العروبي و عروس الريح

الجزء 10

🌾العروبي و عروسة الريح 🌾
💄الخنساء 💄

جمعات الممرضة داكشي لي كانت حاطا رشيدة و حطاتو ليهم فوق واحد الخزانة صغيرة حتا يهزوه..
عزلات الزلافا دلحسوا بوحدها جراتها حاطاها فوق الطبلة لي جابت معاها.
قشعاتها رشيدة :
سمالله عليك أ حنينتي.. تي شتك بحالا هزيتي الزلافا عاطيها ليك بوك..

الممرضة سرطات ريقها عينيها على الزلافا غاتسطا عليها :
سمحيليا يا ختي.. لا جات على خاطرك ناخدها ليك أنا دابا شوية تلقاي الزلافا عندك

وقفات رشيدة صدرها كاتهز و تحط
:گول تي سايرا تحومي عليها من الصباح هاو تاتمرضي فينا بانقتلو الراجل ما بان زعترو ليه.. ماحشمتي ما راعيتي

حرك عبد الرحيم عينيه لحسنا باش تتدخل..

حسنا :رشيدة صافي خليها.. غي هزي أ بنتي ماشي مشكل

رشيدة:تا شمن و تگلس تعيب فيا أنا.. غاديري غاتزعتري و هي مدلية ريوگها عليها..

الممرضة دغيا بدات تبكي : و الله ما عرفت مالي غير سمحولي و الله ما فهمت مالي..

ميقات رشيدة بفمها ضربات على صبعها فيه خاتم دلمارياج :هممم.. مالك يا يملو لك.. شهاد السبيطار ملي ولاو الطبَّا يسولو لمريض على حالهم.. سيري سيري بلا ما دمعي عليا و دوزي ديري ليك شي فيزيتا .. توما السبيطار عند قنانفكم تصبحو و تنعسو فيه و ما عاقلين تا على روسكم..

ما داتهاش فيها الممرضة حطات لماكلة لعبد الرحيم و خرجات دافعا كروستها الضحكة مطبوعة على وجهها من لوذن حتال ختها..

قبل ما تخرج دارت عندهم :آه.. را ماكدبتش عليكم را خاصو لمسوس و بعدو على لعشوب..

خرجات مخلياهم كايحبلقو فبعضهم..

رشيدة:بفف.. على بنات لوقت.. خدامين بلا خدمة..

حسنا:شغاتگولي أخر الهضرا سكات.. أنشوفوش هادشي لي جابت..

علات شوية الناموسية دعبد الرحيم باش يتگعد وي ياكل على راحتو.. هزات المعلقة باغا تعطيه حتى منعها

عبد الرحيم :غي خلي عليك أنا نهز راسي..

عطاتو المعلقة مخلياه على راحتو عرفاتو ما رداش توكلو قدام رشيدة..
بحالو بحال بزاف د الرجال واخا تكون واصلا ليه للعظم يقول راني بيخير..

حتى رشيدة فهمات القضية و هزات الساك دلحوايج :هاكي أ ختي بدلي عليك حويجك.. راني جبت ليك شي حاجة تقدي بيها

حسنا؛سيري الله يرضي عليك.. نيت كنت مقجوجا

رشيدة:وا شتيش راني على بال.. وا سيري خلاص أنا نجبد فطوري نقاد بيه لمجاج.. لمصيبة شتها ما بقات جابت الزلافا و جايبا عا جوجات كون نعرفها نهز بعدا عا السوكور..