العروبي و عروس الريح

الجزء 12

🌾العروبي و عروسة الريح 🌾
💄الخنساء 💄

كملو تقديتهم كلها هزات تكشيطتها واخا حسنا و رشيدة غي معاندين لي هزاتها هادي تبغيها لخرا..
تقول لعرس ديالهم..
شافو تا عياو فلخر هزو نفس التكشيطة غي اللون لي مختالف..

رجعو محملين بالتقدية..
طلعو داكشي دوجدان لبيتها..

التكشيطة مغلفا علاقاتها ليها حسنا مع حوايجها..
أما السنسلة لي بخاتمها و حوالقها و دمليجها هزاتها حسنا لعندها ما تعطيها ليها تا يقربو يجيو ناس..

ما بقات تيقا فيها تصدق بايعاهم و لا لايحاهم من الشرجم..
و هي حطات فيهم فلوس صحيحة نيت باش ماتخليش عنقها و يديها خاوين قدام الناس..

نهار السبت كلشي كان كايجري الدار دوجدان تهزات كاملة و تسيقات و عاود حطوها..
البخور غي مطلوق صباح و عشية تا لسقات فلحوايج..

الضيافة وجداتها رشيدة و لبنات لي معاها منهم حتى شيريهان لي بدات معاها..

الحلوى المغربية بالشكال و النواع..
ها حلوة التمر ها دلوز ها لفقاص ها لغريبة و بنت عمها من معلكة و ريشبوند....
يوماين و هوما كايطيبو...
أما صابلي كملو التزواق ديالو غي بلكشايف..

لمسمن ؛لبغرير... گاع المعجنات خلاوهم حتال ليلة السبت..

غي كملو و هوما يتستفو فالصالون منشورات بالعيا..

عياو فحسنا يشريو كلشي واجد و هي عكسات ليهم..

وجدان من هادشي كامل جروها بزز معاهم؛ شادا التمر كاتحلو و تحيد العصفا عاد كاتعمرو بعجينة اللوز و كل مرة فاش كاتفندو..

لقات راحتها فداك التزواق و البريستيج.. بلا ما تحس ولات تا هي كاتعطي رأيها فالحلوى.. هادي ديرو ليها لكحل و لخرا البيض..
حتى كملو..

الحداش ديال ليل ضربات و هوما باقين جالسين غي العائلة و شيريهان لي غاتعاونهم غدا....
ما بغاوش يخليوها تمشي فهاد الليل و غدا تبدا راجعا كاتجري

رشيدة :غدا إن شاء الله غاتصبحو فالحمام.. بلاما تخليوني كانبرح..

زينب :ماما أنا ما غانمشيش

رشيدة هزات حاجبها :و علاش بالسلامة؟باتبقاي موسخة لمك و تلبسي لقفطان على لعرگ

زينب بدات كاتهرنن :وااا لااا ما كايعجبنيش الحمام.. ما بغيتش

مدات رشيدة يديها لمخدا عند راسها صيفطاتها ليها للكمارة ؛مخرجا فيها عينيها :زمي كابينتك يا بن لمنونخا لخرا.. گدك را يديو معاهم بزهم تي سايرا تخنني عليا.. زميه لانوض ليك

زينب شداتها اللقوا كاتخاف من مها لحد الموت..

رشيدة ملي دوات حسات براسها سخنات و هي دور لوجدان
:إيوا يا لعروسة لمكحلاها علينا كي جاك لعريس؟