محمد: كدي هسي نادي لي البنات
خديجه: داير بيهم شنو؟ ولا حتقول لي كمان داير تاخد رايهم؟
محمد: اي
خديجه: اجي يااا اخواني اها لو قالولك ما تعرس حتسمع كلامهم
سعاد: يا خديجه البنات من حقهم يعرفو
خديجه قامت على حيلها ووقفت قدامو: يعرفن اي لكن ما يقولن رايهم، اسمعني يا محمد البنات ديل بي دلعك ليهم دا بعد شويه بركبن ليك في راسك وتقول خديجه قالت
طلعت من العريشه وهي بتنقنق
جمان: ريناد هوي بطلي خرخره هسي مش كلابك ديل كلهم كانو جوا
ريناد: يا بت هي جوا كيف يعني قبيييل انا طلعتهم وحججتهم باقي واحد بس
عاينا الاتنين باتجاه مرام
جمان: يا بت هي دورك
مرام : هاا طيب
جمان: سرحانه وين كنتي
ريناد: دقيقه خليني اخمن، سرحانه في علووبي
مرام ضربتها في كتفها: علوبي في عينك ما سرحانه ولا شي نعست بس
جمان: بالجد عيني في عينك كدا
مرام احمرو خدودها ونزلت راسها
انا وريناد بقينا نضحكك وهي ضحكت معانا
حضنتها وانا لسه بضحك: اوووخ افدي الضحكه دي
ريناد وهي بتدافر معانا: دخلوني معاكم يااخ
جمان: لينا زمن ما ضحكنا كدا
مرام: ولا عملنا الحضن الجماعي بتاعنا
اعتدلنا في قعدتنل لمن شفنا عمتي داخله وقمنا من الارض
خديجه: تلعبن قلتن لي
جمان: قلنا نفرق شويه
خديجه: ابوكم دايركم تعالو وراي
مرام لمت الليدو من الارض ومشينا كلنا وراها طلعنا من الغرفه ومشينا في الحوش لحدي ما وصلنا العريشه كان فيها ابوي وعمتي سعاد ، عمتي خديجه قعدت ونحن قعدنا في السرير القصاد ابوهم
جمان: خير يا ابوي قلت عايزنا
محمد عاين لي اخواتو بعديها قامو وخلونا معاهو
ابوي عاين لي: الجامعه كيف؟
جمان: تمام نازلين امتحانات بعد اسبوعين
محمد: بالتوفيق ان شاء الله (عاين لي مرام) اها يا السمحه قالو امتحاناتكم شهر ٦ قاعده تقري كويس؟
مرام: بعمل العلي غايتو يا ابوي والباقي على الله
محمد: ونعم بالله (عاين لي ريناد) وانتي يا الشويطينه خبرك شنو
