حسام جا داخل البيت وشايل بستلة اللبن وكيس العيش دخل المطبخ فرغ اللبن في الحله ووطا النار عليهو طلع من المطبخ ومشا الغرفه الواقفه في نص الحوش الكبير لقا امو صحت جا باس راسها وقعد جمبها قال ليها كيف اصبحتي يمه قالت ليهو تمام ياولدي قال ليها قومي اوصلك الحمام قالت ليهو قبييل صحيت انا صليت قبل شويه ورقدت قبلي قال ليها امي انا ما قلت ليك ما تقومي براك؟ قالت ليهو اجي يا ولدي انا البيت دا قاعده فيهو تلاتين سنه والعشرين سنه الاخيرات ديل كلهن ما شايفه فيهن البيت دا انا حافظاهو اكتر من اسمي واسمك مسح على راسها وقال ليها برضوو يمه ما تقومي براك وانا قاعد في البيت قالت ليهو سمح قوم جيب لي الشاي حسام قام جهز كبايتين شاي ختاهم في الصينيه وجمبهم عيشتين ومشا لي امو ختا التربيزه قدامها وقال ليها يلا قومي الليله العيش سخن كمان ساعدها لمن قامت و قالت ليهو هي ذكرتني امس جويريه جابت ليها صحن كيك ما اكلنا منو لمن طالعه قالت لي ختيتو ليك في الفرن لمن حسام يجي خلي يشرب بيهو شاي المغرب احيااا يا ولدي نسيتو عديل ضحك وقال ليها ما مشكله نسيتيهو لي خير عشان ناكلو سوا قام جابو وقعد جمب امو لحدي ما شربو الشاي جاب ابريق مويه غسل ليها يدها ومشا يجهز عشان يطلع على الجامعه
جا طالع من الحمام لابس البنطلون ومعاهو فنيلة كان بصلح في البنطلون رفع راسو بي خلعه لمن سمع صوت صرخه صغيره شافها مقبله بالجهه التانيه قالت لي معلييش معليش يا حسام والله ما قاصده قال ليها ما مشكله يا جويريه خشي لي امي جوا قالت ليهو وقميصك؟ قال ليها قاعد في السرير مديهو لي ، جويريه جرت بي سرعه دخلت الغرفه وبقت تفتش في القميص حجه حليمه قالت حسام؟؟ جويريه قالت ليها دي انا يا خالتي قالت ليها مالك يا بت في حاجه جويريه شافت القميص السماوي الكان في السرير التاني ووقفت جمب الباب تنادي حسام ، حسام جا شال القميص وجويريه ختت يدها في صدرها واتنهدت قبلت على حجه حليمه وقالت ليها صباح الخير ، قالت ليها شكلو دا ما صباح خير الليله جويريه قالت ليها ما شاء الله عليك يا خالتو حليمه تقول شايفه حالتي قالت ليها انا عيوني ديل بشوفن الما بتشوفو انتو، حسام جا داخل سلم على جويريه وشال شنطتو باس امو في راسها وقال ليها يلا يا حجه توصيني بي حاجه؟ قالت ليهو سلامتك بس ، عاين لي جويريه وقال ليها تعالي دقيقه طلعت وراهو وبقت واقفه قدامو هبش جيوب الشنطه لحدي ما لقى الجزلان طلعو وبقى بعد في القروش جويريه قالت ليهو يا حسا.. قاطعها وهو بعد في القروش قال ليها كل اسبوع حنتناقش في الموضوع؟ اداها عشرة الف وتاني طلع خمسه قال ليها لو في شي ناقص في البيت جيبيهو شايف التلاجه فاضيه، ابتسمت وهزت راسها وحسام طلع
____
قمت بي صوت منبه عمتي سعاد لقيتها تلبس في عبايتها قلت ليها الساعه كم؟ قالت لي ٥ ونص قلت ليها شكلك صاحيه من بدري قالت لي ما بقدر انوم وقت اكون مسافره قمت من السرير طلعت لقيت عمتي خديجه تلبس في جزمتها بقيت واقفه متكله في الباب وبعاين ليها ، اكتر من ٩ شهور عماتي قاعدين معانا يعني قريب السنه اتعودت عليهم شديد عمتي خديجه بي نقتها وشكلها لينا وعمتي سعاد بي طبطبتها علي تفوز بأكتر زول وقف معاي واستحملني فترة وفاة امي .. عمتي خديجه رفعت راسها ووقفت قالت لي بسم الله خلعتيني مالك واقفه كدي مشيت حضنتها بدون مقدمات قلت ليها حاشتاق ليكم شديد ربتت على كتفي انا زاتي حاشتاق ليكن ولي شغبكن ومناقرتكن ، جات رهام داخله شايله صينية الشاي ختتها وقعدو كلهم يشربو الشاي خليتهم مشيت صليت وقبل اطلع من الغرفه عاينت لي خالتي الكانت راقده في السرير القصاد سريري ، قبل ما ابدا افكر في موضوع امس جات رهام وقفت جمب الباب قالت لي عماتك طالعين تعالي سلمي عليهم مشيت لقيت مرام تسلم عليهم وتبكي عمتي سعاد قالت لي رهام البت الحساسه دي ابقي عليها عشره من اقل شي تبكي رهام قالت ليها مالو الحنيه سمحه، قلت ليهم ريناد ما صحيتوها ولا شنو عمتي خديجه قالت لي خليها نايمه تقعد تبكي لينا هسي زي اختها دي ، ابوي جا بي باب الصالون وهو بلبس جلابيتو قال ليهم اتأخرنا يلاكم سريع سلمنا عليهم ووقفنا جمب الباب لحدي ما عربية ابوي اختفت من الشارع دخلنا ومرام لسه تبكي قلت ليها غايتو انتي خلاص تاني ما بتسكتي باقي اليوم دا مشت بدون ما ترد علي ، انا كنست الحوش ودخلت المطبخ بديت اعمل في البسبوسه اول بعد خلصتها رشيت فيها جوز هند و عملت كيكة الشوكولاته اول ما خلصت رهام جات قالت لي ما شاء الله عملتيهم متين قلت ليها هسي ، كنت عامله اربعه صواني اتنين كبار واتنين صغار قلت ليها الاتنين الصغار ديل للبيت والكبار شايلاهم معاي الجامعه عاينت لي باستغراب قلت في نفسي اها دي حتتدخل كمان في شغلي؟!! لمن لقيتها لسه بتعاين لي قلت ليها عندنا بازار الليله في الجامعه وانا صحبتي متفقين هي تعمل سينابون وورق عنب وانا اعمل البسبوسه والكيك قالت لي ايواا وابوك عارف؟ قلت ليها اي كل بازار بنعمل كدا
