العروبي و عروس الريح

الجزء 29

🌾العروبي و عروسة الريح 🌾
💄الخنساء 💄

النجاح فأي مجال و أي حالة بعض المرات ما كايجيش بأنك دير بزاااف و تقدم تضحيات.. كايخصك غي تكون عندك الرغبة و هادشي بالضبط لي ما كاينش ف قاموس رجاء..

🔚

المغرب...

دازت ساعة و و جدان مزال جالسة فالجريدة الصغيرة دالسبيطار..
مسرحا رجليها قدامها و كاتفرج فيهم..

فراسها شلا مطارق.. أولهم كي غادير تبدل و هي كلمة جوج كاتشعل..
خايفة ماتكونش قد وعدها..

رشيدة صيفطاتها حسنا غي بالسياسة.. كاتبقا تنقز بلا فران..

حسنا جات جلسات حدا وجدان بعدما توادعت مع رشيدة و وصاتها على محمد..

حسنا:مالك؟ حالك ما عاجبنيش..

وجدان جاتها الضحكة.. ما كاتعرفش دوي بالهداوة مع مها.. مولفة ديما لغوات و لعصا أما النقاش مستحيل..
وجدان:والو..

حسنا:متأكدة؟

وجدان حركات راسها بآه..

حسنا كاتحاول تجر منها شي كلمة:كي داز سفركم واخا ما كملتوهش فراحتكم..

وجدان بخلاصة:مزيان..

حسنا :كيفاش مزيان؟شدرتو.. فين مشيتو.. آش شفتو.. ؟

وجدان هزات فيها راسها و رجعات جرات تيليفونها دخلات للتصاور عزلات لي بغات و صيفطاتهم ل حسنا فلواتس..
:هانا صيفطت ليك التصاور دخلي و غاتعرفي كي داز..

قالت هادشي و ناضت من حداها قبل لاتصدق كاتراد هي وياها عاوتاني..

حسنا:مشيتي؟! تا هادي مالها..
شمات ريحة بيطانها.. تگول عا هي لي مزوجة..

عوجات فمها.. و رجعات تكات على الكرسي..
طايح عليها الضيم..

حسنا مع راسها:غادي عا نطل عليهم.. گاعما نتفرج ف كلشي..

جبدات تيليفونها.. و دخلات تشوف آخر ما وصلها من وجدان..

حسنا:مصيفطا ليا ثلاثين تصويرة.. تباااركالله..
غانشوف عا خمسة باااراكا مانعيقش..

بركات على الصورة لولة..
و بقات كاتفرج..
كاتكبر الصورة حتى تشوف لي ديطاي لدرجة بنادم لي دايز من وراهمو شداتو لكاميرا كاتقرب لوجهو تشوفو..
ما تگعدات حتى كملاتهم كاملين..

حسنا؛ويلي حي تفرجت فكلشي..
و مالي شدرت گااع.. حيد عليا..باينا عليهم مواتين ربي يحفظهم..
نوض نشوف شواقع فداك لبيت.. خليت الراجل بوحدو..

ناضت غادا تشوف عبد الرحيم لي خلاوه بوحدو مع بوبكر..

وصلات وجدان قدام شومبر د عبد الرحيم..
و بقات واقفا كاتشوف فلباب..