العروبي و عروس الريح

الجزء 22

🌾العروبي و عروسة الريح 🌾
💄الخنساء 💄

وقفات لوطو بعد مسافة..
حيث السرعة لي كانو غادين بيها ماسمحاتش ليهم يوقفو قبل..

نزل واحد فيهم كايدور فراسو..
ما قادش يوقف على رجليه..
و حوايجو گاع مسروطين عليه..
شاد گارو بين صباعو.. مامفرطش فيه

غي بانت ليه جتث شخص مرمية وسط الطريق..

رجع كايجري للوطو..
و قلعو هربانيين..
كأنها ذبانة مسحوقة..

فلحظات ارتكاب غلطة..

كاين لي كايصلح الغلط بما كثر منو..
ف:
المشكل ماشي غي فأنهم سكرانين.. و
المشكل ماشي فأنهم غي مامحتارمينش إشارات المرور..
المشكل فأنهم نساو حتى يعيطو على الإسعاف..
المشكل فأنهم خافو على ريوسهم.. و ما تحسسوش قيمة داك الدم لمدفق على الشارع..

وسط ديك الظلمة..
تسمعو أصوات خطوات كايجريو..
كان الإمام.. و معاه الناس لقلال لي بقاو..

هزوه فسيارتهم الخاصة..
مدام الإسعاف واخا يعيطو ليه دابا مايوصل حتاال غدا..

عاوتاني تحط جسد عبد الرحيم..
على ذاك السرير لي ما كايرتاحش عليه ظهرو..

عاوتاني قناع باش يوصلو لأوكسيجين..

عاوتاني يد طبيب محطوطة عليه..

حسنا فدارها نزلات كاتجري بعد ما جاها اتصال من التيليفون ديالو لي لقاوه فجيبو..
مخليا محمد بوحدو فالدار ناعس..
و خرجات بلا عقل..

حسنا كاتجري فالظلمة.. بجلابتها فيديها.. ما قداتش حتى تلبسها عليها

الإجراءات ولفاتهم..
بكثرة ما كاتجي معاه كل مرة..
غي هو هاد لمرة كانت غير..
كان خوف كبر من لي مخبي..

نقزات حتى عيات فلكولوار دالسبيطار و فلخر جلسات كاتسنا.. مخلياها فيد المولى..

كلشي من عندو...
و ما كتب لحاجة إلا و كاين وراها حكمة..

فأحلام وجدان..

كانت كاتشوف راسها فجلسة مع باباها..
غي هوما بجوج..

كان كايضحك معاها تماما بحال أيام الطفولة..

حتى شوية شاف فيها مقلق

وجدان:بابا... مالك؟

عبد الرحيم:أنا ثايق فيك أ بنتي... رجعي للطريق المستقيم و ديري عقلك..
غاتنجحي و غاتوصلي..
ما تخيبيش ظني..
عافا بنتي..

ما تسناش لجواب و كانت حلات عينيها..
حلمة قصيرة و غريبة عليها..

خلات قلبها يضرها..
كاتشوف فالسقف :شنو هادشي نتي فيه شنو هادشي؟
زعما أنا خايبة؟

و فجأة طاحت ذكرى فبالها..
ملي كانت صغيرة و كاتمشي للمدرسة..

كلشي كايضحك على حوايجها.. و تسريحة شعرها..