العروبي و عروس الريح

الجزء 47

🌾العروبي و عروسة الريح 🌾
💄الخنساء 💄

حتى من لحزام تحزماتو و لغرامة فبلاصة ماتمشي لشيخات و لات كاتحط ليها..
بنادم مجموع على مت لعروسة لمفروحة.. لي ما بغا يشطح كاتشطحو صحة على قلبو..
حتى دخلات حسناء و معاها شيريهان يله جابهم بوبكر..
جراتهم من لباب لوسط لقاعة يزدحو معاها شوية..
شيريهان رجعات كي ماطيشا بلحشمة واخا كاضحكها الزاهية بلحركات ديالها..
أما حسنا كاتشطح بلقاعيدة.. و كاتعوج بالشوية عليها..

وداد سكتات حتى عيات و هي تهضر:ياكما هدى لي مقلقاك؟

سامية :هااا... لا لا.. علاش غاتقلقني

وداد:ما بقاش ليهم بزاف نتي مادرتي والو.. ماكانش مكتاب يكملو من لول..
و مدام جات لالة فاطمة إلا و قريب يساليو هادشي..

سامية:مافهمتش..

وداد:دابا تشوفي بعينيك و تعرفيني علاش داويا..
نوضي نوضي نشطحو شوية..

سامية:لا ماكانعرفش غي خليني

وداد:تي نوضي قالاك..

جراتها وداد صحة و حطاتها وسطهم..
جرات ميتين درهم علقاتها ليها فلحزام دتكشيطتها هوما يتبعوها صحابات الشيكي..
كلها جرات بزطامها و جاو يعلقو لعروسة..

سامية يديها عامرة حنة هازاهم لفوق و كاتحرك فبلاصتها..
شوية بالشوية بدات كاطلق معاهم..

وداد حداها لي كايجي يدوي معاها كاتبعد منو سوا عائلة ولا صحاب..
عارفاهم مايسواوش بصلة و مجموعين غي على الشر..

و هوما متلفين لوقت واحد لالة هدى كاتغدد.. باقا مصدومة..
كاتسمع فوذنيها صوت ضحك..
و ترجع تسمع صوت بكا..

حتى ناضت خرجات تالفة باغا تهرب من الأصوات لي مخلطين فدماغها...

فلاش باك🔙

بعدما هضرات هدى مع أشرف..
كان كايوجد ليها باش يتفك منها و هي كي لهبيلة تابعاه..

ليوم عبد الرحمان صبح عليها بأنه جاب فاطمة لعندها..
كانت ناعسة حتى حسات بشي حاجة تلاحة عليها..
و شكون غايكون من غير مها..

نوضاتها بلهلا يطريه ليها و سمعاتها خل وذنيها..
بلا والو كاترعد منها.. عاساك لا سمع باها لخبار غايدفنها فبلاصتها..

فاطمة:لحرام يا الجيفة.. لحرام..
ليوم خبارك توصل .. ليوم نبيتها عندو..
هادا مانسواو عندك.. صافي..

ماعرفاتش هدى كيفاش حتى خرجات لخبار و هي ماقالتها لحد..
نكرات حتى عيات فلخر سمعاتها فاطمة آخر حاجة توقعاتها..

تسجيل للمكالمة لي دازت بينها و بين أشرف..

هدى خبطات جنابها ملي شافت بلي النمرة لي مصيفطاه ديال طه:أويلي..
كحالت..