العروبي و عروس الريح

الجزء 39

🌾العروبي و عروسة الريح 🌾
💄الخنساء 💄

المدير هز لوراق حطهم على جنب :
لمهيم هو الشباب.. لوراق ولاو غي مشتين هاد لوقت..
سي دكالي شي كويس دآتاي؟

بقا بوبكر غي كايشوف فيه.. لازاد غي عاماين طيح لمدراسة بلي فيها..
:مرحبا

خوا ليه لكاس و بقا لمدير كايدوي.. فهاد اللحظة فكرو غي بوجدان..
تقول مركب ليهم بريز دالضو..
ماكايتقاداوش..

المدير:كايعاودو على دكالة بلادها زينة..
ما تعرضناش شي نهار نشوفوها؟

بوبكر ما لقا مايقول من غير يرحب بيه:مرحبا.. لوقت لي عجبك

بقا معاه مدة.. غي فلهضرة..
عاد ناض بوبكر..

المدير:لوراق كيف يوجدو نعيط ليك نعلمك كون هاني..

بوبكر:إن شاء الله..

المدير:و ماتغبرش علينا..

بوبكر:يكون خير..

خرج بوبكر كايضور فراسو... خرج تيليفونو كايشوف الاتصالات د وجدان و الزاهية مطرطقين التيليفون..

دوز لوجدان هي لولة مع مامولفاش ليها تعيط ليه خلعاتو..

بوبكر:ألو السلام عليكم

وجدان دغيا جاوبات :السلام.. فينك؟

بوبكر:كان عندي شي شغل نرجع و ندويو.. مالك ياكما واقعة شي حاجة؟

وجدان:لا.. غي سولت و صافي..

بوبكر:محتاجة شي حاجة نجيبها معايا؟

وجدان:لا ولا عرفتي..
طرق بيم و ملي توصل عاود عيط ليا..
نقول ليك شنو تجيب

بوبكر:غي گولي دابا..

وجدان:لا لا غاتنسا.. حتى توصل و عيط ليا..

بوبكر:ناوية ديري لحفلة ليوم..
واخا أ لالة.. نوصل نعيط ليك..

وجدان بفرحة:و ماتعطلش.. هانا كانتسنا.. بااي

بقا كايشوف فتيليفون شحال و ديك باي عصباتو.. :السلام عليكم

نطقها و قطع.. وجدان وا لاحت التيليفون بعد باي.. ماعرفاتو آش قال..

رجع دوز الخط ل الزاهية.. حتى هي بحال وجدان على القرص.. غي صونا أول مرة فتحات لخط..

الزاهية ناشطة.. كادوي بالزربة خاصها غي تعلمو بآخر ما قررات عاوتاني
:هالو.. وليدي

الزاهية:هالو ولييدي.. ها كيداير لاباس.. ياو كلشي على خير..

بوبكر متوقع شغاتقول ليه:الحمد لله و نتوما

الزاهية فخبارها السيناريو لي داز مع مصطفى و عارفاه قرب يجي عندهم و واخا هاكاك جالسة تسول فيه
:أجمع كلشي و گول على خير.. ها وليدي ما جايشاي؟