تاني يوم صحيت لقيت الساعه ٨ قمت مخلوعه لمن لقيت الوقت اتأخر مشيت اتوضيت وصليت ومشيت غرفة ناس مرام لقيت ريناد نايمه خلصت امتحانات قبل فترة ومرام طبعا في المدرسه ، مشيت العريشه والمطبخ برضو مافي زول قلت ياربي رهام تكون مشت بالجد؟ امس حتى بعد كلامها داك قلت يمكن دي لحظة زعل بس لكن ابدا ما اتوقعتها تكون جاده مشيت الحوش السراير والمراتب كانو في مكانهم لملتهم بعدين نظفت البيت وبخرتو وحسيت بي راحه عجيبه اصلا البيت لمن يكون رايق كدا بكون مبسووطه بعد خلصتها حتى عملت الشاي وقعدت احضر لي فيلم كنت بحضر شويه وبمسك تلفوني شويه اتكلم مع استاذ حسام لحدي الساعه ١٠ كدا حتى قمت جهزت للطلعه لبست لي بنطلون جينز ازرق وتُنكه مخططه خطوط عراض ابيض بي اسود اسبورت ابيض وطرحه سوداء، عملت ماسكرا وروج كبدي و شلت شنطتي البيضاء البحبها وقبل اطلع صحيت ريناد ، برنامجنا كلو كان في عفراء اول شي نفطر بعدين السينما واخر شي نختم بي منتزه ناوين ما نخلي لعبه ما نلعبها زي الاطفال وااحد الليله ، المهم طلعت وصلت عفراء وكالعاده كنت انا المتأخره رنين قالت لي حالتنا قلنا ليك نتلاقى ١٢ ومخططين نجي ١ لأنو عارفنك ماسورة تقومي تجينا ٢ الا قلت ليها سوري بيبي ما بقدر اعيش من غير مواسير وحفظت حركاتكم دي خلاص ريا قالت لي من يومك سغيله طلبنا بيتزا وحده بالهوت دوق والتانيه بالخضار لاني ما بحب الهوت دوق ووحده صغيره بالفراخ ،قلت ليهم لو وحده مدت يدها على بيتزتي بدقها ، بعد كلامي دا ياداب بدو يتعاوروا وياكلوا معاي ، بعد خلصنا اكل اتونسنا وبقينا لافين ما خلينا ركن ما اتصورنا فيهو في النهايه قعدنا قلنا ناكل اسكريم ،رنين قالت لينا عاينو الاولاد ديل قاطعين كيف عاينا للتربيزة القصادنا وحركتنا كانت واضحه رنين قالت لينا الله يفضحكم ،قعدنا نضحك هم زاتهم ضحكو معانا ريا قالت ليها خالد لو سمع كلامك دا برجعك بيت ابوك ،رنين ضحكت مسااافه ضحكنا معاها وسكتنا لكن هي كانت لسه بتضحك استغربنا فيها بعد انتهت من الضحك رفعت لينا يدها الشمال وقالت لينا مستنياكم من قبيل تلاحظوا لكن الاتنين عميانات، قلت ليها دا شنو؟ ريا قالت ليها دقيقه ما يكون البفكر فيهو صح رنين هزت راسها قلت ليهم ما فاهماكم رنين قالت لي am single know نزلت حواجبي باستغراب قلت ليها بتهزري صح؟ قالت لي دا موضوع يهزروا فيهو؟ ريا قالت ليها متين الكلام دا رنين قلت ليها قبل اسبوعين ، قلت ليها الحاصل شنو خلاكم تصلوا للطلاق عديل ،قالت لينا ما اتفقنا بس، ريا قالت ليها عشان كدا غيرتي رأيك وقلتي تمتحني البدائل قالت لينا كنا لسه ما اتطلقنا لكن ياهو كانت حاصله مشاكل وما كان عندي طريقه امتحن ، سكتنا ما عرفنا نقول شنو قالت لينا ما بتحسوا ارتحت كيف بعد اتطلقت والله حسيت جبل وانزاح من قلبي قلت ليها اهم شئ انك تكوني مرتاحه قالت لي جداً جداً ، ريا قالت لينا زمن الفيلم جا قمنا شلنا لينا فشار ودخلنا الفيلم كان فيلم كوميدي متنا بالضحك فرفش بينا غايتو بعد رنين صدمتنا بي طلاقها دا ، بعد خلصنا طلعنا من عفراء ومشينا منتزه بري ما خلينا لعبه ما لعبناها كنا مستمتعين شديد والله بدون مبالغه اول مرة اضحك وانبسط كدا بعد وفاة امي، لمن طلعنا من بري الساعه كانت ١٠ وشويه قلت ليهم اتأخرنا عديل الليله ، اي وحده مشت بي مواصلات براها بعد ركبت طلعت تلفوني ولقيت كمية مكالمات من ابوي خفت خوف رجعت ليهو قال لي بي نهرة يا بت انتي وين قلت ليهو جايه يا ابوي في الشارع قفل وانا بقيت متوترة بالجد وصلت البيت ولحدي ما اصل قلبي دا حسيت بيهو حيقيف عديل دخلت وانا برجف لمن وصلت العريشه لقيت ابوي وريناد ومرام قاعدين قلت ليهم السلام عليكم، ابوي وقف وقال لي عارفه الساعه كم؟ عاينت للساعه في التلفون لقيتها ١١ ونص قلت ليهو ما حسينا بالوقت يا ابوي قال لي كلام عمتكم خديجه صح الدلع الكتير دا خلاكم تركبو فوق راسي ، عاين لي ريناد وقال وحده لسانها مترين ومتبري منها تتلامض مع الاكبر منها ، عاين لي وقال ووحده جايه البيت انصاص الليالي وروني اسوي ليكم شنو انا؟ قدر ما احاول احتويكم واتصرف معاكم تصرف ناس كبار وعاقلين لكن مافي فائده غير تجيبوا لي وجع القلب ما بتعملوا شي ذنبي شنو انا عشان يجو يقولوا لي ما عرفت تربي بناتك؟ .. طبعاً لمن قال كدا كلنا نططنا عيونا .. واصل وقال وروني بس انا ذنبي شنو الغلط العملتو شنو عشان بعد عمري دا كلو يجي واحد قدر بناتي يقول لي ما عرفت تربيهم .. كررها تاني والمره دي قالها بي حرقة لمن حسيت بيهو العبرة خنقتو ومرام وريناد بقو يبكو ، قال لينا بتبكوا على شنو انتو هسي؟ انتو تبكوا انا اعمل شنو ؟ تعبي وشقاي في الدنيا دي كلها عشان شنو؟ مش عشان تكبروا وتبقوا بنات محترمات ومؤدبات ويقولوا دي بت محمد كتير علي انا الكلام كدا؟ بتكلم معاكم انا كتير علي؟؟؟ كلنا هزينا راسنا قال لينا طيب ليه ليييه انا بعد البعملوا دا كلو اسمع كلام زي دا؟ ..
