العروبي و عروس الريح

الجزء 54

🌾العروبي و عروسة الريح 🌾
💄الخنساء 💄

كاياكل دغمة و كايعطيها جوج دغمات.. مسبقها هي لولة.. عارف لاخلاها تاكل بوحدها..
ما غاتهز راسها من التيليفون حتى يجمعو الطبلة..

بوبكر:آري هاداك تيليفون..

وجدان خباتو وراها:هانا كاناكل..

على صوت الدقان ناضت وجدان من على الطبلة تحل لباب..
كانت شيريهان لي عيطات ليها قبل.. كسيوا كيف لعادة و شال على راسها.. دايرا ساك صغير على كتفها..

سلمات عليها و دخلاتها فرحانة بيها..

وجدان:آش جاك يا حسنا تا سخيتي بيها..
الحمد لله طلقاتك ليا..

شيريهان تبسمات: حيث ما كاتكونش فالدار.. خاصها مسكينة لي يعاونها..
واقيلة جيت بكري؟ .. نرجع حتال لعشية

وجدان خنزرات فلبلاصة:من نيتك؟
زيدي گالاك.. و الله لا باقي طلقتك ليهم..

دخلاتها معاها لكوزينة.. كان أبو بكر مزال كايفطر.. لقات عليه السلام و جاوبها من بلاصتو محرك ليها راسو..

وجدان:گلسي تفطري..

شيريهان علقات صاكها على واحد لكرسي.. أما حتى حوايجها ما تبدلهم حتى تبغي تبدا الشقا:غي بالصحة فطرت قبل ما نخرج.. شنو ندير دابا؟

وجدان جلسات فبلاصتها:غاتخملي الصالون..
و تبدلي لفراش..

حركات شيريهان راسها بفهم يله غاتمشي و هي ترجعها وجدان كضحك:هبلتي لا..
عا لي گالوها ليك واخا..
تنفسي لك بعدا.. زيدي زيدي..

بوبكر كايسمع بلاما يهضر.. لا كانت مرتاحة ليها.. ما عندوش لحق يمنعها عليها
شيريهان غي كاضور فعينيها..
ما جاتهاش تجلس مع أبوبكر على نفس الطبلة.. كاتخلع منو غي فالشوفة.. هي مصاب ولفات سي عبد الرحيم حيت لمرض شفع ليه فعينيها أما أبوبكر راجل بحال غيرو لجنس لمكروه عندها..

استغل بوبكر التيليفون لي كايصوني.. باش ينساحب من وسطهم..
قبل ما يخرج طلات وجدان على تيليفونو.. حتى شافت شكون معيط و رجعات عينيها قدامها بلاما تعيق..

بوبكر:غانخرج و نرجع..

وجدان على لوراق :آنخلي هادشي حتى ترجع..

بوبكر عارفها مامفاكاش:إن شاء الله...

كيف خرج تلفتات وجدان لشيريهان لي ما كايناش معاهم..

وجدان :كاتعيط ما كاتبقا تطلقو..

شيريهان مافهماتش:هاا !

وجدان تداركات راسها :والو..
يله نوريك بعدا علاش عيطت ليك..

جراتها معاها لبيتها..
حلاتو و وسعات شيريهان عينيها..

لبلاكار كامل مخوي.. و لحوايج معمرين لأرض..
الصبابط هوما لخرين جابداهم أما السيكان خلاص..