عاينت للساعه وقلت ليهو انا حاقوم بعد دا قال لي الوقت اتأخر نقوم طيب، استاذ حسام قام وانا قمت وراهو فجأه الناس كلها بقت جاريه علي مدخل الكافيه عاينت لي استاذ حسام قلت ليهو في شنو قال لي ما عارف، مشى على الباب وانا مشيت وراهو فجأة اشوف ماجد واقع في الارض وجسمو كلو بتهز زي الضارباهو كهرباء وخشمو مطلع ذبد بقيت واقفه ومبحلقه فيهو استاذ حسام هبشني في كتفي وقال لي جمان ؟؟ قلت ليهو هاا قال لي ساعه انا بنادي فيك رجعت عاينت مكان ماجد كان واقع لقيتهم شالوهو واتحركوا ، قال لي انتي كويسه؟ قلت ليهو ماشه البيت ،قال لي شكلك ما عاجبني تعالي اقعدي اشربي ليك مويه ، رفعت يدي وهزيتها قلت ليهو ماشه البيت بس قال لي كويس تعالي طلعنا ووصلني لحدي العربيه قبل ما اركب قال لي حتقدري تسوقي؟ هزيت راسي يعني لا قال لي طيب جيبي انا بسوق ، اديتو المفتاح واتحركنا الطريق كلو كنت سرحانه في المنظر الشفتو استاذ حسام كان كل شويه بحاول يفتح معاي موضوع وانا لو رديت بهز راسي ب اي او لا بس ، فجأة قال لي بتعرفي الزول دا انتي؟ عاينت ليهو وسكت قال لي دا طالب معانا خريج السنه دي قلت يمكن بتعرفيهو عشان كدا اتأثرتي كدا قلت ليهو ما معرفه شخصيه لكن المنظر كان بخوف قال لي يمكن عشان اول مرة تشوفي نوبة صرع قلت ليهو صرع؟ قال لي اي حصلت ليهو مره في محاضرتي وعرفت انو عندو صرع ،سكتنا تاني ما اتكلمنا الا في وصف البيت ، وصلني ونزلنا قلت ليهو اتفضل قال لي لالا امشي انا قلت ليهو تمشي كيف يا استاذ بعد ما وصلت البيت تعال خش ، لقيتو متردد جريت السلك وقلت ليهو صلي المغرب وامشي عشان الزمن ما يضايقك ، جينا داخلين لقينا السراير مفرشه في الحوش ابوي راقد في واحد والتاني راقد فيهو علي ، ابوي لمن شافنا قام على حيلو وسلم على استاذ حسام قلت ليهو دا استاذ حسام يا ابوي استاذنا في الجامعه قبيل هبطت وما رضى يخليني اجي براي وصلني ،ابوي سلم عليهو تاني كويس وقال لي مالك يا بت الهبوط دا اتلحك كدا ،عاين لي الاستاذ وقال ليهو اتفضل اتفضل يا ابني ، قعدو وانا دخلت جوا لقيت مرام طالعه قلت ليها ماشه وين قالت لي ابوي ناداني قلت ليها اصبري ما تمشي هسي قالت لي في شنو؟ قلت ليها في ضيوف برا قالت لي ضيوف؟؟ قلت ليها استاذي في الجامعه قعدت تعاين لي باستغراب قلت ليها قبيل تعبت وعشان ما اسوق براي جابني هو قالت لي اااا ، عاينت لي وقالت دا فستان جديد ولا شنو؟ اتذكرت انها ما شافتني لمن طلعت قلت ليها اي جديد ، دخلت الغرفه قلعت الفستان ولبست لي بجامه و توب طلعت المطبخ كنت متوقعه القى رهام وخالتي هناك ولا في العريشه لكن ما لقيتهم ..عملت ليهم شاي لبن وفتحت التلاجه لقيت في باقي كيكة شوكولاته ختيتها في الصحن وشلت الصينيه طلعت الحوش وناديت علي جا شال الصينيه ومشا ، دخلت جوا ومشيت على غرفة اخواتي لقيت مرام كالعاده بتقرا وريناد راقده وشايله ليها تلفون اول ما شافتني نطت من السرير وجاتني جاريه قالت لي عايني عايني ابوي جاب لي شنو شلت التلفون وقلت ليها ايفون كمان قالت يسس ايفون١١ قلت ليها وفاتحاهو من هسي مالك، شالتو مني ورجعت سريرها قالت لي مالك انتي قلت ليها ريناد احسن ليك ما عايزه قلة ادب انا اقفلي التلفون دا وافتحيهو في الاجازه اصلا امتحاناتكم باقي ليها اسبوع قالت لي ياخ حاقفلو اصبري اشوف الحاجات الفيهو قلت ليها استغفر الله العظيم ، مشيت قعدت جمب مرام وما كنت عارفه اقول شنو عاينت لي وقالت لي مالك؟ قلت ليها ليه ما بتوريني انك ما قاعده تمشي الحصص ؟ اتخلعت ووشها حمر اصلها حلبيه اقل شي وشها ببقى زي الطماطم قالت لي انا قلت ليك ما محتاجه ليها شديد الحصص دي ، بس الكيمياء وعندي باب واحد بس الما فاهماهو بتاع العضويه قبل ما ارد باب الغرفه ضرب قلت اتفضل علي قال لي عمي محمد قال ليك تعالي استاذك دا طالع ، مشيت لقيتهم واقفين جمب الباب قلت ليهو شكراً ليك يا استاذ ما قصرت قال لي العفو ما عملت الا الواجب ، ابوي برضو اتشكروا وكان عايز يقدمو لكن استاذ حسام حلف قال اصلا مشوارو ما بعيد شديد ، المهم هو مشى ونحن دخلنا ابوي قال الله يديهو العافيه ولد اصول هزيت راسي بعدين قلت ليهو الليله محتلين حوشنا مالكم قال لي الحوش البي هناك ما بترقد سخن قلت ليهو ايواا، مشيت اتوضيت وقبل اصلي المغرب العشا اذن صليتهم سوا ورقدت اتذكرت ماجد وقلبي وجعني عليهو قمت عشان اشيل تلفوني تاني رجعت لأني عارفه عوراتو البعملها مشيت غرفة ناس مرام قلت ليها مرام عايزه تلفونك قال لي شيليهو من الدولاب شلتو وقلت ليها ح استخدمو لحدي ما اصلح الهكرة بتاعي دا قالت لي ما مشكله اصلا ما محتاجه ليهو هسي قلت ليها انتي رهام وخالتو جميله وينهم؟ قالت لي خالتو جميلة قالت لي خالتو رهام ارح اعرفك على الجيران قلت ليها خالتي؟؟ قالت لي اي شايفاها عجبتها ودخلت ليها راسها، عاينت لي ريناد لقيتها لسه ماسكه تلفونها خطفتو منها وجريت جات جاريه وراي قالت لي يا زوله جيبي التلفون دا ما بهزر معاك
