بقيت بعاين ليهو ووشي كلو استفهامات وعيت على صوت ابوي وهو بناديني وجاي علينا عاين لي ماجد واداهو السلام ماجد رد السلام ومشا عاينت لي ابوي وقلت ليهو مالك جيت كنت جايه انا قال لي دا منو سكت مسافه بعدين قلت ليهو ما بعرفو شكلو من ناس البيت ارح خلينا ندخل قال لي انا زاتي نسيت الاكياس في العربيه فتح الباب شلت معاهو الاكياس ودخلنا في صاله كدا كبيرة وفي نصها في سلم لقينا اخواتي وعماتي قاعدين جو راجلين شالو مننا الاكياس ووراهم جا راجل تاني سلم علينا وطلع مع ابوي بي باب تاني مشيت سلمت وقعدت كان في مرتين كبار في العمر عرفت انو وحده فيهم رهام وبنتين صغار في عمري او اكبر مني بي شويه عمتي خديجه بدت تعرفنا قالت ليهم دي بت محمد الكبيره كانت في الجامعه وجات مع ابوها وحده من الحريم الكبار قالت لي ازيك با بتي ان شاء الله طيبه قلت ليها كويسه المرا التانيه قالت بتطلع متأخر كدا من الجامعه اصلا؟ بقلبي قلت اكيد دي رهام عمتي سعاد قالت ليها مره مره بعدين قبلت علي واشرت عليها قالت لي دي ريان اخت رهام واشرت على المرا الجمبها ودي رهام زوجة ابوكم ان شاء الله ابتسمت وهزيت راسي البنتين القاعدين قالو بنات ريان وحده اسمها علا والتانيه عفراء بعد شويتين بدو يضيفونا شاي بعدين عشا و خدم ماشين وخدم جايين واشكالهم كلهم اسيوين كنت ما طايقه الوضع ومستنيه متين نطلع اصلا اليوم كان متعب وعايزه ارقد بس في السرير وانوم ،بعد ساعتين واحد من الخدم جا همس في اضان المرا الاسمها ريان وبعدين مشا لي عمتي خديجه همس ليها برضو عمتي خديجه قامت وطلعت من الصاله وريان ساقت رهام معاها وطلعو بالسلم الجو ما كان مطمن وكنت بدعي بي قلبي الفي بالي ما يكون صح مرام وريناد عاينو لي باستغراب هزيت ليهم راسي وقلت ليهم ما فاهمه الحاصل زيي زيكم عمتي جات داخله تتكشم بي تحت تحت عرفت انو الفي بالي صح مرام قربت لي وقالت لي بي صوت واطي بتفكري في البفكر فيهو؟ سكت وانا سرحانه قطع سرحاني صوت طلق ناري جات ريان نازله وهي بتزغرد وعماتي بقو يزغردو وراها ويتبادلو التباريك عمتي سعاد جات حضنتني وهي بتبكي قالت لي في اضاني ان شاء الله تبقى ليكم امكم التانيه ما مرت ابوكم سكت وانا ماسكه دموعي بالعافيه بعد خلصت دوامة المباركات والبكا جات رهام نازله ولابسه توب تاني غير الكانت لابساهو قبيل جات وراها وحده لابسه لبس الخدم وجاره شنطه وراها اتمغصت مغصه وبقيت بس عايزه اجري واطلع من البيت دا ، يعني كانو عارفين انو حيكون عقد طوالي لمن مجهزه شنطتها كنت شايفه طشاش طشاش ولو قعدنا اكتر من نص ساعه ما عارفه كان الحيحصل لي شنو بعد سلمت علينا طلعت مع ابوي ونحن طلعنا وراهم الطريق كلو عماتي واخواتي بتكلمو وانا ساكته وبعاين بالشباك بس عمتي خديجه كانت راكبه قدام مع عمي ابراهيم قبلت ورا وقالت يا يمه شكلهم ناس عز اول مره اجي البيت دا انا انتي جيتي يا سعاد قبل كدا؟ عمتي سعاد قالت ليها اي جيت مره واحده السنه الفاتت ريناد ضحكت وقالت المرا دي حتعيش في وضع زي وضعنا كيف؟ مرام قالت ليها وضعنا مالو قالت ليها الحمدلله مافيهو شي لكن مقارنة بي وضعهم نحن مساكين ساي ولا فقراء زاتو عمي ابراهيم ضحك وقال ليها الله يبارك ليهم فيهو ويرزقنا ردو كلهم امين عمتي خديجه عاينت بالمرايه وقالت مشششم اها دي مالا صاره وما مديانا وش سكت وما رديت عليها لأنو لو رديت ما كان حيحصل خير وصلنا البيت بقدرة قادر واول ما دخلنا مشيت الغرفه و قفلت الباب بقوة جريت الطرحه ودموعي جات جاريه قعدت في الارض جمب السرير وبقيت ببكي بدون صوت وجسمي برجف بقيت في الوضع دا لمدة عشره دقايق بعدين هديت شويه سمعت باب الغرفه بخبط ومرام وعمتي سعاد بنادو فيني ثبت في السرير وقمت بس حسيت الدنيا كلها لافه حوليني
