العروبي و عروس الريح

الجزء 20

🌾العروبي و عروسة الريح 🌾
💄الخنساء 💄

سامية فشات قلبها بلبكا..
و قدامها تيليفونها..
دازت على لميساجات كاملين كاتعاودهم فلقرايا و تمسحهم..
كانت مسجلاه باسم واحد بنت خالها..

ما خلات والو حتى من ديك صباح لخير ولا تصبحي على خير مسحاتهم..

بعد لمرات كايقول ليها راسها نوضي هربي آش مزال مصبرك؟

كلشي كاديريه كيف كايبغيوه الناس..
لا قرايا بلخاطر..
لا خروج و دروج كيف لبنات..

لهضرة هي لخرا بلقياس..

و حتى من لي رتاحت ليه قلب وجهو عليها و تبع الأحلام ديالو.. لي باين أنها ما عندهاش بلاصة وسطهم..

ختماتها بأنها تجبدات فبلاصتها..
متوسدة مخدتها لي رجعات عامرا بنقيطات بحال ديال الشتا..
كاتبكي و تخلي دموعها ينزلو على لخدية..

لدرجة راسها بدا كايعطيها الصداع..
و غمضات عينيها بزز باغا غي تنعس و ترتاح..

حمزة يا حمزة..

مشا فطريق طويييلة..

ما عندوش حتى مع اللغة.. يله جامع شي كليمات من لأفلام..
و هاز معاه كتاب..
كيف تتعلم الإيطالية بدون أستاذ في أسبوع..

تردد كثيير قبل ما يدير هاد لحركة..

و زاد زعمو لعدد دالناس لي لقاهم تما..

بجنسيات و أعمار مختالفة..

كلهم عندهم وجهة وحدة..

تار انتباهو.. واحد لمرأة نيجيرية بكرشها منفوخة قدامها..

و جنبها طفل صغير..
بسروال قصير و قبية باش يتخبا من برد السفر..

كانت كاتجابد  وسط الشباب و الرجال..
باش تقبط بلاصتها..
جارا وراها ولدها بيد..
و يد حاطاها على كرشها باش ماتجيش فيها شي دقة..

ما شعرش حتى كان هاز داك لولد و حطو قدامو.. مخفف عليها لحمل..
قالت ليه شي حاجة بلغتها..
لاكنو ما فهمهاش حدو حنا راسو و سكت..

الطريق للطاليان بقد ما طويلة بقد ما كاتسنا بلهفة إيمتا تسالي.....

لكن الخوف كان واضح على وجوه الراكبين فديك لفلوكا (ميني باطو كاتكون فلمرسا بزااف)
الصغيرة لي هازا تقريبا عشرين واحد..

كلهم مكمشين فبعضهم..

و شي جالس فوق رجل لي حداه..كايدفيو أجسادهم بقربهم من بعضهم..
أما حتى نفوسهم ملي كاتحط رجليها وسط لفلوكا كاتبرد لأقصى درجة متجهزة لمواجهة مسيرها..

لحاصول متقاصمين الصبر باش يوصلو للناحية الثانية..

الرايس لي سايگ بيهم جالس على لحاشية..
حداه لمساعد ديالو..