يارا يا بتي قومي عليك الله اكلي ليك لقمة ما ممكن قاعده من اول امس بلا اكل.. كانت راقده ومغطيه راسها بالمخده قالت ليها وهي في نفس وضعها: امي عليك الله خليني قلت ليك ما دايرة، ياخ خلوني في حالي ياخ... بعد كل محاولاتها البائسه جرت المخده وكوركت فيها: لمتين يعني حتقعدي بحالتك دي؟؟ ياسمين هي الاختارت تمشي وتخلينا وهسي بتكون راقده في احسن سرير وماكله احسم اكل، حتستفيدي شنو من رقدتك دي، قايلاها حتجيك راجعه لو عملتي كدا؟؟ يارا قبلت وشها على السرير وبقت تبكي، جمان اتنهدت وقعدت جمبها وهي بتمسح على ظهرها قالت ليها ما براك زعلانه على مشية ياسمين كلنا غالبانا قعدة البيت مع انو ما عندها كلام كتير ولا بتجوط البيت زيكم لكن فاقدنها شديد💔قومي الله يرضى عليك يا بتي قومي ما توجعي قلبي.. يارا قامت مسحت دموعها وقالت ليها كذابين كلكم، لو فاقدنها ما كنت خليتوها تمشي.. جمان قالت ليها دا ابوها يا يارا من حقو يجي يسوقها في اي وقت، يارا قالت انا ما قادرة استوعب ما قادرة كيف حصل دا كلو في يومين ما قادرة اصدق انو ياسمين ما اختي ما قادرة اصدق انها خلاص مشت من البيت دا💔 جمان قالت ليها ياسمين اختك وحتفضل اختك العمر كلو ووقت ما عايزه تشوفيها بتقدري تشوفيها، يارا قالت ليها ما دايرة اشوفها هي المشت وهي البترجع براها لو دايرة....
يارا قامت وجمان قامت وراها اتفاجأت لمن شافت ايهاب واقف ومتكل في الباب ربت على كتف يارا وباسها في راسها بعدين طلعت، ايهاب دخل وتاكا الباب قالت ليهو ناسي حاجه في البيت ولا شنو؟ قال ليها دا شنو البتقوليه للبت دا يا جمان؟؟ بتحرضيها على اختها؟ قالت ليهو ايهاب انا ما قصدي احرضها انت عارف كدا انا قلت ليها الكلام دا عشان تقوم بس ما شايف حالتها دي انت؟؟ ايهاب قال ليها بي حدة: برضو دا ما سبب يخليك تقولي الكلام دا بدل ما تحنني قلبهم على بعض بعد افترقو دايرة تضاديهم؟؟ قالت ليهو قول بسم الله يا ايهاب معقول تفكر فيني بالطريقة دي؟.. قال ليها انا بفكر بالشايفو وسامعو.. طلع ورزع الباب وراهو قعد في الصاله لحدي ما يارا جات بعد صلت قال ليها البسي عشان نمشي نسجل ليك، جمان قالت ليهو سليم مالو لحدي هسي ما جا؟ قال ليها ما عارف.. قالت ليهو يقعد في بيوت الناس لمتين؟ وصاحبو دا انت بتعرفو كويس؟ ما رد عليها نادا يارا قال ليها البسي سريع خلينا نتخارج من البيت دا..
_ _ _ ____
وقفت لمن قال لي انا برضو حاسي انا شفتك في مكان، قبلت عليهو قلت ليهو ايوه شفتني، في حفلة رأس السنه.. قال لي اتذكرت، ظافر جا لقاني واقفه قال لي مالك؟ قلت ليهو ماشه الغرفه قال لي طيب زي ما وريتك بعد الفطور حنطلع على المول ومنها حنمشي البنك نفتح ليك حساب، انتي جايبه مستنداتك كلها صح ؟ قلت ليهو اي، قال لي ظريف..
طلعت فوق وظافر طلع معاي قال يشوف امو ..قبل ما ادخل غرفتي ران جات طالعه من الغرفه الجمبي قالت لي اوه ياسمين، تعالي معاي افرجك على غرفتي.. دخلت معاها كانت نفس نظام غرفتي بس ديكورها لونو ازرق قالت لي لو ما عندك حاجه عايزه تعمليها احضري معاي الفيلم، لمن شفتيني طلعت كنت عايزه اجيب مكسرات واجي احضرو.. قلت ليها ما عندي شي، قالت لي فاين خليك هنا حاكلم مارينا تجيبهم لينا اوكي؟ قلت ليها تمام.. كان في مسند في الارض على شكل دبدوب شكلها كانت عايزه تقعد فيهو وتحضر قعدت في طرف السرير لمن جات قالت لي عايزه تقعدي في السرير ولا اجيب ليك مقعد زيي؟ قلت ليها لا بقعد هنا ما تتعبي نفسك.. مشت جرت المقعد من جمب الكومدينه وختتو جمب حقها قالت لي الموضوع ايزي يا عزيزي مش بقولوها كدا؟ ضحكت وقلت ليها اي.. قعدنا وجات مارينا جارة تربيزها واطيه ختتها قدامنها طلعت تاني جابت صحنين زي السكرية لكن كبار جات وحده تانيه شايله اتنين برضو ختوها في التربيزة وطلعو كانو صحنين فستق وصحنين مشكلين .. ران طفت الانوار شغلت اضاءة خفيفه حتى جات قعدت فتحت الفيلم وشالت صحن الفستق اتلكت على السرير وبقت تحضر، ما عرفت نوع الفيلم شنو في نصو كدا قلت ليها دي ياتو لغه؟ قالت لي اسباني... الفيلم كان عن عصابة سرقه وانا اندمجت فيهو واتكلت زيها لمن انتهى كنت لسه مبحلقه في الشاشه قالت لي عجبك؟ قلت ليها حلو شديد.. قالت لي اذا بتحبي النوع دا من الافلام عندي مسلسل في فلاشه بديك تحوليه لكن ما اعتقد انك ما تكوني حضرتيه للان، قلت ليها اسمو شنو قالت لي لاكاسا ، قلت ليها ما حضرتو قالت لي حظظك انا من النوع الما بقدر يحضر الحاجه اكتر من مره هسي في ناس كتيرة عادتو لأنو رهيب شديد.. قلت ليها شوقتيني احضرو قالت لي جيبي لابتوبك احولو ليك هسي، قلت ليها ما عندي لابتوب، قالت لي ما مشكله خالو ظافر حيجيبوا ليك بعدين بالمناسبه حتلبسي شنو؟ عاينت ليها باستغراب قالت لي للمول، قلت ليها ااا ما عارفه غالباً عبايه.. قالت لي ما بتلبسي غير العبايات؟ قلت ليها بلبس، قالت لي ما اعتقد ملابسي تنفع معاك لكن ما تلبسي عبايه اذا عندك فستان ظابط البسيه.... سمعنا صوت قامت شالت تلفونها قالت دا المنبه مفروض ادخل اخد شاور البث باقي ليهو اقل من ساعه... قمت وقلت ليها شكراً ليك على الفيلم، قالت لي that's no thing ..
