🌾العروبي و عروسة الريح 🌾
💄الخنساء 💄بوبكر ماشعرش حتى داتو عينو..
كايتصنت لعظامو..
ما ضرباتو لفيقا حتال نص الليل..حل عينو على بلاصة وجدان خاويا..
تلفت للساعة لي حداه كانت كاتشير ل الثلاثة دالصباح و الزيادة..ناض سامح فالصندالة.. يقلب عليها
مع حل لباب عطات ريحةالطياب؛ خلاتو يهز حاجبو
:هادي ضربها عجل الليل..وجدان مشغولة مع شكاترون..
لعجينة كاتخلطها بيد و ليد لخرا شادا بيها التيليفون ما هي هنا.. ما هي لهيه..بوبكر طل عليها و قال بطنز:أ صباح الخير على زينة لبنات..
وجدان قفزات حتى كان غايطيح ليها التيليفون..
صدقات شاداه بليد لي كانت فيها لعجينة
:آ زمر..بوبكر كايتاوب :ما سمعتش..
وجدان قلبات تيليفونها و جرات شيفون كاتمسح فيه؛ عاد استعقلات شنو قالت..
و هي تشوف فيه كاتلبد فعينيها
:التمر.. التمر..
بغيتو و مالقيتوش.. ما جبتيهش؟بوبكر قرب كايطل على داكشي لي واجد و مستفاه فالطباسل
:الله يعميها ليك..
آش هادشي كامل.. غادا لعرس؟
مانعستيش؟وجدان :حيد حيد.. ماتقيس حتى حاجة تخسر ليا الديكور..
سير عا نتا تنعس ياك كنتي مريض..بوبكر:نمرض.. و نخلي لحلوة توجد لحلوة.. مايمكنش..
وجدان هزات كف يديها لجبهتو : لعجب حتى ما فيك سخانة..
ماعجبتينيش..بوبكر كايلمق من داكشي لي محطوط واخا علماتو مايقيصش..
وجدان:أبو بكر.. بسلتي.. خلي حتى نكمل و نصور و داك الساع كولو ولا لوحو..
ضربها بخفة على راسها :التصاور حسن مني أ بنت عمي..
وجدان :أنا لي هبيلة أ سي ولد عمي..
جرات طباسلها عندها كادخل فيهم لثلاجة..
:حولهم كايخزنو لحلوة بلقفل و الساروت.. گول عارفينكم.. حتى حاجة ماتگلس الله يستر..بوبكر جر كرسي :مانعستيش؟
وجدان ضارت عندو حاطا يديها على جنبها مفقوصة علاش فاق دابا :آش بان لك..
بوبكر :بانلي غاتخرجي على صحتك..
غانديك للطبيب نشوفو هادشي ديالك..
النعاس ساعتين لا كملتيها مقادا خاص لحفلة..وجدان مامسوقاش:عادي.. كل واحد و شحال خاصو ينعس أنا مرتاحة هاكا..
بوبكر كايأكد على كلامو:غانمشيو عند الطبيب خليها فبالك..
وجدان كاتحرك راسها بواخا.. :إن شاء الله..
نطقاتها ليه بالثقالة يعني لا..
أنت تقرأ
العروبي و عروس الريح
Romance🦈حصرياً على بحر الروكانات 🦈 #العروبي_و_عروسة_الريح كيف الزيت و الماء و الشمس و القمر و كيف النهار و الليل و أكيد كيف السماء والأرض أبطالنا بفك...