مت مخلوعه قعدت في نص السرير ختيت يدي في صدري ونفسي كان قايم بتنفس بصعوبه ما كنت مصدقه انو كان كابوس، عاينت يمين شمال مافي زول ما عارفه قمت كيف طلعت من الغرفه لقيت ايهاب طالع من المطبخ اول ما شفتو جريت وقعت في حضنو وقعدت ابكي بدون صوت ، ضماني عليهو بدون ما يتكلم بعد مسافه رفعت راسي مسح لي دموعي وقال لي تعالي، ساقني دخلنا الغرفه وقعدنا في السرير قال لي كويسه ؟ هزيت ليهو راسي يعني لا، قال لي ارقدي ارتاحي طيب، قلت ليهو دا شنو يا ايهاب ديل منو وعايزين منك شنو؟ سكت ما رد علي قلت ليهو اتكلم ما تخليني اجن، قال لي ديل شماسه ساي ، قلت ليهو شماسه كيف يعني ما تكذب علي ، قال لي دا ما وقتو ارقدي انا حاجيب ليك حاجه تشربيها واجي، اول ما قام قمت بسرعه ووقفت قدامو قلت ليهو وريني هسي ، قال لي جمان حبيبتي الوقت متأخر خليني اجيب ليك عصير اشربيهو وبعدين ننوم وصباح الله بي خيرو، قلت ليهو انا ما عايزه اي عصير ياخ انا في شنو وانت في شنو عايزه افهم بس الناس ديل منو وليه عملو كدا؟ قال لي تعالي اقعدي طيب حافهمك اي شي بس عايزك تهدي اول ممكن؟ قعدت وهو مشا جاب لي كباية عصير ليمون بي نعناع وجا ، قلت ليهو ديل ناس الميراث صح؟ سكت ، اتنهدت ومسحت وشي ورقبتي وبقيت بعاين ليهو قال لي اي، قلت ليهو ليه عملو كدا عايزنك تخسر القضيه؟ قال لي زي ما كلمتك قبيل القضيه فتحت قضايا تانيه اخوانو طلعو تجار مخدرات والشغله فيها ناس كبار في الدوله ولو قدرنا نثبت الحاجه دي عليهم حتكون مصيبه كبيره بالنسبه ليهم، قلت ليهو وهم هسي مراقبنك يعني، قال لي اي ،قلت ليهو طيب اخسرها، قال لي اخسرها كيف يعني بعدين هم عايزينهم ينقلو الوكاله لمحامي تاني ما عايزني انا امسكها، قلت ليهو طيب خليهم ينقلوها ، عاين لي باستغراب، قلت ليهو حتخاطر بي حياتك عشان شوية قروش بتشاكلو فيها نفرين؟ قال لي الموضوع بقى ما قروش بس، قلت ليهو انت براك قلت ديل ناس كبار وانت ما بتقدر عليهم يا ايهاب ماف داعي تدخل نفسك وتدخلنا في مشاكل نحن في غِنى عنها، قال لي جمان انا ما حاخلي القضيه دي ولا حاخسرها و ما تخافي انا حاعمل كل الاحتياجات اللازمه عشان ءامنك، قلت ليهو ايهاب انت جادي؟؟ حتخسر شنو لو سلمت القضيه لي زول تاني في المكتب ؟ قال لي حاعرض حياة زول تاني للخطر زي ما حياتي هسي معرضه للخطر، قلت ليهو هم مشكلتهم معاك انت لأنو عارفنك ما حتطلع من القضيه دي الا وانت كسبان لو ما كدا ما كان قالو ليك غير الوكاله، خت يدو في كتفي قال لي حاضر العايزاه حيحصل يلا ننوم لأنو الصبح قرب و بكرا عيد، قلت ليهو بتمشي فيني صح؟ قال لي ياا الله اسوي ليك شنو انا عشان ترتاحي خلاص قلت ليك حاخليها يعني حاخليها، بعدين كلامك صح كدا ما حياتي بس حتكون في خطر كل القراب لي ، قلت ليهو مع اني ما مطمنه لكن ان شاء الله تكون جادي... رقدنا وكل ما اغمض عيوني كنت بتذكر منظر ايهاب وهو خانقنو نمت بصعوبه واظن ما تميت النص ساعه صحيت لقيت ايهاب جا من صلاة الصبح قعد في السرير زح لي شعري من وشي وقال لي صباح الخير ، قمت وقلت ليهو صباح النور.. صليت واديت البيت مسحه خفيفه بعدين كويت توبي وجلابية ايهاب ،بعد خلصت عملت الشاي وقعدنا نشرب قال لي عارفه بفطور العيد دا ولا ما كلموك، قلت ليهو نجوى ورتني، قال لي بنطلع ١٠ كدا خليك جاهزه، قلت ليهو طيب بعد الصلاه بمشي اعيد على ناس بيتنا بعدين بجي اجهزو ،قال لي نمشي سوا انا زاتي دخلت لي ناس امي بعد الصبح لقيتهم لسه نايمين.. بعد شربنا الشاي ايهاب استحمى ولبس انا بعد خلصت دخلت الغرفه لقيتو برفع اكمام الجلابيه قلت ليهو تعال احصنك، قال لي ما كنت انا البحصنك الليله مالك، قلت ليهو المهم نتحصن بس، قعدنا حصني واتحصن هو زاتو بعدين طلع قمت استحميت وقعدت اتمكيج لمن لبست وخلصت بعد مسافه جا قال لي مفروض احصنك تاني ولا اقول ليك خلينا قاعدين هنا ما تعيدي على اي زول غيري ، جا ضماني وباسني في راسي، قلت ليهو كل سنه وانت طيب وكل سنه ونحن مع بعض وربنا ما يحرمني منك ابداً ابداً، قال لي امين امين يارب والسنه الجايه معانا دستة عيال ،ضربتو في صدرو قلت ليهو دستة شنو انت كمان، ضحك وقال لي تلاته خلاص عملتهم ربع تاني ما بنقص، ضحكت وقلت ليهو ما نصيح انت.. طلعنا عيدنا على ناس بيتهم وبعدين مشينا بيتنا مرام حضنتني مساافه وقالت لي اعفي لي على تصرفاتي الكنت بعملها معاك ،قلت ليها اصلا ما زعلانه منك بكفيني انك عرفتي غلطك وصلحتيه ما عايزه شي غير كدا ، رهام كنت حاسه بيها لسه زعلانه مني ولا ما عارفه كاشة مني كدا ليه عشات ازيل الشك قلت لي مرام رهام مالا ولا معاي انا بس كدا؟ قالت لي ما براك كلنا بقت تصر لينا كدا كلام ساي بقينا ما بنتكلم معاها امس هي وريناد شكله لي رب السماء كمان لمن كلمت ابوي ووقف مع ريناد لمن مشت لمت هدومها الا هديتها ، قلت ليها ريناد دي الله يهديها بس، قالت لي ما اصدمك لكن المره دي ريناد ما غلطانه، قلت ليها المشكله
