"اللحظه البتكشتف فيها انو انت ما انت، حياتك كلها عبارة عن كذبة لا امك هي امك ولا ابوك هو ابوك ولا حتى اخوانك هم اخوانك.... ما اعتقد في اسوء من اللحظه ممكن تمر عليك."
كنت مربعه يدي ومتكله على الحيطه بعاين لباب الغرفه مرة ولي ناس بيتنا واحد واحد مرة.. رغم انو عارفين الحاصل جوا عبارة عن عمليه صغيرة ما حتاخد اكتر من نص ساعه ومرينا بالموقف دا ٣ مرات لكن كنا متوترين كأنها اول مره.. اتذكرت الحصل قبل ٣ شهور لمن الدكتور جا طالع وكلنا جرينا عليهو قال لينا " ولدكم اتجاوز الخطر لكن لسه محتاج نعمل ليهو كم عمليه تاني لأنو الضربه ما هينه ويمكن يعاني من فقد جزئي للذاكرة ساعدوه بأنو يتذكر لكن بدون ما تضغطو عليهو شديد" ... من وقتها ونحن عايشين في حاله رعب دائم وما حصل نمنا كلنا في وقت واحد لازم يكون في زول مساهر معاهو واي صداع يحس بيهو كنا بنجري بيهو المستشفى.. اتقرر ليهو بعدها ٣ عمليات ودي كانت الرابعه والأخيرة...
الباب اتفتح والدكتور جا طالع وهو بطلع السماعه من اضانو قال لينا حمدلله على السلامه بطلنا اتجاوز اخر عمليه بخير وسلامه بعد نص ساعه بتقدروا تدخلو وتشوفوه كلكم وبكرا حيطلع ان شاء الله.... ابوي قال الف حمد وشكر ليك يارب، امي قعدت تبكي ويارا تسكت فيها انا كنت لسه سرحانه سليم قال لي ياسمين انتي كويسه؟ قلت ليهو ها، كويسه اي قال لي سمعتي كلام الدكتور؟ ابتسمت وهزيت راسي قلت ليهو الحمدلله... بعد نص ساعه دخلنا ليهو كان رابطين راسو بـشاش سليم قال ليهو ياسين البطل.. عيونو كانت واقعه ووشو تعبان ابتسم بس.. امي حضنتو وباستو في راسو قالت ليهو الحمدلله حبيبي كلو عدا الحمدلله.. يارا قالت ليهو مصدع؟؟ هز راسو يعني اي ابوي قال لينا خلاص مادام اطمنتو عليهو ارجعو هو زاتو داير راحه.. امي قالت بري انا بمشي بخلي ولدي... ابوي قال ليها جمان دا ما وقت العناد سوقي البنات وارجعي وسليم انت امشي جيب الخروف للكرامه، امي قالت لينا انتو ارجعو عشان تنظفو البيت وتجهزوا الحاجات لي بكرا بكلم عمتكم تجي تجهز معاكم انا ما بمشي... ابوي اتنهد وقال لينا خلاص امشو
الوقت كان عصر طلعنا على البيت وسليم مشا يشوف موضوع الخروف لمن وصلنا يارا قالت لي انتي زاتك عيونك واقعه.. هبشت راسي بعدين يديني قالت لي واي جسمك نار، ما رديت عليها شلت غيار ودخلت الحمام استحميت بعد طلعت قالت لي ننظف هسي ولا الصباح؟ قلت ليها ما عارفه.. قالت لي ارح ننظف هسي عشان الصباح الشغله تكون خفيفه.... بعد المغرب نظفنا البيت ومن التعب رقدنا طوالي يارا عملت لي مكمدات ونامت ...قبلت على الحيطه ودموعي جات جاريه زي كل يوم من يوم سمعت كلام حبوبة رهام وجميله.. ما قدرت افتح الموضوع تاني مع امي وابوي بسبب الوضع النحن فيهو، كل يوم بسأل نفسي الف سؤال ما لاقيه لواحد فيهم اجابه وبدعي انو اكون سمعت غلط ومافي حاجه من الفي بالي صح، حبوبة رهام جاتنا كم مرة لكن ما فتحت معاي الموضوع ... صحينا تاني يوم لقينا عمتي نجوى قاعده قالت لينا جيت امس لقيتكم نايمات، بعد شربنا الشاي يارا قالت ليها اها مفروض نسوي شنو هسي.. عمتي قالت ليها انا ماشه الخدار وحده حتجي معاي والتانيه تقعد تسوي سلطة الجزر لحدي ما نجي شايفه الجزر راقد في التلاجه، قلت ليهم انا بقعد امشو انتو... بعد طلعو بديت اعملو سليم جا قال لي داير لي صواني للحمه ، اديتهم ليهو مشا بعد مسافه جابهم وجا قال لي اها دايره مساعده؟ قلت ليهو طلع لي الذبادي من التلاجه قال لي بس كدا ؟ قلت ليهو ولو فاضي قشر لي التوم... بقى بقشر وبتونس معاي قال لي التقديم بتاعكم حينتهي بعد يومين نمشي بكرا نقدم ليكم، قلت ليهو ان شاء الله...
