٢٢ رمضان .. كانت تاريخ الرجوع في التذكرة الشفتها في يدي يوم فاجأني ايهاب، طلعنا من المطار وانا حاسه اني انسانه تانيه، بعد ١٥ يوم كانو احلى ايام في حياتي ، طول عمري كان نفسي امشي عمره وافضي كل الفي قلبي قدام الكعبه وقدام ربنا ،كان نفسي اصلي ركعتين في الروضه الشريفه واشم ريحة المسك الكان بحكو بيها، كان نفسي ازور المدينه واشوف اهلها الطيبين والكريمين ، كان نفسي ابكي في الحرم والمطر يغسل لي دموعي والحمدلله كلو اتحقق والاحلى انو اتحقق مع اكتر انسان انا بحبو في الدنيا دي.. الساعه كانت ١٢ ظهر، ايهاب كان جاري شنطتين وانا جاره واحده وشايله شنطه في يدي، سعيد ومصطفى لمن شافونا جو سلمو علينا شالو مننا الشنط ورفعوها العربيه ، الطريق كلو كان بسألونا عمرتكم كيف ومالكم ما قعدتو وما كان تصومو الليله ووو. انا كنت نعسانه شديد وبهز راسي بس ايهاب لمن شافني ما قادرة افتح عيوني تكّل لي راسي على كتفو وقال لي نومي الطريق طويل..صحيت بحركتو قال لي يلا وصلنا دخلنا سعيد قال لينا ديل كلهم نايمين، دخلو معانا الشنط ونحن استحمينا وصلينا وطوالي نمنا ،كنت ظابطه المنبه على الساعه ٣ونص قمت صليت ودخلت المطبخ اشوف في شنو اعملو بقيت شغاله ما طلعت الا قبل المغرب بربع ساعه صحيت ايهاب وبقيت بجهز جاني قال لي صحيتي بدري شكلك قلت ليهو يعني ما بدري قال لي يا سلاام عامله لينا ملاح روب الليله اشتقنا لاكل بلدنا ياخ، قلت ليهو عشان ما عندي وقت اخف حاجه .. سمعنا صوت الجرس ايهاب مشى فتح الباب سمعتو بقول اهلاً اهلاً بالبطل ، طلعت من المطبخ لقيتو شايل ولدو ومؤيد واقف جمب الباب، سلم علي وطلع ،قلت لي سليم ازيك يا حلو نورتنا ،ايهاب قال لي مؤيد قال ناس خالتي سُهاد وخالي صلاح جو .. بعد جهزت الصواني ايهاب اداني سليم وشال صينيتي اول نزلها لي بعدين جا شال صينيتو طلعنا سوا لقيتهم كلهم في الحوش، خالتو سهاد وبناتها لميس ولمياء ، ومرت خالو اسمها صفاء وبناتها تلاته حسناء وحنان وحور، سهاد عندها ولد وصفاء ولدين طلعو مع الرجال، نزلت سليم وسلمت عليهم كلهم ، صفاء قالت لي قالو جيتو الليله اها عاملين كيف تكونو تعبانين كمان، قلت ليها الحمدلله ياهو تعب السفر، قالت لي ان شاء الله دعيتي لينا، قلت ليها اي ما نسيت وصيتك دعيت ليك، ضحكت قالت لي بركه الاتذكرتي، حور قالت لي ودعوتي اوعك بس تكوني نسيتيها قلت ليها انتي كل يوم بتذكريني ليها في الواتس انساها كيف بس ، قعدت تضحك قالت لي كنت برجعك تاني لو نسيتي.. لمن المغرب اذن نزلنا في الفرشه بعد فطرنا وصلينا قعدنا نتونس وحجه سيده نهائي ما اتكلمت معاي ، لمن عرفت نحن مسافرين زعلت وقالت لي ايهاب كيف ما تسوقني ايهاب قال ليها جوازك منتهي ولحدي ما نجددو موضوع لكن بقدم ليك للحج، برضو ما رضت وكانت كل ما تشوفني بتقرب تاكلني بنظراتها، نجوى قالت لي ارحكي نلم العده ، قمت لميت معاها والباقين دخلو جوا مشينا المطبخ قالت لي واي العده دي كتيره ياخ، قلت ليها انتي اعملي القهوه وانا بغسلها قالت لي لالا والله ما بتغسليها براك ، قلت ليها ما مشكله والله بغسلها ، بقت تحلف وانا احلف جات حور قالت لينا هي مالكم تتشاكلوا ، نجوى قالت ليها جمان قالت بتغسل العده براها، قالت لي خلاص بغسلها معاك ، بقينا نغسل ونجوى تعمل في القهوه، قلت لي حور امتحاناتكم متين قالت لي شهر ٦، نجوي قالت ليها انتي غايتو ولا بتقري الله ينجحك بس، حور قالت انا زاتي ما عايزه شي غير النجاح ان شاء الله بس ربنا يستيجيب دعوات جمان ويعرس لي، نجوى قالت ليها غايتو انتي جنك عرس نشوف كدي بعد تعرسي كان بتقدري تقعدي ، قالت ليها بقعد يختي زي العجب انتي هسي ما قاعده؟ قالت ليها هسي انا مرتاحه عشان راجلي مسافر لكن من يجي بعكنن علي عيشتي، حور قالت لي اها وانتي يا جمان برضو معنكننين عليك؟ قلت ليها ابدا، قالت ليها اها شفتي.. بعد نجوى خلصت قلت لي حور ما باقي كتير امشي انا بتمها وبجي، حور مشت وانا تاكيت الباب لأني كنت لابسه قميص قصير وقالعه التوب بقيت بغسل سمعت صوت الباب بتفتح قبلت بخلعه لقيتها لميس قالت لي اسفه خلعتك ولا شنو ،قلت ليها لالا، قالت لي خلصتي؟ كنت جايه اساعدك ،قلت ليها قربت مافي داعي ، وقفت جمبي واتكلت على الدولاب قالت لي كيفك قلت ليها كويسه الحمدلله انتي كيف، قالت لي الحمدلله كويسه برضو ، سكتنا مسافه بعدين قالت لي اتفاجأت لمن سمعت انكم مشيتو عمره، قلت ليها ليه؟ مطت شفايفها وقالت لي يعني انتو عرسان مفروض تمشو شهر عسل في حته تانيه المالديف، ايطاليا، دوله كدا تليق بشهر العسل.. سكت ما رديت عليها قالت لي ايهاب ما حكى ليك نحن مشينا وين؟ . بقيت بعاين ليها باستغراب يعني دي جاده هسي عايزه تحكي لي عن شهر العسل بتاعها هي وطليقها اللي هو زوجي حالياً ؟ ، قالت لي ما تفهميني غلط يعني بس ما عايزاك تكوني مسكينه من حقك تسافري وتنبسطي انتي لسه عروس، نشفت يدي وقلت ليها لو الله كاتب لينا نسافر بنسافر بعدين انا مبسوطه سواء كنا هنا ولا في حته تانيه، رفعت اكتافها وجواجبينها قالت لي انتي ادرى، ابتسمت ليها وانا ساكته، قالت لي انتي اصلا محجبه؟ قلت ليها اي، قالت لي يعني ما اتحجبتي عشان
