العروبي و عروس الريح

الجزء 44

🌾العروبي و عروسة الريح 🌾
💄الخنساء 💄

تحل لباب دالدار مع آذان لعصر..

يله دار خطوتو لولة و هي تخرج قدامو..

بوبكر ماعرفها منين خرجات و هو يرجع خطوة لور..

وجدان:جيتي ؟فين تعطلتي؟

بوبكر :السلام عليكم بعدا..

وجدان كاطل على شنو جايب معاه:السلام عاد تفكرتيها.. مخليني فهاد لحفرة  بوحدي  شوية مانتسطا..

بوبكر:شتك باقا بعقلك..

وجدان:طنز غي طنز.. عرفتي وجدت واحد لبلا واعر

بوبكر جالس على واحد لكرسي كايحيد صباطو و بقا جالس كايدوي معاها و هي قدامو كاتقلب قدامو فلي ساشي
:شي جزيرة دلخضرة عاوتاني..

وجدان بضحكة دبلعاني:مضحك..
آجي تشوف.. باش تعرفو راني غي ضايعا معاكم..

بوبكر وقف تابعها يشوف آشمن اختراع موجدة ليه تاني؛
جبدات ليه وجدان شنو وجدات من الثلاجة و حطاتو قدامو..

هز الطبسيل بالشوية معوج معاه راسو.. بقا كايضور فيه قدام عينو شحال..

وجدان:كي جاك؟

حابس الضحكة بين سنانو ما عرف ما يگول ليها..
:زوين.. تباركالله عليك

وجدان هزات معلقة و حطاتها قدامو:و دوق بعدا

بقا كايشوف فداكشي فالزرق بحال داك الهلام لي كايديرو فالرسوم المتحركة..
كايترعد غي بوحدو..
هز معلقة بزز لأن داكشي كايزلق من لمعلقة
:هادشي  شتو كايشطح بلا موسيقى

صبر حتى عيا و بدا كايضحك.. كايحرك فلمعلقة وي وريها كيفاش داكشي كايتحرك بحال شي لعبة..

وجدان كاتشوف فيه معوجة وجهها و حاجب طالع:سري أنا لي دايرا فيك راسي..
آرا ليا طبسيلي..

بوبكر رجع هز الطبسيل:طبسيلي

وجدان:كنتي كاطيب فيه؟

بوبكر:كنتي كاتشري فيه؟

وجدان شادا الطبسيل و بوبكر شاد من جيهة خرا:شلا.. نخلصوه ليك

بوبكر :آري لهنا گالاك نشوف..
بغيت غي نعرف منين كايطيحو عليك هاد لوصفات..

وجدان :هاداك سميتو الإبداع.. أ سي لأستاذ

بوبكر طلع حاجبو و جمع الضحكة:لا فهادي غلبتيني..
و على هاد لإبداع غانزيدك نقطة فلمواضبة و السلوك...

جرب بوبكر لمعلقة لولة.. ما عجبوش داكشي. مي خلا وجهو عادي.. محافظ على ابتسامتو
:مزيان..

وجدان ضارت عليه :عارفاه مزيان..
و واعر را دقتو.. عا بغينا ندوقوك

بوبكر :وا الله يرضي عليك ملي تفكرتينا..