طلعت من الامتحان وانا ما فاهمه اي شي ولا عارفه اشتغلت كيف طلعت من قاعة الامتحان طوالي مشيت على البوابة اول ما طلعت لقيتو في وشي جا علي وقال لي ياسمين الحاصل شنو؟؟ قلت ليهو شنو؟ قال لي من امس بتصل ليك ما بتردي علي ووشك مالو عامل كدا الامتحان كان صعب؟ قلت ليهو لا.. قال لي في شنو قولي ما تقلقيني، قلت ليهو مافي شي يا امير تعبانه بس.. قال لي طيب تعالي اوصلك ، قلت ليهو بتاع الترحيل جاي ، قال لي اتصلي ليهو خليه يرجع.. قلت ليهو امير انا ما قادرة اتكلم عايزه اصل البيت بس وانوم، قال لي مصرة ما توريني الحاصل ليك شنو.. ما رديت عليهو وقف معاي لحدي ما ركبت، اتكلت براسي على الشباك وسرحت... وصلنا، رفعت راسي وقلت ليهو ها؟ قال لي وصلنا يا بت مالك انتي الليله..
دخلت غرفتي وقفلت الباب علي اخدت نفس طويل وانا مغمضه عيوني... رقدت في السرير بنفس ملابسي تاني ما حسيت بي شي.. صحيت بصوت ضرب في الباب لمن قمت يدي الشمال كانت واجعاني عشان راقده غلط قلت ظافر؟ فتح الباب وخشا قال لي دا كلو نوم؟ قلت ليهو الساعه كم قال لي العشا قعد يأذن في ضيوف برا تعالي.. قلت ليهو منو ؟ قال لي تعالي شوفي براك.. قلت ليهو خلاص استحمى واجي قال لي ما تتأخري..... لمن طلعت لقيت خالتو رنين وعمتو نجوى في الصاله سلمت عليهم وانا ما مصدقه عيوني عمتو نجوى قالت لي يخسي عليك يا ياسمين يخس.. قلت ليها معاك حق والله، خالتو رنين قالت لي والله لو في زول مفروض يلوم التاني ف هو انتي نحن الما سألنا تاني بعد مشيتي، عمتو نجوى قالت هي زااتا نستنا.. قلت ليها والله كل يوم في بالي ما نسيتكم .. عمتو نجوى قالت لي ابوك جا معانا مشا الصلاه هسي، عاينت لي ظافر وقالت قصدي إيهاب.. قلت ليها ابوي جا معاكم؟؟؟ قالت لي اي، قلت ليها جا متين من شندي قالت لي جا الليله وقال الا يجي يشوفك.. بقيت منتظرة متييين الصلاه تنتهي عشان اشوفو لمن الجرس ضرب ظافر قام قمت سريع وقلت ليهو انا بفتح جريت على الباب اول ما فتحتو وشفتو دموعي جات جارية قال لي بتي الرايقه💙 دخل وسلم علي قعدت ابكييي في حضنو.. جا في اكتر وقت انا محتاجه ليهو، دخلنا وهو محاوطني من كتفي وانا من نصو قال لي انا زعلان منك قلت ليهو اليزعل من التاني منو بس وريني؟؟؟ قال لي نتحاسب وحده بوحده.. ضحكنا الاتنين عمتو نجوى قالت ليهو مالك اتأخرت قال ليها ما لقيت مسجد قريب.. عملت ليهم شاي بالبسكويت ابوي قال لي كيف مع الجامعه قلت ليهو الحمدلله شغالين امتحانات السمستر الاول ، قال لي كويس والله يارا برضو شغاله بتنتهي الاسبوع دا حترجع معاي .. قلت ليهو كيف هي ؟ قال لي كويسه الحمدلله ، قلت ليهو وناس بيتنا هناك امي وياسين وسليم.. قال لي كلهم كويسين ما عندهم عوجه وبسلمو عليك، سليم جا معاي اشتغل هنا.. قلت ليهو الله يسلمهم.. قال لي كل مره بقول ما بتصل ليك واجي مخصوص عشان اشوفك لكن المشغوليات ما مدياني فرقة قبل يومين قلت لبتاع المصنع لو ما اديتيني اجازه ما داير الشغل دا زاتو، قلت ليهو ربنا يعينك يا ابوي.. قال لي قبل نسافر جيت يوم بيتكم داك قالو في الجامعه سألتهم بترجعي متين قالو بتتأخري .. قلت ليهو متين دا؟ عاينت لي ظافر قال لي انا زاتي ما كنت عارف.. ابوي قال ما كان في زول غير حجه ريان ووحده من بناتها.. عاينا لي بعض انا وظافر قال ليهو بكونو ما اتذكرو بس... الجرس ضرب تاني ظافر قام جا خاشي بعد شويه معاهو ايمن لمن شفتو دموعي جات طرف عيوني عاين لي مسافه قبلت منو وعاينت لي ابوي، قال السلام عليكم.. قالو ليهو وعليكم السلام سلم عليهم وقعد ظافر قال ليهم دا ولد خالي وولد عمتي ايمن، قال لي ايمن دا راجل خالتها لي ياسمين كانت قاعده معاهم قبل تجي هنا.. ايمن قال ليهو مرحب بيك، ايهاب قال ليهو يديك العافيه... بقو بتونسو هو وابوي وظافر وانا مع خالتو ريان وعمتو نجوى بالي ما كان معاهم كل ما ارفع عيني عليهم بلقاهو بعاين لي القعده كلها ما نزل عيونو مني قلت بنفسي "ذرة خجل ما عند و شايف ابوي وظافر قاعدين وما داير ينزل عيونو" لمن قامو طالعين ظافر قال ليهم الا تبيتو لكن رفضو قلت لي ابوي طيب خليك انت عليك الله يا ابوي ما تمشي النبي، قال لي بجي يوم قبل اسافر اسوقك تقيلي معانا ان شاء الله.. قلت ليهو ابوي💔 قال لي ياسمين ما بنفع بياته والله... قدمناهم لحدي الباب ظافر كان عايز يوصلهم لكن قالو جايين بعربية مؤيد بعد مشو دخلت غرفتي وقعدت ابكييي اتمنيت ابوي ما يمشي لسه ما شبعت منو ومن كلامو.. باب غرفتي كان فاتح ظافر قال لي حبيبتي تعالي اعملي لينا قهوة.. مسحت دموعي لمن انتبه لي جا خاشي قال لي عارفك مشتاقة ليهم لكن لو حتقعدي تبكي ما بخليهم يجو تاني.. قلت ليهو شنو؟!! قال لي زي ما سمعتي.. قمت عملت ليهم القهوة ودخلت تاني... فتشت شيتات الماده الجايه وقعدت اشخبط وانا خاته يدي في خدي بعد مسافه جمعت شتات افكاري وبديت.. نعست بعد مسافه ما طويله قلت بسم الله هسي انا صحيت مالي نعسانه، قدر ما حاولت اركز ما قدرت ظبطت المنبه على ٣ ورقدت.. كان في مكالمات كتيرة من امير ومكالمه من ايمن قبل ربع ساعه..
