طلعت من غرفة العمليات ومشيت غرفة الدكاترة المشاركني فيها دكتورتين لمن دخلت ما كان في زول طلعت اللابكوت وشلت تلفوني من الدرج قلت جدو حيكون عذبو شديد وهو اصلا ما عندو اخلاق للاطفال.. اتذكرت الصباح لمن قال لي الليله اخدت اجازه مخصوص عشان جدو قلت ليهو ان شاء الله بس ما تندم.. شالو وقال ليهو حتخليني اندم؟ جدو هزا راسو يعني اي قعدنا نضحك فيهو... اول ما فتحتو جاتني مكالمة فيديو ابتسمت وفتحت الخط شفتو واقف فب المطبخ قلت ليهو شكلو عذبك شديد.. قال لي لالا امورنا ظابطه وبنعمل لينا حاجه نتغدى بيها.. قلب الكاميرا ووراني ليهو وهو قاعد في الارض وحوالينو العابو ماليه الصاله وبحضر في اغاني اطفال ومندمج.. قلت ليهو عايزه قبل ما ارجع القى الصاله دي تلمع، قال لي هسي مالا؟ قلت ليهو وريتك بس.. قال لي انتي بس تعالي، قلت ليهو عندي بيشن امر ليهو وحاطلع اااا صحي حاغشى ناس امي يعني احتمال كبير اتأخر للعشاء كدا، قال لي اخدي راحتك مستنيك انا يلا يا قلبي.. جدع لي بوسة وقفل
🌸🌸🌸🌸🌸🌸🌸🌸🌸🌸🌸🌸
سمعت صوت ابوي بكورك و بقول ليها رشا عايني قدامك رشا الدفار... بعديها الخط فصل مسكت في يد ايمن لمن حسيت راسي لفا، مسكني وقال لي ياسمين اهدي ما حيحصل شي استني حاتصل ليها تاني.. قعدني في مصطبة الصيدليه بقيت ببكي وخايفه يكون حصل ليهم شي وهو بحاول يتصل لكن ما كانت بترد قلت ليهو ايمن انا دايرة ابوي وديني لي ابوي هسي دا بس..
__ _
لمن انتبهت للدفار الجاي باللفة لفيت سريع ايهاب قال لي دا شنو البتعملي فيهو دا ناويه على شنو انتي؟ عاينت ليهو وابتسمت بعدين رجعت قبلت قدامي قلت ليهو ما بشبهها؟ قال لي منو؟ قلت ليهو رويدا اختي... سكت ما رد علي عاينت ليهو بالمرايه لقيت ملامح وشو كلها اتغيرت قلت ليهو متذكرها يعني؟ السنين دي كلها ما نسيت؟.. استفدت شنو بعد دافعت عنو وخليتهم يطلعوه؟ شوية القرشين الاخدتهم منهم؟ عملو ليك شنو وريني، خلوك تنوم وانت مرتاح بالليل؟.. قال لي انا ما اخدت منهم ولا قرش، صدقيني انا ندمان يا رشا عارف مهما اعتذرت ليك ما حترضي لكن ما كان عندي خيار تاني .. ضحكت وقلت ليهو صدقت والله، احساسك حيكون شنو لو وحده من بناتك كانت مكانها وانا دافعت عن القتلها؟ عارف بعد رويدا ماتت انا عشت شنو؟ فقدت ابوي واصلا ما كان عندي ام بقيت وحيده ماف زول كان بكون جمبي ويشاركني فرحتي ولا زعلي كلهم مشو.. كلامك دا غير بستفزني اكتر ما بعمل حاجه عشان كدا احسن تسكت بس، قال لي طيب انتي هسي دايرة شنو قلت ليهو عايزاك تموت، قال لي رشا بالله عليك اقيفي وخلينا نتفاهم برواق، قلت ليهو ماف شي نتفاهم فيهو اختي ما حترجع وانا اصلا حالحقها قريب فيها شنو لو قربت المده دي؟؟ .. كنا ماشين على استوب قافل اتعديت العربات القدامي وقطعت الاشاره، بعدها ما حسيت بي شي..
_ ___
قمت على حيلي لمن شفت ايمن بتكلم جريت عليهو قلت ليهو قدرت توصل ليهم؟.. كان ساكت وخاتي التلفون في اضانو وملامحو ما عجبتني، جريتو من يدو وقلت ليهو في شنو يا ايمن؟
