الفصل القبل الاخير
امي قالت لي علي انا؟ اقنعيني بس انو ما قال ليك انا جاي لي ابوك، كدي هسي امسكي مني الصينيه دي اجيب السيرمس ابوك هسي بجي بشيلهم... امي مدت لي الصينيه يدي بقت ترجف لمن لاحظت لي مسكتها تاني وقالت لي مالك يا بت.. قلت ليها امي انتي جاده ولا بتهزري؟ قالت لي دا موضوع يهزروا فيهو يا ياسمين؟؟.. ختو الصينيه في التربيزة ودخلت تاني، ما كنت مستوعبة الحاصل رجعت عاينت بالباب تاني ابوي كان بتونس مع الولد المع ايمن وايمن ساكت.. دخلت الغرفه قلت لي يارا ديل جو ليه؟ قالت لي انتي هبله ولا بتتهابلي؟ قعدت ودموعي جات نازلة لمن لقتني ببكي جات قعدت جمبي قالت لي مالك يا بت؟ ياس في شنو؟ ما دايراهو انتي؟ لو ما دايراهو كلمي ابوي ما حيغصبك عليهو.. بقت تجر لي في يدي قالت لي انتي لسه عوارتك دي ما خليتيها الببكيك شنو هسي كدي نزلي يدك دي.. نزلتها ومسحت دموعي قالت لي هو دا منو امي قالت لي ببقى لي ظافر، قلت ليها ولد عمتو، قالت لي عايني انا ما شفتو لحدي الان لو عجبني حنعرسو ليك غصبا عنك.. بقيت بضحك نص دموعي ضحكت معاي، هي سكتت وانا لسه بضحك بقت تعاين لي دموعي جات نازلة قالت لي ياس ياخ عليك الله ما تعملي لينا دراما الزول دا مهددك بي حاجه؟... شهقت وقالت لي هيييي ما تكوني عملتي ليك عملة ما ياها، ضربتها في كتفها وقلت ليها يارا اسكتي ياخ.. قالت لي حيرتيني معاك والله، قلت ليها انا بحبو💔.. بقت تعاين لي ورافعه حواجبينها قالت لي انتي يا بت عندك كك في راسك دا؟ عرفتيه متين وحبيتيه متين؟ ولو بتحبيه المفترض هسي تكوني مبسوطه مالك بتجعري فينا من جيتي؟ قلت ليها القصه طويله، ربعت رجلينها وصلحت قعدتها قالت لي اها اطربيني ببلاويك... قبل اتكلم امي نادتي يارا قامت جاريه طلعت وراها لقيت ابوي قاعد عاين لي كداا بدون ما يقول حاجه خفت خوف، امي قالت لي يارا تعالي سوي معاي العشا.. بعد دخلو ابوي قال لي تعالي، مشينا الحوش قال لي بتعرفي الزول دا انتي مش؟ قلت ليهو وانا منزلة راسي: اي.. قال لي اتكلم معاك قبل كدا قال ليك انا دايرك ولا حاجه زي دي؟.. سكت ساي ما قدرت اقول حاجه بالاحراج.. قال لي اتكلمي عادي، قلت ليهو ا..اي كلمني، لكن ما صدقتو.. قال لي الخلاك ما تصدقيه شنو؟؟ يعني هو زول ما جادي؟ قلت ليهو ما عارفه.. قال لي شوفي انا الزول دا اول قعده لي معاهو كان يوم جيناكم ودي المره التانيه يعني ما بعرف عنو اي شي، انا قلت ليهو البت عندها كبارها ولازم نشاروهم قلت اكلم سمير واكرم وجدك ونسأل منو نشوف اصلو وفصلو شنو، اها انتي رائك كيف؟ قلت ليهو البتشوفوه مناسب اعملوه.. قال لي انتي عندك مشاعر تجاهو؟؟ لمن قال كدا قلبي بقى بضرب سريع وحسيت جسمي كلو مشى مويه نزل راسو علي وقال ياسمين؟؟ قلت ليهو لالا يا ابوي.. قال لي طيب ما دايراهو؟ رفعت راسي وقلت ليهو لا ما كدا.. قال لي كويس بكلم اعمامك وربنا يكتب الفيهو الخير، قلت ليهو ان شاء الله... دخلت جوا وجسمي كلو برجف يارا جات لاحقاني في الغرفه قالت لي اها ابوي قال ليك شنو؟.. حكيت ليها ضربت يدينا ببعض وقالت لي غبيانه غبيانه من يومك مالك ما قلتي ليهو انك دايراه؟؟ قلت ليها الكلام ما سااااهل.. قالت لي وحات الله لو مكانك اقول ليهو اعقدو لينا بكرا دي.... كنت مبسوطه برجعة علاقتنا انا ويارا اكتر من جية ايمن قلت ليها وانتي زولك داك لسه ما جا لابوي ؟ قالت لي عمر ولا منو ؟ قلت ليها انتي عندك غير عمر يعني؟ قالت لي اي اتكلم معاهم قبل نسافر لكن قال لي ابوي انا ما جاهز، ابوي قال ليهو خلاص لمن تجهز تعال اعمل خطوة المهم حجزني يعني... بقت تتخجل وتخت يدها في وشها قعدت اضحك هي زاتا ضحكت معاي قلت ليها مشتاقين يا عواليق.. قالت لي عواليق في عينك ثم ثانياً انا ما مشتاقه ليك ولا شي.... جات رقدت في السرير القاعده فيهو ورفعت رجولها في الحيطه رقدت جمبها وعملت نفس الحركه بقينا بنعاين لشراباتنا ونضرب رجول بعض.. كنا بنعمل كدا طوالي لمن في واحده تكون عايزه تحكي للتانيه حاجه.. قالت لي شكلو كدا الليله رجولنا حتوجعنا، قلت ليها ما شكلو اكييد... امي نادتنا للعشا ابينا وقعدنا نحكي لكن اغلب الوقت كنت بحكي انا حكيت ليها عن الحصل لي من مشيت لحدي ما رجعت بعد خلصت قالت لي يا ربي لو قلت لي ابوي ما دايرة عمر فيها حاجه؟ عاينت ليها باستغراب قالت لي عشان اعرس امير دا.. يا بنتي انتي غبية ولا هبله ولا عوقه ولا شنو بالظبط، ايمن دا حبيتي ليهو شنو بس كدي وريني؟ غير شكلو طبعاً دا خليهو في زاوية، بالمقابل وريني شي واحد في امير ما يتحب بغض النظر عن الشكل لأني ما شفتو قبل كدا، قلت ليها هل يُسأل مُحب لماذا احببت؟؟ قالت لي محب طيرة زيك ما لاقاني، ضربتها برجلي قالت لي لكن ياخ كلامك صح هسي لو سألتيني حبيتي شنو في عمر انا زاتي ما حاعرف اقول ليك شنو.. قلت ليها هسي اعمل شنو؟ قالت لي أولا واضح كلامهم في الفيديو الوصلك داك كان مجرد هظار والا أولا ولا واحد فيهم كان حيكون عندو وش يقابلك ويعتذر ليك وثانياً ما كنتي حتلقي ايمن قاعد مع ابوي الليله ف انتي يا حلوة اول شي مفروض تعمليه تتصلي لي امير حالا وتعتذري ليهو على الكلام القلتيه اخر مرة وتقولي ليهو عادي ممكن نبقى اصحاب ولو عايز تذيد مخزون الصحاب عندك ف عندي اخت ظريفة لطيفة زيك كدا اسمها يارا واقعدي اشكري فيني قدامو، قلت ليها يا زوله اتلمي عشان ما اكلم ليك عمر.. قالت لي انتي بتحبي ايمن ولا امير؟ قلت ليها ايمن قالت لي طيب مالك غرتي هسي.. قلت ليها دي غيرة اصحاب عشان بعدين ما تصحابيهو وينساني.. قالت لي غيرة الاصحاب دي اكعب من حقت المرتبطين امير دا خليتو ليك زاتو كفايه عمر مالي عيوني، قلت ليها اها وبعد ما اتصل لي امير قالت لي بس ما تعملي حاجه تاني.. قلت ليها وايمن.. قالت لي عارفااااك دايرة تتكلمي معاهو لكن اوعك تتخاففي خليهو براهو لمن يتصل ليك.. قلت ليها لو ما اتصل، قالت لي حيتصل خلي الشفقه انتي، واي يا ياس ما تقولي لي كنتي بتعملي ليهو كدا؟ يا بتي خليك تقيله عشان ما يزهج ويطفش.. قلت ليها هسي انا مالي، قالت لي ما مالك ولا حاجه اديني تلفونك عارفاك ما حتقدري تمسكي نفسك قلت ليها ما بتصل والله ما للدرجه دي كمان.. قالت لي يعني عارفه نفسك🤣 يلا يلا اتصلي لي امير ، شلت تلفوني اتصلت ليهو مرتين ما رد قالت لي خلاص بكون ما فاضي، كدي تعالي اتم ليك ولد عمتو رجاء لمن رفضتو عمل شنو..... بقت تحكي لي وبنضحك لمن دمعنا، فجأة سمعنا صوت رنة تلفوني افتكرتو امير لمن شلتو لقيتو ايمن قمت بخلعه يارا قالت لي دا هو؟ قلت ليها اي قالت لي لأني زولة عندي ذوق وفاهمه حاطلع ليك برا تاخدي راحتك قامت وقمت وراها قالت لي لا مافي داعي تشكريني قلت ليها يارا انقلعي من وشي... رديت وختيت التلفون في اضاني وانا ساكته بعد نص دقيقه حتى اتكلم قال لي ما عايزه تسمِّعيني صوتك؟.. ما رديت قال لي بريدك وبريد هبالتك دي... قلبي عمل شححح وحسيت اطرافي بردت قلت ليهو انا ما هبله.. ضحك ضحكه خفيفه وقال لي انتي ركزتي على هبله دي بس؟ طيب وباقي كلامي.. سكت قال لي ما خليتي لي خيار تاني ما رضيتي تصدقيني ولا تخليني ابرر ليك.. قلت ليهو انت ما كنت عايز تبرر، قال لي منو القال، قلت ليهو انت القلت وما تنكر.. قال لي فعلاً قلت المهم انو فزت في التحدي، قلت ليهو لسه بتتظارف، قال لي طيب تمام ما حاتظارف.. سكت شويه بعدين قال لي خطوتي دي فرحتك؟.. ياسمين انتي مالك ما بتردي لو ما عايزه تتكلمي وريني عشان اقفل، قلت ليهو ما كدا قال لي طيب في شنو كل ما اسألك تسكتي كدا، خجلانه مني؟.. قلت ليهو اخجل ليه؟ قال لي انا عارف فسري لي سكوتك دا طيب، قلت ليهو ما عارفه اقول شنو بس.. قال لي هو سؤال اجابتو اي يا لا شنو الما عرفتي تقوليه، قلت ليهو اي عجبتني.. قال لي عشان ما وريتك لكن انتي ما كنتي مدياني فرصة اتكلم معاك.. قلت ليهو ما مشكله، قال لي طيب برجع ليك بعدين انا قربت، قلت ليهو ماشي وين بعد الوقت دا؟ قال لي ماشي لي رشا، طلع عندها كانسر في الكبد ماشي اشوفها.. اتخلعت خلعه قلت ليهو شنو شنو؟ متين الكلام دا؟ قال لي قبل كم يوم، حتبدا تاخد جرعات من بعد بكرا.. قلت ليهو ايمن انت جادي ؟ قال لي انا حاهظر في موضوع زي دا يا ياسمين؟.. قلت ليهو وااي ما مصدقه والله، قال لي الدكتور المشينا ليهو قال مافي امل من العلاج لكن اتصلت لدكتور اردني شاطر في كندا رسلت ليهو الاوراق قال هسي ما فاضي نمشي ليهو نهاية الشهر.. قلت ليهو لا حول ولا قوة الا بالله ربنا يشفيها ان شاء الله يااارب.. قال لي اللهم امين يلا... قفلت وسرحت بعيد قلبي وجعني عليها شديد ما قادرة اتخيل شكلها بعد مرضت روش القويه والمليانه طاقة وحيويه راقده في السرير والكانسر منتهي منها يا الله ياخ💔... طلعت برا لقيت يارا نامت في الصاله صحيتها رجعت سريرها ورقدت انا زاتي.. جاني احساس غريب، ايوه انا شفقانه على رشا ووجعني مرضها لكن وجود ايمن معاها وفي وقت زي دا مضايقني..
