العروبي و عروس الريح

الجزء 21

🌾العروبي و عروسة الريح 🌾
💄الخنساء 💄

بوبكر كان غادي يتوضا باش يلحق يصلي لعشا لي فاتو حتى دار عندها مفكرها
:ما كاتصليش؟

ما بغاش يحدد السؤال و يصدق محشمها.. فخلاه سؤال مفتوح..

وجدان فكرات فكلامو بقد ما هو سؤال بسيط بقد ما حشمات تجاوب عليه و شنو غاتقول لا بوجهها حمر..

وجدان:لا كانصلي كانصلي..

هادشي لي لقات تقول قدامو.. ملي شافتو مزال كايتسنا جوابها..

بوبكر:غانخلي ليك لما ورايا..

وجدان :واخا.. صافي

مشا يتوضى مخليها تالفا وراه.. ياااه شحال ما حطات جبهتها على لرض..

ناضت كاتنسي لأفكار لي بداو كايجيوها..
بعد لمرات سؤال خفيف كايكون ليه تأثير كبييير على حياتنا..

جبدات ثلاثة السراول و جوج تيشورتات مع بينوار طويل..
حيدات لكسوا بزربة و لبسات داكشي..

ما باغا تخلي ليه فين يشوف..

وجدان:الله علي راحة.. واخا الصهد..
بلحق و الله لباباه لا شاف ولا تشوف..

خرج بوبكر و بانت ليه مغلفة و جالسا على واحد لكانابي صغير كاين تما..

كاتمتم بوحدها..

عيط ليها بشوية.. و ما سمعاتوش..

و قرب تا دوز يديه على حنكها..

غوتات راجعا لور..
خلعاتو تا رجع جمع يدو عندو..

وجدان:أخخ.. خلعتيني.. يسحاب ليا عا شي سراق الزيت كايتسارا..

بوبكر ضحكاتو بديك التفتفة ديالها :ههه.. نوضي.. را خليت ليك لما قبل ما يبرد..

خلات على دوز من قدامو و كحزات فلكانابي تا وصلا للجيهة الثانية عاد تسلتات..

فسرها بالحشمة لي كان نيت باغي..

دخلات للحمام فين لقاتو مخلي ليها لما دافي..

بدات فلوضو و هي كاتسعقل من شحال ماتوضات.. لدرجة تلفات كلشي..
ما بقات عارفا تغسل وجهها مرة و لا ثلاثة..
عاد ما عرفات تسبق راسها ولا وذنيها..

بقات شحال مخشية فالدوش..

كاتوضى و تسالي.. و ترجع تستعقل بلي غلطات فشي حاجة..

و تعاود تاني..

كرمات بلما بارد لي كملات بيه لوضو..

بوبكر هاد لوقت..
صلى و سالا..
و رجع هز لقصة لي كان حابس فيها..

و نساحب من لبيت..
غادي للكوزينة..

بقا كايقلب وسط لبلاكارات على شي براد..
مايمكنش يبقا بلا آتاي..