تاني يوم كان جمعه.. لمن صحيت لقيت يارا نظفت البيت كلو ومولعه البخور قلت ليها انا جريت النومه ولا شنو قالت لي لالا الساعه ٧ الا .. قلت ليها ان شاء الله كل يوم يكون يوم النتيجه، قالت لي ما تفرحي يا ماما مخليه ليك العده والمطبخ وما تنسي الغسيل عليك الليله.. قلت ليها شكراً على التذكير، امي قالت لي خلي الغسيل بكرا الليله جايين اعمامكم وعمتكم امشو لي الخدار دايرة لي بطاطس وجزر وجيبو معاكم فاصوليا من الدكان لكن اعملو القهوة اول ابوكم بجي هسي .. قلت ليهم وينو هو.. يارا قالت لي ساق ياسين الصالون.... عملت القهوه وبعد ناس ابوي جو ختيتها ليهم كنا قاعدين كلنا حتى سليم جا معاهم قال سيد الصالون عندو مناسبة اخوهو عزم الشغالين كلهم وقفلو الصالون، يارا قالت لي ابوي اها يا حاج قلت لينا التلفونات بعد النتائج، سليم قال ماف واحده بتشيل تلفون قبل ما تنزلو الجامعه.. يارا قالت ليهو انت اطلع منها انا بتكلم مع ابوي.. امي قالت ليها هسي دا ما وقت تلفونات شايفه وضعنا دا انتي، يارا قالت ليها خلاص خليناهو الزول ما يفتح موضوع جمبكم نهائي، ابوي قال اول ما الله يسهل بجيب ليكم.... لمن مشينا الدكان قلت لي يارا امي مالا الليله زهجانه كدا.. قالت لي امس وقت مشيتي المدرسة وابوي جا شاكلها قال ليها ليه خليتيها تمشي براها من الوقت داك زهجانه... ... لمن رجعنا قلت ليها امي انتي زعلانه من ابوي ،قالت لي ازعل منو ليه، قلت ليها امس مش اتكلم معاك؟ قالت لي ما صح انكم تدخلوا في مشاكلنا انا وابوك، قلت ليها لكن هو شاكلك بي سببي.. سكتت وواصلت شغلها في المطبخ
بعد الفطور اعمامي جو باركو لينا وجابو البارد والحلاوة عمتي قالت لينا ما شاء الله نسبكم ترفع الراس والله.. رهف قالت لي يارا اها يا الغتيته ما قلتي انا ما بجيب حاجه ما تركزو علي، يارا قالت ليها انا زاتي اتفاجأت بي اني طلعت غتيته ههههههه.. خالتو رنين قالت لينا اها ناوين تقدمو شنو ووين، يارا قالت ليها انا زمان عايزة هندسة طبية، قالت لي انتي طب يا ياسمين مش؟ قلت ليها ما عارفه والله ما اظن نسبتي تدخلني بقدم ولو ما شالوني حاضطر اعيد.. امي قالت لي تعيدي كيف ماف كلام زي دا لو ما شالوك في الحكومي نقدم ليك في الخاص لكن الاعاده دي ما ضمان، عمتي قالت لي نسبتك كويسة والله ضياع زمن ساي تعيدي تاني.. حنان مرت عمي سمير قالت لي يارا انتي غايتو تنومي على العسل، يارا قالت ليها دي مشكلة ناس الاحياء انا حتى لو كنت جبت نسبة ياسمين كنت حانوم على العسل
_ _ _ _ _
امير: اسلام ادخل شوف الناس ديل اتأخرو ليه انا حامشي مع مارفي نجيب ناس عمي اسعد اتأكد اذا الحلل تامه كلها، علا عليك الله امشي معاهو انتو النسوان بتعرفوا الحاجات دي اكتر مننا
جرا مارفي وطلعو
ريان: الولد دا ليه لحدي هسي ما جا؟؟ كل سنه الشغله كلها تبقى فوق الولد المسكين دا؟ امبارح قال بجي الصباح بدري هسي الظهر قرب ولسه ما ظهر
