العروبي و عروس الريح

الجزء 4

🌾العروبي و عروسة الريح 🌾
💄الخنساء 💄

محمد جاتو لبكيا و دغيا دموعو طاحو..
هادشي كااامل على واحد ليوتيوبرز سميتها شفا باقا لاسقا فلرض و كاظل تفوح على دراري صغار..و هوما متبعينها..

وجدان غي سمعاتو ..
بغا يطيح ليها لما فركابي و هي لي مشارجيا غي عشرين درهم بغات تقدها فهاد اليوماين؟

وجدان:كيفاش؟ لا بابا كاضحك معانا ياك ؟

عبد الرحيم كايشوف فيهم من لمرايا :توما مالكم نعستو عينيكم لا بكي تانتي معاه..أ قطعو عليا حسكم و لا نحطكم هنا نيت فهاد لخلاوات ..

.. حسناء:خليهم  يتعصرو شويا من شحال ما سقاو عينيهم ..
عبد الرحيم..

عبد الرحيم:خبار لخير

حسناء كادوي و تشوف فولادها بنص عين:غايكونو حتى ولاد خوتك ياك؟

عبد الرحيم :ضروري... منها نيت ما تبقاش تخلعهم ديك ولاد عمك ياك أ محمد ..را ماماك كانت غي تاضحك معاك

حسناء :آشمن.. عبد الرحيم

عبد الرحيم :هنينا گالاك من الخوف دوالو..

محمد دموعو فاضو..
حتى خشا راسو بين يديه كايتنخصص:و الله ما بقيت كاندير لي بيتيز..
و الله أ ماما ما درت شي حاجة

وجدان طفات تيليفون و كاتهز و تحط فرجليها تخيلات سيناريوهات كثيييرة ها هوما تاني بحوايجهم لعامرين تراب كايدفعو فيها للكوري دلبقر..

شويا كاتخايلهم لاحوها فلبئر و سدو عليها مخلينها كاتغرق ..

دازت الطريق فصقيل بعد ما نعس محمد بقوة ما بكى ..

كيف وصلو بانو ليهم قوة طونوبيلات مركونين دايرين الصف..

نزلات حسناء و لوات الشال على راسها عاد دازت تفيق محمد لي هزو عبد الرحيم ..

وجدان حطات رجليها و هي تلقا الحجر ..
يسحاب ليها الطريق مقادا و هي كلها حفاري يله سيري دابا بداك جوج ميترو
هي غادا و طالون كايتخشا ليها فلحفاري ..

ملي كانت صغيرة ما بقات جات للعروبية ..

كانت لا عرفات بلي باها و مها غادين كاتلصق فرشيدة و تمشي تجلس معاها تايجيو ..
جدودها كانت كاتشوفهم ملي كايجيو عندهم و أصلا ما عندهاش معاهم قاتلك فيهم ريحة لبقر و لغنم ..

تعترات شوية ماتجي على فمها كون ما شداتها حسنا من قبها ..

حسناء:زيدي يا بنت الهم ..لواحد هو لي يخليك تحسبي سنانك..

شدات من مها غادا كاتجر فرجليها لي تلوات ليها و مع هي لحمها عزيز دغيا بدات دمع..

عبد الرحيم:وجدان مالك أبنتي؟

وجدان:تلوات لي رجلي ..

عبد الرحيم:صبري غي ندخل نحط خوك را رجع نعس و نشوفها ليك ..غي زيدي بشويا ..