قبل اي شي دعواتكم لكل موتانا بالرحمه والمغفره وربنا يشفي كل المصابين ويحفظنا ويغطي علينا💙
سمعت كتير بجملة " ما محبه الا من بعد عداوة" ما آمنت بيها وصدقتها الا بعد خطوبتي من ايهاب ،قبل كذا شهر لو كان في زول جا وقال لي الانسان الشفتيه في الدكان والشفتيه وهو واقف جمب بيتهم بشرب في سيجاره وعاينتي ليهو بإشمئزاز، والاداك كف ومن بعدو بقيتي تكريه وتشوفى العمى ولا تشوفيه، هو الانسان الحتتزوجيه كنت حاقول دا مجنون وضارب سلك، منو الكان مصدق انو في ظرف شهرين حيقدر يسكن قلبي ويتربع فيهو ، بي شهامتو ،رجولتو ، وقفاتو معاي، حبو لي و غيرتو علي... والاحلى من دا كلو اني اكتشفت انسان تاني جواهو ،شخصية ايهاب الحنون والرومانسي، الشخصيه الما كنت متوقعه في يوم اني اشوفها فيهو، كنت بستغرب وبسألو انت اصلا كدا ولا اتغيرت بعد الزواج لأنك ما نفس ايهاب الكنت بعرفوا؟!! كان بقول لي الشخصيه دي ظهرت بعد بقيتي حلالي لأنو لو كنتي شفتيها قبل ما نتزوج ما كنتي حتحسي بالانتي حاسه بيهو حالياً معاي..
ايهاب:-
من اول يوم واول لحظه شفتها فيها حسيت باحساس غريب جواي، لمن جات داخله الدكان وهي بتصلح في التوب اول شي حسيت بيهو وبدون ادنى مبالغه انو البت دي مفروض تكون حقتي، لمن كانت بتعاين لي بطريقه غريبه وانا بسجر كنت متمني اللحظه دي ما تخلص وما ترفع عيونها من عيوني، ما كنت بتكلم معاها وحتى لمن الاقيها بتحاشى اي تواصل بيناتنا لأني كنت متأكد اذا اتكلمت معاها حاقع حاقع، وحصل ، في اول يوم كنت بايت معاهم في المستشفى،رغم عنادها وقوة راسها وتعاملها السئ معاي بدون اي مبرر لكن ما عملت شي غير خلتني اتعلق فيها اكتر، عدم تواصلي معاها يمكن كان خوف اني ما اقدر ضبط مشاعري قدامها او خوف عليها من شخصية الاناني الجواي، اناني لدرجة لو بي ايدي اقفل عليها وما اخليها تطلع من غرفتها ولا تقابل اي زول عشان ما يعاين ليها بنفس الطريقه الانا بشوفها بيها، لمن سمعتها يوم بالصدفه بتتكلم مع استاذها وبهددها ما قدرت امسك نفسي، كان نفسي اخنقو واقتلوا بي يدي، فكرة انو انسان قدر يمد يدو عليها دي جننتني، لو ما كانت قاعده الوقت داك ما كنت قدرت اخليهو يمشي بالبساطة دي ، من اللحظه ديك انا بقيت بفكر فيها بشكل ما طبيعي، قدر ما حاولت اقنع نفسي انو تصرفي كان عادي ما عشان حاجه جواي تجاهها لكن اكتشتفت اني بكذب على نفسي ، واول ما عرفت كدا ما اترددت ثانيه في اني اتكلم مع ابوها، يومتها لمن شفتها واقعه في الارض وبتبكي كان نفسي اضمها علي واهديها لحدي ما تسكت ،زعلت من عم محمد زعل شديد حتى هو لاحظ الحاجه دي .. لمن اتخطبنا ما كنت مصدق! كنت عارف انو ابوها غصبها لكن اتحديت نفسي في اني احاول بقدر الامكان اخليها تحبني، يوم كلمتها بي شروطي انا اليومين ديك ما كنت مركز ولا فاهم اي شي كنت عايزهم يخلصوا بس واعرف حتقول شنو كنت خايف، خايف شديد انو اسمع رائي انا ما عايز اسمعو وللامانه اتوقعتها ما توافق ،لمن قالت لي انا موافقه حسيت انو جبل وانزاح من كتفي ... لحدي ما اتزوجنا وعملنا الحفلة انا ما كنت مصدق ، كنت حاسي اني بحلم وما عايز اصحى من الحلم دا ابداً.
