"رشا"
قال لي بصوت واطي وهو مركز مع الناس الواقفين قدامو وبياخدو ليهو صور مع لوحتو : اتأخرتي مالك؟.. رجعت شعري لي ورا وابتسمت للقطة الصورة الاخدتها البت لينا التلاته، قلت ليهو خلي الناس تخف.. قبل ما يرد واحد قال ليهو يا فنانا ممكن تبتسم ما ممكن واقفين ساعه عشان ناخد ليك صورة زي الناس .. يمينو كنت انا وشمالو نور، قالت للولد ما تعذب نفسك ساي اذا وقفت لي بكرا ما حيبتسم ليك، بصوت واطي قلت ليهو حاول ابتسم لجماهيرك مجامله ساااي.. ايمن ابتسم وبعدها اخدو ليهو كم صورة براهو ومعاهو نحن حتى مشو .. عاين لي قلت ليهو نسيت مفتاح الشقه في المكتب واضطريت ارجع تاني عشان اجيبو وفي الرجعه الشارع كان زحمه عارف انت قريب للمغرب الشوارع بتكون كيف.. قال لي كان في داعي ترجعي؟ ما تجي من المكتب طوالي، قلت ليهو بتهزر صح؟ عايزني اجيك ببدلة الشغل ونفسنة الشغل وبي تعبي داك.. قال لي يعني لمن مشيتي البيت ارتحتي والنفسيات اتصلحت؟ قلت ليهو حمام داااافئ روح لي تعب اليوم كلو... رفعت فستاني بطرف اصابعي وقلت ليهو وفستان رااقي عدل لي مزاجي، نور قالت ليهو بيبي قلت حتوريني باقي اللوحات يلا خلينا نشوفهم، عاينت ليها وقلت بصوت ما مسموع استغفر الله ياربي، ايمن قال ليها لسه الناس بتجي تصور وتسأل من الرسمه خليه لبعدين... نور عاينت للوحه الكانت عبارة عن وش بت مغمضة عيونها وبتضحك وجزو من خصلات شعرها نازل على وشها مرسوم بادق التفاصيل، طلعت تلفونها وبقت تعاين ليهو و للرسمه قالت ليهو ايمن بالجد كدا انت ما طبعت الصورة دي وعملت ليها برواز وجيت علقتها هنا ، ايمن رفع حواجبو ومط شفايفو... قلت ليها شكلك اول مرة تشوفي لوحه لي ايمن، بالمناسبه اللوحه بتاعو المعرض الفات كانت احلى وفيها روح كدا، نور عاينت لي ايمن وقالت ليهو كانت شنو؟ ايمن قال ليها بفتش الصورة وبرسلها ليك... نور بصوت مايع قالت ليهو لا لا عايزه اعرف حالا.. قال ليها كانت مطبخ تقليدي وفيهو مرا بتعوس وجنبها طفلة بتلعب بي عروسه، نور قالت ليهو اممم ما شفتها لكن اي ثينك انو دي احلى.... قلت ليهو امير وينو ما جاي ؟ .. قال لي جا قبل شويه وطلع سريع، قلت ليهو مالو المره دي ؟ كان بقعد لنهاية المعرض ولو ما اخد معاك كل الصور ما بمشي🤣 ايمن قال لي عندو موضوع.. نور قالت ايمن يااخ عايزه اشوف اللوحات، عاين لي و قال روش ارح طيب دي ما حتسكت لو ما لفت بينا المعرض كلو، قلت ليهو لا انا حاقعد هنا لأني تعبانه... مشو الاتنين وانا قعدت بقيت بعاين ليهم قلت في نفسي لو دي كنت انا اتلايقت فيهو كدا كان اداني نهرة ولا حمر لي
قعدت ساعه حتى المعرض انتهى، نور كانت لافه مع ايمن ما جو الا في النهايه، ما صدقت لمن خلص لأني كنت تعبانه شديد طلعنا نور ركبت مع ايمن وانا ركبت عربيتي، بعد وصلت استحميت وشلت كم ملف مفروض اراجعهم عملت نسكافيه ومشيت البلكونة قبل ابدا فيهم اتصلت لي ايمن قلت ليهو مبروك، قال لي على شنو؟ قلت ليهو خسارة الوظيفة للمره المئة بعد الالف، قال لي الله يبارك فيك.. قلت ليهو الحصل شنو سألت مستر عامر وابى يوريني قال لي اسألك انت، قال لي زهجت وجو الشركة ما نفع معاي.. قلت ليهو اهااا بعد اكتر من ٦ شهور جو الشركه بقى ما عاجبك؟ السبب نور صح؟ قال لي روش ما تلعبي معاي ضاغط، قلت ليهو الموظفين عرفو بعلاقتكم وقلت تنقذ واحد فيكم قبل مستر عامر يعرف ويفصلكم الاتنين من الشركه.. قال لي ما انتي عارفه بتسألي ليه تاني، قلت ليهو انت كنت عارف بالقانون دا ليه حبيتها من الاول، قال لي في زول بسأل زول حبيت ليه؟ بعدين انا ما حبيتها براي يعني ما حب من طرف واحد.. قلت ليهو طيب كنتو تتحاسبو الاتنين ليه تشيل المسؤولية انت، قال لي روش روقي اول مرة ولا اخر مرة افقد وظيفه؟ اخدت نفس وقلت ليهو صح كلامك صح جدا.. قال لي اسف، قلت ليهو على شنو؟ قال لي لأنك تعبتي عشان اتقبل في الوظيفة دي، قلت ليهو عادي برضو ما اول مره، انسانا من الموضوع دا عشان مرارتي حتتفقع، موضوع امير كان بت ظافر صح؟ قال لي اي، قلت ليهو جايه الليله يعني؟ قال لي ايوه وظافر طلب مننا كلنا نكون قاعدين لمن يجو... قلت ليهو حتمشي ليهم يعني قال لي ان شاء الله..
