الثلاثاء 4:30pm
في بيت عادي من غرفتين وصالة صغيره في نهايتو مطبخ ومعاهو عريشه من الحصير حوش كبير وحمام بلدي وراهو حمام استحمام، كنت راقده في الحوش ريناد بعد رشتو وكنستو رمت المكنسه وقعدت تكورك قالت لي جمان هي انا خلاص غلبني وكتر علي الحمدلله راجعه بيتنا بعد دا، قلت ليها ارجعي ساي بجيب وحده تشتغل لي، قالت لي شوف دي بالله دي جزاتي يا جزمه، جويريه جات طالعه من العريشه قالت ليها انتي لو بتشتغلي بدون نقه ماف زول بعلق ليك ،ختت الفرشه والمشط والزيت في التربيزه الجمبي وقالت لي قومي يلا، قعدت في السرير وهي قعدت على ركبها وبقت تسرح لي ريناد قالت لو اشتغلت للصباح ما بعجبكم عشان كدا خلوني اتكلم ساي وافضفض،ضحكنا ضحك جويريه قالت ليها تفضفضي مالك ان شاء الله راجلك طلقك ولا عيالك ما بسمعو الكلام، قلت شكلها كدا متشاكلها مع نسيبتها😂 عاينت لينا من فوق لي تحت ولوت خشمها ودخلت جوا، قلت لي جويريه براحه عليك الله، قالت لي دايره اسرح ليك كيف قلت ليها اعمليهم كعكتين بس، قالت لي على فكرة تهاني قالت ما حتقدر تجي المحل باقي الاسبوع دا، قلت ليها مالا؟ قالت لي اتصلت لي الصباح وقالت اختها وضعت وحتقعد معاها اليومين ديل قلت ليها معناها حتشتغلي انتي بدلها، قالت لي اي الا كدا ..بعد سرحت لي قالت لي الوقت اتأخر نطلع بعد دا ،قلت ليها استنو ايهاب يجي يرجعكم قالت لي لالا ياخ كدا حنتأخر ، بقت تنادي في ريناد جات شايله شنطة الظهر وشنطة يد في يدها ومعاها مرام، مرام قالت طالعين بعد دا؟ جويريه قالت ليها اي نطلع قبل المغرب ،ريناد ادتها شنطة الظهر قالت ليها هاك شيلي شنطة المدرسة دي انا كتفي وجعني من الرش والكنس، جويريه قالت ليها انتي بتشيلي دي كل يوم معاك المدرسه؟ قالت ليها فيها غيارات يابت.. ريناد وجويريه طلعو ومرام قعدت في السرير القصادي قلت ليها يا حليلها ريناد كانت عامله لينا جو، قالت لي فقدتها والله بي نقتها الكتيره دي، قلت ليها حنمشي بكرا للدكتور يحدد ليك المواعيد قالت لي اي متذكره، حسيت بيها متوترة قلت ليها خايفه؟ هزت راسها يعني اي ، قلت ليها نفس الشي لكن لمن اتذكر انو حيكون عندي بيبي واربيهو ويملى علي دنيتي بنبسط شديد، قالت لي مرات بفكر كدا لكن لمن اصل لي حتة انو بتي حتكبر بدون ابو الدنيا بتضلم في وشي💔، ما عرفت ارد بشنو سكت وانا بعاين ليها دموعها بدت تنزل وعيونها حمرت قالت لي ليه الانسان دا بحب يحقر نفسو كدا؟ في لحظه واحده ممكن يتصرف بطريقه تخليهو يتفادى الف مشكله في حياتو لكن بكون عارف وبعاند، ليه نحن بيدنا بنفتح ابواب ما قادرين ندخل منها ولا نرجع نقفلها؟ ليه بس ليه انا عايزه افهم ليه نحن بالغباء دا، سكتت شويه بعدين قالت لي انا زاتي بقيت ما فاهمه نفسي مرات بحس اني كنت بحبو شديد ومرات بحس اني بكرهو كيف قدر يغشني كدا وانا كنت بصدق اي حرف يقولوا لي مرات بقول لي نفسي يمكن كان بحبني بالجد.. ضحكت في نص الكلام بعدين واصلت للدرجة دي انا غبيه تصدقي ؟ للان خاته في بالي انو ممكن يكون بحبني، حاقول ليك حاجه لكن ما تزعلي مني، نفسي اشوفو والله يا جمان ما عارفه حاعمل شنو اعاتبو ولا اضربو ولا انسى اي شي عملو فيني واعاين ليهو بس، ما عارفه ليه ما قادرة اشيلو من بالي ما عارفه ياخ، ليه يعمل فيني كدا ليه بس انا ما حصل زعلتو ولا غلطت في حقو ودائماً كنت بعتذر حتى لو هو الغلطان ياريتني سمعت كلامك وما اتكلمت معاهو ياريتني مت قبل ما اعرفو ولا اشوف وشو💔💔💔 غطت وشها بالتوب اللابساهو وبقت تبكي وتشهق قمت قعدت جنبها وضميتها علي ما قدرت انطق بأي كلمه ما اظن في كلام حيقدر يخفف عليها وجعتها دي.. بعد مسافه رفعت راسها وقشت دموعها قالت لي بكرا عايزه اشوف ابوي بعد نرجع من الدكتور نمشي ليهم، قلت ليها ما بنفع لكن يا مرام، قالت لي عليك الله يا جمان عايزه اشوفو بس بأي طريقه ، قلت ليها طيب انا بتصل عليهو واكلمو يجينا، قالت لي لو ما جا انا حامشي ليهو بس ما بهمني حيعمل لي شنو، قلت ليها بحاول اقنعو.. اللحظه دي ايهاب جا داخل فتح الباب ودخل عربيتو ،مرام صلحت التوب ومشت اتوضت ودخلت جوا ايهاب جا نازل وهو لابس الابرول بتاع الميكانيكيين وكلو زيت قال لي طلعتي لي غيار؟ قلت ليهو لالا ،قال لي انا يدي وسخانه حادخل الحمام جيبيهو لي، قلت ليهو مالك جاي كدا يدك زاتا ما مغسله، مشا على الحمام وقال لي نفسي يوم تعملي الحاجه وما تسألي كتير ، قلت ليهو انا كلامي كتير؟ شوف زول يجيب ليك غيار يلا، ما اشتغل بي ودخل الحمام، انا مشيت صليت وبقيت قاعده في مصلايتي وبدعي سمعتو بكورك لي قلت ليهو مالك؟ قال لي انتي يا مرا جنيتي ولا شنو غياري وينو انا مستنيك لي ساعه ، سكت ما رديت كورك لي تاني جمااان، قلت ليهو ما عايزه اتكلم عشان ما تقول لي اسئلتي كتيره، قال اللهم طولك يا روح يا بت الناس البرد قتلني قومي.. قمت من المصلايه طلعت ليهو ملابسو ومشيت اديتهم ليهو مشيت المطبخ لقيت مرام بتسخن الاكل قالت لي مالكم بتكوركوا من قبيل قلت ليها اه انسي.. ختينا الغدا مرام ابت تقعد معانا قالت لي باكل بعدين بعد العشاء رقدت نمت طوالي
