عدة فترة ابوي شويه شويه صحتو بدت ترجع زي الاول .. بعد اتحسن رجع شغلو الاول ما كنا متوقعين يرجعوه لكن المدير بي نفسو جا وقال ليهو وظفت ناس كتار فترة كنت في الغيبوبه لكن مافي زول قدر يعمل العملتو ما حنلقى زيك، المهم ابوي رجع لكن اول ايام ظروفنا كانت صعبه شويه اضطر يبيع العربيه عشان نمشي بيها حالنا وانا زاتي رجعت لي شغل الكافتريا كنت بمشي من بدرييي اشيل حاجاتي واعمل الكيك والبسبوسه عند ريا عشان ناس البيت ما يشكوا في الموضوع قروش القهوة كنت بديها لي رهام واقول ليها ما تشيلي من ابوي مصاريف مشي بي ديل لمن تسألني جبتهم من وين بقول ليها كنت لاماهم وهسي برضو كل ما الم بديك وهي اقتنعت بي كلامي.. اشتغلنا امتحانات السمستر السابع والمادة الكنت شايلاها عملت ليها مراجعة وبالجرجرة روحي طلعت لحدي ما اتأكدت اني ناجحه فيها، طبعاً بعد الحصل اخر مره بيني وبين حسام ما قدرت امشي اطلب منو مساعده زي ما قال ،ولا واجهتو تاني وجه لوجه الا يوم كان عندنا معاهو محاضرة كان بعاين لي بي طريقة خوفتني اكتر مما كنت خايفه حتى الدفعه كلها لاحظت للحاجه دي وبدو يألفو حاجات من راسهم انو نحن مرتبطين وهو زعلان مني اصلا كانو شاكين من زمان وخلاص لقو ليهم ثغرة يتكلموا، لحدي ما وقف محاضراتو ايام زواجو ولمن عرفو ياداب بدو يتكلموا زي الناس حتى دفعتنا المن تخصصات تانيه عرفوا، انا الايامات ديك جاتني نفسيات عديل، ما نفسنت بسبب كلامهم بس لسه كان في جواي مشاعر تجاهو يمكن عشان اول حب في حياتي لكن تعبت تعب شديد عشان اتجاوزوا كنت بقوي نفسي عشان اجي الجامعه واستحمل كلامهم ونظراتهم لي كأنو ما هاميني، الفترة الوقف فيها مسكنا دكتور تاني مادتو ياداب بقيت احضر المحاضرات بتاعتها ولمن رجع وقفت تاني وبقيت شغاله في فيديوهات اليوتيوب بس .. انا لسه كنت مستغربه من تصرفو معاي بالطريقه ديك يعني انا اي غلطت لمن اتكلمت معاهو كلامي داك ولمن اديتو الكف لكن ابدا ما كنت متوقعه يتعامل معاي كدا ما مصدقه دا حسام الكنت بعرفوا زمان وكان بقيف معاي في اي شي ،للدرجه دي كلامي كان حار؟ .. ايهاب بعد موقفي معاهو داك ما لاقيتو كتير تاني كان بجي لي ابوي طوالي لكن ما كنت بشوفوا بجي بدخل الصالون وبطلع طوالي، كنت بلاقيهو في الشارع مرات لمن اكون ماشه الجامعه بشوفوا طالع ومرات لمن ارجع العصر بلقاهو مع سعيد خاتين كراسيهم في الشارع ويشربوا الشاي يعني ما اتكلم معاي تاني ولا كأنو حصل شي ..
طلعنا من اخر امتحان وكالعاده الدفعه تكورك وتصرخ ،قلت لي ريا سامر جاييك؟ قالت لي سامر سافر قبل يومين قلت ليها مشى وين قالت لي جاهو عقد عمل في عمان قلت ليها ما شاء الله والله ربنا يوفقوا قالت لي امييين يارب، مشينا فطرنا وصلينا ورقدنا في الاستراحه نتونس كنت ماسكه التلفون قلت ليها ماجد قال لي قاعدين في الجامعه هو وشلتو قالت لي الجابهم شنو انا الجامعه دي لو اتخرجت منها تاني لو بقت قبله ما اقبل عليها ،قعدت اضحك قلت ليها عايزين ورق من الادارة ما بعرف ورق شنو، قالت لي اهاا لو كدا معليش قلت ليها قالو خلصوا ومستنيننا ،قالت لي لشنو؟ قلت ليها قالو اصلا طالعين شكلهم وقالو يكلمونا ،قالت لي بري عارفه سامر ما بحب شلتهم دي لو عرفني طلعت معاهم حيقعد ينق لي قلت ليها علييك الله ياخ البعرفو شنو قالت لي عندو ارقامهم ولو اتصورنا حيشوف الحالات قلت ليها لو اتصورنا ما تتصوري معانا وبعدين زاتو سامر ليه يحدد ليك تمشي مع منو ومنو ما تمشي معاهو؟ انتي طيره ساي تخليهو يمشي كلامو عليك ،قالت لي بعدين لمن تحبي حتعرفي انا بعمل كدا ليه قلت ليها انا زاتي ما بحب لي زول معقد زي سامر دا يختي بري حمانا الله، قعدت تضحك قالت لي هييي الا سامر الزمي حدودك ،قلت ليها مشششم يلا يلا ماجد دا قاعد يتصل قالت لي جمان ياخ ،قلت ليها هسس ولا كلمه يلا قدامي، بعد نقنقه قامت وهي متردده مشينا ظافر قال لي اووو وين انتي يا بت مختفيه كدا قلت ليهو مع الامتحانات دي قال لي خلاص قربتوا باقي ليكم سمستر واحد، خلود قالت لي والله تندموا اخير ليكم الجامعه دي ساي العطله ما سمحه ، قلت ليها والله سمحه بس نتخارج من الجامعه دي ، نهى قالت لي على فكرة زعلانين منكم ما جيتو المناقشة ، ظافر قال ليها انتي لسه معلقه المناقشة ليها كم شهر هسي😂 قلت ليها براك كنت عارفه ظروفنا ، قالت لي صحي انكل محمد بقى كيف(طبعاً نهى نوع البنات الحنكوش والرقيق داك) قلت ليها كويس الحمدلله ، قالت لي الحمدلله ،قايز الشمس دي حاره ورونا هنمشي وين ، ماجد حاكاها بي دلع كدا وبقى بهبب بالورقه الفي يدو :اها يا قايز الشمس دي حاره هنمشي وين ، ضحكنا ضحك ماجد دا يخلو ليهو المحاكاه بس🤣 نهى ضربتو في ظهرو وقالت ليهو: هي احسن ليك ما تحاكيني ،عاينت لي ظافر كانت ماسكاهو من زراعو قالت ليهو عاجبك صحبك يتريق فيني كدا؟.
