لمن وصلنا البيت الساعه كانت ٩ الا قبل ما انزل قلت لي ريا شكراً ليك، ما ردت علي نزلت واول ما دخلت البيت دموعي جات جاريه طوالي مشيت الصالون لقيت ايهاب وابوي في الحوش بتونسوا قلت ليهو ممكن تخلينا انا وابوي برانا؟ ابوي قال لي في شنو يا بت مالك بتبكي كدا.. ايهاب قام ابوي قال ليهو ما تمشي البيت اقعد بالحوش البي هناك بعد شويه بنكمل كلامنا ، قال ليهو كويس ومشى انا قعدت قصاد ابوي قال لي يا بتي قلقتي بي الحاصل شنو، قلت ليهو ابوي انت عارفني كنت وين؟ قال لي مرام قالت لي اصحابك عاملين ليك مفاجأة واحتفال قلت ليهو ماف كلام زي دا، قال لي ما تنطقي يا بت في شنو وكنتي وين طيب؟ انا اتوترت قمت على حيلي وبقيت بدعك في يديني قلت ليهو كنت في شقة ماجد لكن.. قبل ما اتم كلامي ابوي قام على حيلو واداني كف خلاني اقع في الارض انا بقيت ببكي بي هستيريا ابوي كورك لي ايهاب وهو جا جاري قال ليهو عمي الحاصل شنو ،ابوي قال ليهو لو دايرها هسي دي سوقها مش جيت طلبتها مني؟ بكرا دي جيب اهلك وتعالو اعقدوا ، رفعت راسي عاينت لي ابوي بي خلعه لقيتو بعاين لي وعيونو دي مولعه نار عديل كان جاي علي ايهاب مسكو قال ليهو يا حاج اهدا المشاكل ما بتتحل بالطريقه دي اقعد وروق بعدين اتكلموا، ابوي قال ليهو ما عندي كلام معاها انا قومي طيري بي هناك ، ايهاب عاين لي وهو لسه ماسك ابوي قال لي قومي يا جمان ،قمت ووقفت قدامو قلت ليهو وانا لسه ببكي: ابوي عليك الله خليني اتم ليك الحصل انا ما عملت شي والله انا، مش بتثق فيني ؟ والله العظيم ما.. قبل ما اتم كلامي قال لي ياريتني ما قمت من الغيبوبه ومت ارتحت قبل ما اسمع الكلام دا، دخل الصالون وخلاني واقفه لسه ببكي ايهاب قال لي ابوك هسي مافي وضع يسمح ليهو انو تتكلموا امشي لاخواتك وبعد يهدا تعالي ، ما رديت عليهو مشيت بي سرعه وانا ببكي رهام كانت في العريشه لمن شافتني دخلت بي حالتي ديك جات وراي ،دخلت الغرفه جدعت شنطتي ورقدت قبلت على الحيطه ، رهام جاتني قالت لي جمان ؟؟ في شنو مالك يا بت ، مرام جات قالت لينا الحاصل شنو؟ رهام قالت ليها ما عارفه انا زاتي لقيتها جايه داخله بالحاله دي ، مرام جات قعدت جمبي وقالت لي خوفتينا عليك مالك ياخ ، قلت ليهم خلوني بس براي ،رهام قالت هي لكن نخليك كيف بي حالتك دي ، قلت ليهم لوو سمحتو انا ما عايزه زول في الغرفه دي اطلعوا كلكم ، رهام ومرام طلعو وانا دموعي ما كانت عايزه تقيف كل ما اتذكر نظرات ابوي بتحرق من جواا.. انا عارفه انو ابوي ممكن يمشي اي شي الا حاجه تمس شرفنا وكرامتنا هنا ممكن يتحول لانسان تاني زي الانا شفتو هسي ومع ذلك مشيت كلمتو ما عارفه ليه لكن كنت حاسه في جبل في قلبي ولو ما كلمتو ما ح ينزاح مني.. الليل كلو كنت راقده بي نفس الوضعيه دي بعاين للحيطه وسرحانه سمعت صوت الباب بفتح بعدين رهام جات وقعدت في السرير قالت لي صليتي العشاء؟ سكت ما رديت قالت لي قومي صلي وتعالي ارقدي الوقت اتأخر.. قمت شلت لي غيار استحميت وصليت وجيت رقدت مكاني رهام كانت لسه قاعده قالت لي قومي خلينا نتكلم قلت ليها وانا سرحانه نتكلم في شنو ؟ قالت لي قومي يا جمان ، قمت اتكلت على الحيطه وضميت رجولي علي ،رهام قالت لي ابوك هسي بجي وتحكي لينا حصل شنو بالتفصيل انا واثقه انك ما حتعملي حاجه توطي ليهو راسو ،عاينت ليها بي خلعه قالت لي ما حيعمل ليك حاجه انا بالعافيه اقنعتوا يجي ويسمعك انتي بس احكي ، قامت وبعد شويه جو هي وابوي داخلين ابوي قعد في السرير القصادي ورهام قعدت جمبي عاينت لي وهزت راسها، بديت احكي وانا بتمتم ومره اقيف مسافه اخد بكيتي واواصل ماف زول فيهم قاطعني لحدي ما انتهيت حكيت اي شي الا النقطه بتاعت انو ودوني بيت تاني وماجد ما كان عارف قلت ليهم لمن وقعت جابو لي دكتور وبقيت كويسه، ابوي قال لي الوداك معاهم شنو وانتي ما بتعرفيهم؟ كان عقلك وين لمن طاوعتيهم ومشيتو انتو شباب تقعدوا في شقه براكم الضمنك شنو ما يعملو فيك حاجه، رهام قالت ليهو ظافر ما من النوع دا وماجد زاتو .. قاطعها وقال ليها ما تقولي لي ما من النوع دا وبتاع ديل اولاد في النهايه وقاعدين مع بنات براهم في مكان مقفول اي شي ممكن يحصل .. كنت ساكته وببكي رهام قالت ليهو خلاص يا محمد ما تكورك ما شايف حالتها كيف بعدين هي لو عامله حاجه ما كان جات حكت ليك قدّر الحته دي ، ابوي قام طلع رهام بقت تمشي راسها على شعري قالت لي عاد ما بسألك يا جمان في واحده بتمشي تقول لي ابوها انا كنت مع صاحبي في شقة؟؟ كان تجي توريني انا دي كنت وريتك تفهميهو الموضوع كيف ،غايتو عملتك دي ما سبقك عليها زول.. بقت قاعده معاي وبتهدي فيني قالت لي الولد دا ما تتكلمي معاهو تاني على الاقل لحدي ما ابوك يهدا لأنو لو شافوا حيقتلو عديل، مرام وريناد جو واتكلموا معاي مرام قالت لي انتي عارفه ابوي بهيج في وقتو تاني بنسى ،ريناد قالت لي صحي بكرا جايين يخطبوك؟ انا نطتت عيوني وعاينت ليها كنت فاكره ابوي قال كلامو دا في وقت زعل بس
