العروبي و عروس الريح

الجزء 40

🌾العروبي و عروسة الريح 🌾
💄الخنساء 💄

طلع حداها و هي تقطع لفيديو..
ماوقفو حتال حدا الدار..
دخلات وجدان هي لولة كاتنقز فالدروج مع عندها الساروت غي كاتحل و كادخل مدرمة..

وجدان كاتعيط فالدروج:مااامااا... هااانا جيت..
مااما..

حسنا كانت ناعسة قفزات من بلاصتها كاتنهد عرفاتها لمصيبة ديالها جايا بصداعها..
ناضت على وجه بوبكر دير معاه الصواب..

حسنا لوجدان :هانا لفوق.. و بالشوية

شيريهان جلسات فالسداري لي حدا حسنا كانت حتى هي متكية كايتصنتو لعظامهم :نعمر آتاي أ خالتي؟

حسنا كاتجمع شعرها و جرات زيفها لاحتو:نديرو قهوة معطرة بلعشوب يله جبتهم غي الصباح.. ريحتها بعدا تلفاتني..

وقفات شيريهان غادا توجد تصادفت مع وجدان تبادلو السلام من بعيد و دازت
:واخا.. أنا نوض نوجد الطبلة

دخلات وجدان عندهم :هااانا جييييت

حسنا:تي ماتسلميش؟

وجدان:يله دويت معاك عا الصباح.. توحشتيني ولا كيفاش.. ؟فين بابا؟

حسنا:والايني صواب هو عندك.. غي توحلي عيطي ليا و شوفي لاجاوبتك عكري ليا بلعكر لفاسي..

وجدان قربات سلمات عليها بالزرية و رجعات:هانا.. يله فين بابا؟

حسنا : كامونية مع راسك.. راه عاد نعس.. فوتيه عليك..
و فين وليدي بوبكر؟

هزات وجدان كتافها.. و قربات للطبلة كانو حاطين طبسيل فيه لفاكية مخلطة متكين و كايدوزو بيه لوقت..
:خليتو لتحت.. شوية وي طلع..

حسنا :فين لتحت؟
تي نوضي شوفي الراجل

وجدان كاتاكل:تا مالو غايتوضر.. دابا يجي..
.....
ناضت حسنا تشوف بوبكر:عا نبيعت هاد لولد معاك..
ماتمشي تا تقتليه..

وجدان خرجات عينيها كاتشرح:دابا مالي شدرت ليه.. راه خليتو لتحت.. عجبو غايطلع ماعجبوش ماغايطلعش..
مالي أنا فهادشي..درت شي عيب!

خلاتها حسنا وراها كاتشرح و زادت كاطل فالدروج.. ماسمعاتش الحس..
رجعات طلات من الشرجم بان ليها حال لكوفر و لباب كايقاد شي حاجة..

رجعات حسنا عند وجدان:نوضي شوفي الراجل.. تي عا حدرتي راسك و جلستي..
تي نوضي عند وليدي بوبكر

وجدان كاضور فعينيها بملل:سميتو أبو بكر.. ماديريش ليا بحالهم..
و عنداك تگولي لشي حد سميتو بوبكر راها أبوبكر

حسنا:آيه آيه.. عا تگعدي..
و مال بوبكر فنة..

وجدان:ماااما

سمعو صوت الدقان فباب لفصيل.. واخا محلول.. مادخلش حتى يدق وي عطيوه الإذن..

رسمات حسنا ابتسامة عريضة على وجهها و ناضت عندو.. مخلية وجدان غي كاتشوف عاد دابا كانت كاتغوت عليها و قدامو كاترجع الحنان و الظرافة..