الماضي...
كنت في عمر ال٦ سنين جيت جارية وانا شايلة مجلة في يدي.. بابا بابا شوف الاصدار الجديد نزل ورويدا جابتو لي.. قبل ما ادخل سمعت صوت صريخ طالع من الغرفه وقفت وعاينت بفتحة الباب
"كوثر انتي عايزه تصلي لشنو ؟؟" ربعت يدينها وقالت ليهو طلقني يا فوزان
" اطلقك؟ دا الانتي عاوزاه يعني؟؟"
" ايوه لأني زهجت وقرفت من العيشه دي اي حاجه انا عايزه اعملها انت بقيف لي عائق فيها وكلو عشان شنو؟ عشان ما يقولوا مرت فوزان سافرت مع المدير بتاعها ومرت فوزان بتقعد في الشغل لنص الليل ومرت فوزان فعلت ومرت فوزان تركت، ياخ حريقة في الناس وفي فوزان"
رجعت ورا من الباب والمجله وقعت من يدي لمن شفت الكف الاداهو ابوي لي امي قال ليها انتي طلقانه والبنات تشوفيهم في احلامك تاني ...
مسكت خدها وكوركت ليهو ياخ سوقهم وريحني منك ومنهم.. اول ما طلع وشافني واقفه اتخلع جا علي وهو بقول رشويه حبيبتي مالك؟.. بقيت راجعه لي ورا وساكته فتح يدو وقال لي تعالي لي بابا عشان ماشين.. هزيت راسي وانا لسه راجعه، خلاني ودخل غرفتنا لقا رويدا راقده ومركبة السماعات قال ليها جيتي متين؟ قالت ليهو من شوية .. قال ليها قومي لمي ملابسك وملابس اختك ماشين.. طلعت السماعه وقالت ليهو وين؟؟ قال ليها بيت ناس جدك، قالت ليهو اوكي تمام
رويدا كانت شايلة شنطة ظهر فيها ملابسها وملابسي وبابا شايل شنطتو وماسكني من يدي.... قعدنا في بيت جدي الكان مقفول من زمن حبوبة وجدو اتوفو، عدت شهور وايام بدون ما امي تسأل عننا تاني، رويدا كانت بتطلع بدري وابوي بجهز لي رشا الشنطه وفطوري ويوصلني المدرسة حتى يمشي شغلو، وبعد يرجع بجهز لينا اكل بكرا من بالليل انا كنت بقعد مع جيرانا لحدي ما رويدا تجي... يوم بابا جاني بيت الجيران بعد المغرب سأل اذا رويدا جات ولا لا مرت جيرانا قالت ليهو "جات ساقت رشا غيرت ليها واكلتها وتاني طلعت هي زاتا غيرت ملابسها قالت لي اكلمك انو ماشه تقرا مع صحبتها وبتجي متأخر" ... رغم اني كنت صغيرة لكن فهمت انو ابوي الكلام ما عجبو رجعنا البيت ونمت خليتو صاحي... تاني يوم صحيت بصراخ امي كانت بتكورك وتقول لي ابوي "امنتك على بناتي واهملتهم لمن قتلوهم لي وااااي يا بتي الحرقتي حشاي وااااي انا من وجعتك" ما كنت فاهمه حاجه فجأة البيت اتملى والناس كلها كانت بتبكي... الكم يوم البعديها كلها كانت كدا امي اليوم كلو بتكون حاضناني وما بتخليني اطلع من جمبها، يوم البيت كان فاضي طلعت من الحمام لقيت امي وابوي بتشاكلو
" ما بتسوقيها يعني ما بتسوقيها كلامي دا ما بعيدوا تاني"
" داير تهملها لي زي ما اهملت اختها واجي القاها مقتولة؟"
" بقت بتك هسي؟ مش قبل كم شهر قلتي لي سوقهم وريحني منكم؟"
" وقتها انا كنت متعصبه وما واعيه لنفسي بقول شنو وانت ما حتجي تحاسبني لأنو المفروض يحاسب التاني ف هو انا ما انت"
