الماضي..
فتحت عيوني وغمضتها كم مره، بقيت بعاين للغرفه لمن استحضرت آخر موقف مر علي حسيت قلبي حيطلع من مكانو رفعت راسي لقيت معلقين لي درب فكيتو ونزلت طلعت برا لقيت عمتي خديجه قاعده في الكنبه وسرحانه لمن شافتني جات حضنتني وبقت تبكيي، بكيت بي حرقةةة وانا بقول مرام وينها يا عمتي جيبوها لي اشوفها بس اخر مره قبل ما تخش قالت لي ما تخليني انا خليتها براها لحدي ما ماتت اختي كانت دايراني معاها عشان ما تموت براها انا الخليتها يا عمتي ماتت براها بدون ما يكون في زول جمبها وااااي يا عمتي واااااي انا دايرة مرام بس جيبوها لي..... بعد يومين بيتنا بقى فااضي وفاة مرام كسرنا وغيرنا كلنا بقينا اليوم كلو يا سرحانين يا بنبكي ماف زول كان بتكلم مع التاني اي زول قافل على نفسو وما جايب خبر للتاني،ايهاب كان بجيب لي الاكل ويأكلني بالعافيه مرات بستفرغوا ومرات باباهو، مرام اتوفت في الولاده لكن بتها كويسه،اي زول ما كان عرف بحملها عرف بعد وفاتها ،قلت لي ايهاب جيب لي بتها، لمن شفتها ما قدرت اشيلها بكيت قدرتي وانا بعاين ليها حسيت اني بعاين لي مرام💔💔💔 ايهاب قال لي بكرا حنمشي للاسم عايز اسجلها باسمي، عاينت ليهو مسافه بعدين وقعت في حضنو قلت ليهو انا من غيرك كنت حاعمل شنو؟ رفعت راسي باسني في خدي وعاين لي مساااافه قلت ليهو مالك بتعاين لي كدا؟ ما رد علي رجع ضماني تاني بعدين طلع ، تاني يوم ابوي جا قعد معاي بقى يبكي قال لي لو ما جيتكم يومتها واتكلمت معاها ما كنت حاقدر اسامح نفسي ابداً مرام ختمت القران وماتت ربنا يجعلو شفيع ليها يوم القيامه.... المساء ايهاب اتأخر في الرجعه اتصلت ليهو ما رد علي جويريه كانت قاعده معاي قالت لي مالك؟ قلت ليها ايهاب ما برد ، قالت لي يمكن سايق ارجعي ليهو بعد شويه... لحدي ما نمت ما رجع لي تاني يوم صحيت لقيت مافي زول في البيت فتحت باب الشارع لقيت في ناس كتار جمب باب ناس عمو سمير والرجال بشيلو في الفاتحه، سمعت صوت الكواريك رجولي بقت ما شايلاني وقعت في الارض جمب الباب وشفت ريناد جايه علي وبتبكي لمن وصلتني بقيت بهز في يديني وراسي وانا مغمضه عيوني قلت ليها اسكتي هسسسس ما عايزه اسمع حاجه قالت لي ايها.. قلت ليها اسكتي يا ريناد اسكتي عليك الله ما تقولي لي شي
شفتها طلعت من البيت وهي جاريه بعدها دخلت في حالة هسترية بقيت بجر شعري وبضرب رجولي و اكورك اقول ليها زحي مني يا ريناد ما تجي جمبي وااااااي انا زحي مني... ما وعيت الا بي كف رفعت راسي لقيت ايهاب واقف قدامي ضماني عليهو شديد ما كنت مصدقه مسكت فيهو قوي وبقيت ببكي وبشهق
قلت ليهو ايهااب انت هنا؟؟ انا خفت شديد يا ايهاب خفت افقدك زي ما فقدت مرام انت كنت وين ليه ما رديت علي؟ ليه خليتني اخاف واقلق عليك كدا؟
مسكني من كتفي وكان عايز يزحني مسكت فيهو قوي قلت ليهو لا ما تمشي
فكاني ومسح لي دموعي حاوط وشي بي يدو وقال لي جمان انا هنا معاك ما تخافي تعالي معاي جوا
