العروبي و عروس الريح

الجزء 1

🌾العروبي و عروسة الريح 🌾
💄الخنساء 💄

     🦈حصرياً على بحر الروكانات 🦈

البادية؛لعروبية؛لبلاد..كلها و كيف كايسميها ..
لكن فالأول و الأخير كتبقا قطعة من أرض وحدة
قطعة بجودها  نصبنا غدانا.. و ضيفنا حبابنا..
منها جا كل ما تتشها النفوس.. هاشمنك يا خضرا؛ ديسير؛فاكية و لحومات بلوانها و شكالها ..
الحاصول هي جنة فوق الأرض بخيرها هازا الرأس و مزينة الدنيا..

و مانساوش الحمد لله عليها نعمة راه كلشي بفضل المولى موجود..
العاطي يأمر و الساقية تسقي و الفلاح يقلب  تطلع لينا الغرسة تشهي غي من النظرة..

  العروبية هي الساس لي ضروري يكون عندنا فيها واحد الجدر مخبي
واجب نطلو عليه و نطبطبو عليه بين الوقيتة و ختها..
و على ذكر زيارتها راه :
كاين لي كايهرب ليها باش ينقي الروح وي ريح العين..
و كاين لي غادي غي على ود رضات الواليدين..
أما لي غادي بزز منو مانهضروش عليه ..
كايتعتر فجلايلو تقول التراب ليه قاتل و حنا گاااع مرجعنا ليه..
يخافو من الفلاح وي رجعوه بعبع الصبيان منعتينو بالعروبي
و مال العروبي عايب؟

عروبي بعنايتو على راسو جامعة شلا مقال و حكام..
و فلوسو فشكارتو بلا قلام و لا ميزان..
يدو على الفأس ينقب على الرزق.. كيف الشتاء كيف الصيف..
الموطور ديما خدام..
ليد ما تسخا بالتقلاب و التكربيل..

عروبي بالنفس الحارة..
و نيف لعگاد..
ينزلو قدام لحبيب وي ضرب بيه لعديان..
لي فجهدوا كايحطوا باش وقت الجني يفرح القلب و تفاجى النفس ملي يحسب الغلة وي لقاها كفات و وفات.. بحق كل قطرة من عرقوا..

كايشوفو الجلابة بلوانها للتراب محادية و لجروح على يدو نايما كايحسبوه قليل قلب ما يحس ما يشعر و الهم مايعرف ليه طريق..
و هو كيف الكوييس دفعيه يتشتت واااآش جاب ما يجمعوا..

صحيح هو بعيد على الرومانسية و ماشي من أهل لغرام و لكلام لملحون..
هادي غاتقولها غي لي ماعشرات و باقي ما شافت ما تشوفات..
حيث الرمانسية أشكال و أنواع كلها و كيف فاهمها بلحق فقصتنا غانتعرفوا عليها دقة دقة و نشوفو بالدليل و البرهان:

واش لعروبي قلبو قاصح حجرة و لا كايزدح للحب بخدودو الحمرة؟

أجي نتوما شكاتسميوها؟

.....
مدينة الجديدة
منطقة الغربة
هي منطقة جات تقريبا فالخرجا دالجديدة كاتعرف دمج بين بنايات الطبقة المتوسطة و بعض البيوت لي مزال متشبتين بالطابع القروي و أكيد دور الصفيح الحاضرة بشكل ضعيف بسباب التمدين لي غادي و كايطغى..

و داخل بيت بسيط مصبوغ بالأبيض مكون من جوج طبقات و  طبقة سفلية كلهت حوانت فيهم خضار و فارماسي شاد لي لمساحة لكبيرة بطول و  لعرض ..