مشيت من الكافتريا وكنت شايفه الناس دي كلها بتعاين لي ما عرفت رجولي وصلوني كيف لحدي غرفة ابوي لقيت ايهاب واقف برا قال لي حمدلله ع.... قبل ما يتم كلامو مشيت لقيتهم كلهم حولينو بقيت واقفه عاين لي ومدا لي يدينو جريت ووقعت في حضنو ابوي قال لي بتي السمحه، لمن سمعت صوتو قعدت ابكي بي حرررقةةةة بكيت بكا السته شهور الما كنت قادره اطلعوا كلو اللحظه ديك ، قمت منو ومسحت دموعي قال لي ما كنت اصحى ولا شنو قلت ليهو بعد الشر يا ابوي ياخ ما تقول كدا ، ريناد قالت ليهو عايزنا نزعل منك نحن ما صدقنا قمت لينا ، مرام قالت ليهو ما نشوف فيك شر تاني قال ليها آمين ولا اشوف فيكم..
ابوي قبل ما يطلعوهوا رقد يومين في المستشفى ، اليومين ديل حسام ما اتواصل معاي نهائي وانا ندمت ندم بعد كلامي معاهو يعني ما كان في داعي للعربي الصرفتو معاهو دا نهائي غير بشعت بي نفسي قدامو ما عملت شي وهسي حيفضل يشوفني لسه بحبو وميته فيهو بعدين الكف كان لزومو شنو يعني اخليهو يحبني غصباً عنو وعشان ما حباني اقوم اكفتو احيييي ياخ زعلت واتضايقت من نفسي شديد ، انا لسه بحبو؟ ما عارفه لكن محروقة شديد واذا النار الفيني دي ما انطفت معناها لسه في مشاعر جواي تجاهو ، اتفقنا انو ما نكلم زول من اهلنا ولا الجيران الا بعد نطلع من المستشفى بس اتصلنا لي عماتي وطمناهم قعدوا يبكوا بكا لمن اتكلموا مع ابوي ، طبعاً ابيت ارجع البيت نهائي انا قلت ليهم رجلي ما بتدخل البيت الا مع رجل ابوي ، قبل يطلعوا ابوي بي يوم كلهم رجعوا قالو عايزين ينظفوا البيت ويطبخوا لأنو مافي شي في البيت ، بقينا قاعدين انا وعلي وانا متلصقه في ابوي اصلو ابيت اطلع من الغرفه ، جا الدكتور داخل الغرفه وكنت بونس في ابوي، قال لي شنو يعني ابوك دا ما عايزه تخليهو يرتاح شويه؟ قلت ليهو لالا بس ما طالعه الليله، ابوي قال ليهو انا زاتي ما دايرها تقوم من جمبي ، قلت ليهو انا معطتك صح؟ شكلك تعبان وعايز تنوم ، قال لي معطتيني معطه ، الدكتور قعد يضحك قال لي يلا قومي باقي اخر فحوصات لأنو حتطلعوا بكرا الصباح طوالي قلت ليهو طييب يلا تصبح على خير يا ابوي ، بستو في راسو وطلعت لقيت علي قاعد وبلعب ليدو جيت قعدت جمبو وقلت ليهو غايتو انت جنك ليدو ، قال لي اختك دي خلتني ادمنو، قلت ليهو قاعده تلعبنا ليهو معاها بالغصب انا وريناد ، قعد يضحك.. ربعت يدي واتكلت على الكرسي قلت ليهو بالمناسبة في موضوع كان شاغل بالي شديد وهسي ما حاقدر اسكت قال لي موضوع شنو قلت ليهو ياخ اقفل القيم دا وركز معاي قال لي اصبري باقي لي يك بس ، قلت ليهو اليك دا ما بجي بالساهل، بعد داك سمعت صوت النغمه بتاعت انو فاز قال لي شفتي كيف هدا جبتو قلت ليهو شاطر الله يحفظك ، دخل التلفون في جيبو وقال لي اها في شنو ، قلت ليهو تتذكر لمن جيتونا انت وخالتو جميله زمان ، قال لي متين ، قلت ليهو ياخ اخر مرة لمن جيتونا وفتحت لي ابوي موضوعكم انت ومرام ، قال لي اها؟ قلت ليهو ما تفهمني غلط ما عايزه اتدخل انا لكن الموضوع قلق بي شديد وخايفاهو يأثر على مرام ، قال لي عموماً كدا مرام عارفه الحاصل شنو بعدين هي اختك من حقك تقلقي عليها لكن انتي عايزه تتشمشري عارفك ، قلت ليهو انا يا علي؟؟ ضحك وقال لي بهزر انتي ما بتاعت حاجات زي دي ، قلت ليهو ما عايزه اعرف زاتو وقبلت منو، قال لي على كيفك ،طلع تلفونو عاينت ليهو تاني قلت لي بطل سخف ياخ قال لي انتي اثبتي ليك على رأي عايزه تعرفي ولا لا ، حمرت ليهو قال لي خلاص ما تعايني لي كدا، المهم يا زوله امي ما كانت رافضه الفكره من اساسها لكن زعلتها طريقتي قالت لي ما كان مفروض تفتح الموضوع كدا الاصول تجي مع ابوك واعمامك الاجاويد يعني وتطلب يد البت قلت ليها دا لمن يكون زول غريب لكن مرام بت خالتي وما بنعرفهم من الليله ولا بكرا واصلا انا لمن اجيب اعمامي وابوي ح اجي اعقد بس ما عايز خطوبه ولا كلام زي دا ، قلت ليهو تعقد كيف يعني مرام عارفه الكلام دا؟ قال لي اي عارفه لكن ما ح يحصل هسي طبعاً ، قلت ليهو يعني مرام قالت ما عايزه خطوبه؟ قال لي الخطوبه دي بعملوها لشنو؟ مش عشان الاتنين يتعرفوا على بعض ويشوفوا لو ح يقدروا يكملوا ولا لا؟؟ انا ومرام من قمنا مخطوبين ، قلت ليهو منو القال ليك الخطوبه عشان كدا بس؟ قال لي دا الانا عارفو ، قلت ليهو على العموم مش مرام مبسوطه انا ما عايزه شي غير كدا.. قعدنا اتونسنا شويه بعدين مشيت الغرفه لقيت الساعه ١١ قلت انوم لأنو بكلام الدكتور شكلنا حنطلع بدري، رقدت وبقيت اتقلب الليل كلو بتذكر في مواقفنا انا وحسام قلبي وجعني شديد وقعدت ابكي والوم في نفسي لأني ما فهمت تلميحاتو لي، كلامو كان صح هو كان بلمح لي كتير لكن انا كنت عميانه وزي الشافعه شايفه تعاملو الكويس معاي دا معناها بحبني بالجد انا غبيه شديد واستاهل الحصل فيني دا، لمن غلبني النوم دخلت الواتس لقيت ريا متصله طوالي اتصلت عليها قالت لي متين لحقتي تشتاقي لي مش قبل شويه طلعت منك؟ قلت ليها وانا
