دا بارت تاني حسب طلبكم، تاني يومين ماف زول يسألني من بارت🌞🔪
الماضي..
رزع كرسي البلاستيك ومشا على الباب قلت ليهو دا الانت فالح فيهو تتهرب من النقاشات بس.. وقف قبل وجا علي قال لي انا بتهرب لكن انتي عقلك بطير وبتقولي كلام برا راسك، عاين لي مسافه وطلع قعدت وانا دمي بغلي بدل ما يعتذر لي جاي يحاسبني.. يارا بقت تبكي شلتها وقلت ليها شايفه ابوك دا بعمل شنو؟ جنو يزعلني ويخت اللوم علي ويطلعني انا غلطانه ، يارا قعدت تضحك قلت ليها انتي هسي بتضحكي ليه فرحانه عشان انا ابوك متشاكلين هممم.. بقيت بكلكها بي وشي في بطنها وهي بتضحك
كان واقف جمب الكافيه اول ما شافو طالع مشا عليهو ماجد استغرب لمن شافو ايهاب قال ليهو داير من مرتي شنو، قال ليهو ايهاب قول بسم الله تعال ادخل خلينا نتفاهم جوا.. اتفاهم معاك ليه؟ في شنو بينا عشان نتفاهم فيهو انا جيت اقول ليك كلمتين ووشك دا ما داير اشوفو تاني اسمع كلامي دا كويس جمان اختاها سامعني؟ لو شفتها في الشارع دا سلام الله ما تديه ليها فاهم؟؟.. ماجد قال ليهو ايهاب اسمعني انا عارف انو اول مرة اتلاقينا فيها ما كانت ظريفة ابدا لكن دا ما بعني انك تضاديني عشان الحاجه دي اصلا جمان انا شلتها من راسي من لحظة عرفت انها بتريدك وما عندها حاجه لي ..ولمن شفتها قبيل واقفه زي داك في الشمس وقفت ليها عشان خاطر العشرة الكانت بيناتنا وعشان اريحك ما كنا برانا كانت معانا خطيبتي.. ايهاب قال ليهو خطيبتك؟؟ قال ليهو اي خطيبتي انت قايلني حاوقف حياتي عشان وحده متزوجه حالياً وباولادها؟؟ على العموم انا ما داير تكون في حساسية بيناتنا عشان قصة قديمه انا ما عندي فيها ذنب ولا حتى جمان... ايهاب كان ماشي ماجد وقفو قال ليهو ما حاخليك تصل لحدي باب الكافيه بتاعي وترجع ساي اتفضل معاي دايراك في موضوع انا زاتي..
بعد ايهاب مشا تاني ٣ شهور ما جا ولا اتصل كان برسل مع مؤيد المصاريف.. رهام قالت لي انتي ايهاب دا عارفنو زعلان منك لكن ما يجي يشوف بتو دي شينه منو عديل والله الزمن ة كلو ما يسأل منها، يوم بالصباح ريا صحبتي اتصلت لي قالت لي وين انتي يا بت الولاده بتبقي الزول مفتري كدا؟ قلت ليها الحمدلله يا ريا بس يا ريتو لو كان افترا.. قالت لي اخبارك شنو البنات وايهاب كلكم كيف.. قلت ليها كويسين كلنا الحمدلله انتي كيف ليك شهر قلتي بتجيني لي هسي ما ظهرتي.. قالت لي والله يا جمان الشغل ضاغط علي شديد نفس ما لاقياهو، قلت ليها بس العاملو فيك الشغل دا عاملنو فيني بناتي ، قالت لي بري والله الشغل مواصلات وقعده واحده اليوم كلو لحدي المغرب وتاني ترجعي لزحمة المواصلات انتي حوامتك كلها جوا البيت .. قلت ليها سمح بعدين بذكرك بالكلام دا ان شاء الله بس اول خلفه ليك تكون تيمان.. ضحكت و قالت لي كدي نعرس اول، قلت ليها اها سامر ما جا؟ .. قالت لي بجي نهاية الشهر الجاي بعد داك حنحدد العرس طوالي قلنا مافي داعي للخطوبه والجرجره دي اصلا نحن خطبنا روحنا لي بعض اكتر من ٥ سنين.. ضحكت وقلت ليها احسن ليكم والله... قالت لي صحي عايزه اقول ليك شنو رؤى دفعتنا عرسها الليله اتصلت لي امس عزمتني وقالت لي اتصلت في رقم جمان وما ردت قلت ليها اي هي غيرت رقمها المهم قالت لي كلميها... قلت ليها ياتا دي ما اتذكرتها.. قالت لي جمان قولي بسم الله الكانت معانا في بحث التخرج.. قلت ليها ااااا اتذكرتها.. قالت لي بجيك بعدين ٨ كدا خليك جاهزه، قلت ليها بري يا بت انا ما عندي طريقة مشيه.. قالت لي ليه ليه؟؟ قلت ليها والله ما بقدر مع البنات ديل يا ريا ياسمين بتنوم العصر وبالليل بتعذبني بتصحى كم مره.. قالت لي جمان ياخ النبي ارح لو ما مشيتي انا ما حامشي البعلق وبضحك وبرقص معاي منو، قلت ليها امشي ساي والله انا ما عندي اااااي طريقه.. قالت لي ايهاب ما بقدر يمسكهم ليك يعني؟ قلت ليها انا في بيتنا، قالت لي طيب ما كدا كويس جويريه وريناد ورهام ديل كلهم بمسكوهم ليك.. قلت ليها ما بسكتو لي زول غيري انا وابوهم وريناد بالزات بالليل دا وريناد لو قتلتها ما بتساهر تمسكهم لي.. قالت لي خلاص اتصلي لي ايهاب خليهو يجي يبيت عندكم يمسكم ليك مش قلتي يارا ما بتصحى بس خلي ياسمين معاهو.. قلت ليها لا ايهاب ما حيجي.. قالت لي انا بتصل ليهو وبكلمو عليك الله عليك الله يا جمان حلفتك بي بناتك الأتنين، قلت ليها واي من لياقتك يا ريا خلاص كدي بشوف جويريه لو بتبيت بي جاي بمشي كان ابت كمان خلاص.. قالت لي سمح سمح يلا عايني رايك شنو اجي البس عندك وبالمره اظبط ليك ميكب ظريف، قلت ليها انتي مالك رغايه كدا خلاص تعالي.... بعد الفطور مشيت لي جويرية كلمتها بموضوع الحفله قالت لي ما عندي مشكله حليمه قالت لي خبارك المره دي قعدتي كتير كدا ما تكوني متشاكله مع راجلك، قلت ليها زهجتي مني ولا شنو.. قالت لي لالا يا بت بسأل ساي خلاص سكت.. جويريه قالت لي ما تشتغلي بيها قلت ليها اصلا امك دي انا ما شغاله بيها.. وقعدنا نضحك بعد رجعت اتصلت لي ايهاب مرتين ما رد علي رسلت ليهو في الواتس كلمتو اني ماشه رسل اليد البتعمل اوكي 👍 في نفسي قلت مستخسر فيني كلمه اي.. اه انا مالي اصلا بكرا حاتصل ليهو واخليهو يجي عشان يتكلم مع ابوي.. بعد المغرب اتفاجأت بيهو جا، كان حالق جديد ولابس جلابيه.. حاولت ما اعاين ليهو عشان ما اسهي فيهو ..قال لي بمسك البنات لحدي ما تجي قلت ليهو ما كان في داعي كنت حامسكهم لي جويريه وريناد قال لي وقت رسلتي لي كنت في عقد عشان كدا اختصرتك، وانتي عارفاهم ما بسكتو ليهم المهم امشي عرسك وانا بمسكهم بعد تجي برجع، قلت ليهو ترجع كيف انا حارجع متأخر.. قال لي وجودي مضايقك لدرجة ما كنتي دايراني اجي.. قلت ليهو انا ما قلت كدا وانت اصلا ليك كم شهر ما شفتهم ولا سألت منهم.. قال لي منو القال ليك ما سألت كل يوم بتصل لي ابوك وبسألو من احوالكم.. قلت ليهو خلاص تمام انا ما عايزه اتناقش هسي واخرب مزاجي، قال لي يكون احسن..
