكر ملي رجع.. و هو مبرع مع حسناء بالشهيواات..
كاتهز هادي و تحط لخرا..
حتى مابقاش لاقي فين يحط شي حاجة خرا..
حتى ملي بغاو يمشيو... رجعو شدوهم يبقاو  معاهم حتال غدا..