انكسار

20

طلعت مع ريناد ادتهم المويه وبقينا قاعدين عاينت لي ابوي لقيتو بعاين للمرا وبنزل راسو وبكرر الحركه دي كتير وهي نهائي ما رفعت عينها منو ، ايهاب قال ليها حليمه اخبارك شنو ان شاء الله بس ما يكون مضايقنكم، قالت ليهو لا الحمدلله ماف اي عوجه، عاينت لي ابوي وختت يدها في كتف جويريه قالت ليهو جبت ليك بتك يا محمد، بتك الابيت تشوفها قبل ٢٦ سنه.. عيونا كلنا اتوجهت على ابوي ،كان متوتر شديد مسح العرق النازل من وشو بي طرف الجلابيه حصلت لحظه صمت طويله قطعها صوت ايهاب : احححمم حجه حليمه تعالي معاي دقايق نتفاهم، وهي بترفع اكتافها قالت ليهو نتفاهم في شنو انا جيت اتكلم مع محمد لكن شايفاهو ساكت ساي الكلام ما عجبك ولا شنو، قلت لي ريناد ومرام ادخلو جوا، دخلو وايهاب استأذن وطلع، عاينت لي ابوي بقيت مستنياهو يقول حاجه ما رد رهام قالت ليهو محمد ؟ فهمنا دا شنو الكلام البتقول فيهو المرا دا صح؟ ابوي قال ليها دايره شنو يا حليمه الجابك شنو بعد السنين دي كلها، قالت ليهو جايه اوريك بتك اول شي،تاني شي نحن ما عندنا بيت نقعد فيهو واظن من واجبك تآوي بتك والمرا الفي يوم من الايام كانت زوجتك، قال ليها كيف يعني ما عندك بيت؟ مش كنتي متزوجه ووضعكم كويس وبعد دا برضو كنت برسل ليك المصاريف ، قالت ليهو مصاريفك وقفتها من الحادث الحصل ليك ياهم القرشين الكنت بترسلهم ديك مسميهم مصاريف؟ .. دموعها بدت تنزل وصوتها اتغير قالت زمام وقت الابيت تشوف جويريه وترجعني سكت ولميت خشمي علي رجعت بيتنا وانا ببكي دم وانضربت واتزليت عشان مشيت وخليت البيت لحدي ما عرسو لي وجدي تاني سؤال ساي ما سألت مني الا بعد كم سنتين، يومتها فرحت وقلت يمكن داير تشوف بتك لكن ولا جات في بالك كل القلتو لي رسلي لي عنوانك وبقيت ترسل القروش، ابوي قال ليها حليمه لا اله الا الله انا كلامي دا واضح انتي هسي جايه دايره شنو عايشه حياتك ومرتاحه مع راجلك وبتك البخليك تحفري وتكنتي الماضي في شنو، قالت ليهو انا زاتي راجلي اتوفى ليهو زمن واولاد اعمامو شالو قروشنا كلها اسأل بتك اهندي راجلها كان ماسك القضيه بتاعتنا كتر خيرو ما قصر كسب القضيه والورثه بقت من حقنا لكن ديل ناس كعبين وخطرين شديد جونا في البيت بالسلاح وهددونا خلونا نوقع اوراق نقل الملكيه بتاعت الاراضي كلها باساميهم حتى القروش الفي البيت كلها شالوها وتاني يوم جا دفار نقل العفش كلو خلو لينا البيت دا خلا بس وقالو لينا ما نجي نلقاكم لسه قاعدين، هسي نحن بيت ساي نقعد فيهو ما عندنا دايرنا نتشرد في الشوراع؟ قال ليها ما فاهم هسي المطلوب مني شنو دايره تجي تقعدي معانا في البيت؟ قالت ليهو لو ما بتقدر اجر لي، رهام قالت اجييي يأجر شنو كمان يا مرا نحن زاتنا وضعنا ما ياهو ، ابوي سكت تاني ما اتكلم بعد مسافه قلت ليها امشي اقعدو في الصالون، كلهم بقو بعاينو لي، رهام قالت لي جمان دا كلام شنو ، قلت لي ابوي حتخلي بتك تنوم في الشوارع دي لو انا ولا وحده من اخواتي كنت حترضى؟ قال لي جمان انتي ما تدخلي ادخلي انتي زاتك جوا، قلت ليهو ادخل ليه ؟ الحصل كلو عرفتو كلامي ما عاجبك يا ابوي حتخليهم يطلعو يعني، قال لي اي يطلعو ،عاين لي حليمه وقال انا عارف حركاتك دي ما عندك اهل يعني هنا تمشي ليهم ؟ انتي لو ما في راسك في فهم ما بتجي لحدي هنا وتعملي العملتيهو دا، قامت على حيلها وقالت ليهو الله يسامحك يا محمد الله يقطع رجلي الجيت بيها لحدي عندك وطلبت منك حقي وحق بتي لكن ما عافيه ليك الله بياخد حقي منك، قمت وراها قلت ليها اقيفي ما تطلعي اي مكان انا حالبس واسوقك معاي بيتي، رهام قالت لي جمان انتي جاده دا شنو البتسوي فيهو دا المرا دي بتعرفيها من وين لمن تدخليها بيتك ، ابوي قال لي ما حيمشوا معاك تطله من هنا ولي اهلها، قلت ليهو انا الما برضاهو لي نفسي واخواتي ما برضاهو للناس ما حاخلي وحده قدر امي وشابه قدري يتشرشحوا في الشوارع انت لو ما عايز تخليهم هنا انا بسوقهم معاي، دخلت جوا لبست عبايتي ومرام وريناد يسألو فيني الحاصل شنو، طلعت بدون ما ارد عليهم لقيت ابوي هايج فيها قال ليها اسمعيني هنا يا حليمه انا لحدي هسي ماسك نفسي وما عملت شي لأنك في بيتي لكن الموضوع يصل بناتي هنا انا ما حاسكت ليك دايره مني شنو انتي ما تعملي لي فيها مظلومه وخليتك وكلام فاضي زي دا انتي عارفه كويس انا خليتك ليه اطلعي من البيت دا هسي وما داير اشوف خلقتك دي تاني...جيت قلت ليهم ارح ، ابوي قال لي جمان خلي ركوب الراس بتاعك دا، قلت ليهو بجي بكرا نتكلم في الموضوع دا .. مشينا لحدي الباب ابوي جا ورانا قال لينا خلاص خشو ، وقفنا عاينا ليهو، قال لي حليمه خشي الصالون.. دخلو هي وجويريه ونحن رجعنا الحوش ،قلت لي ابوي امي كانت عارفه انك كنت معرس قبلها؟ قال لي اي كانت عارفه وجويريه زاتا كانت عارفه بيها، قلت ليهو ونحن ليه ما عارفين، قال لي ما كان في داعي تعرفو اصلا انا وحليمه زواجنا كان عرفي واتطلقنا بعد العرس ب٣ شهور حتى اهلي ما عارفين لحدي يوم الليله لكن انتي عارفه مكانة امك عندي عشان كدا حاجه زي دي ما كنت حاقدر ادسها منها، قلت ليهو وخليتها ليه؟ خليك منها طيب بتك دي ليه ما سألت منها حتى في وشها ما عاينت ليها ، قال لي جمان القصه دي قديمه ومشت عليها قريب ال٣٠ سنه مافي داعي للكلام دا كلو هسي هدا سمعنا كلامك وخليناهم هنا لي بكرا نشوف البحصل شنو انا قايم اصلي المغرب العشا زاتو قرب.. بعد ابوي قام رهام جات قعدت جمبي قالت لي هسي نعمل شنو نحن ما ضامنين الناس ديل نيتهم شنو نقعدهم في البيت كدا ساي؟ قلت ليها نحن من متين كنا كدا حنخلي مرا وبتها يطلعو في وقت زي دا وهم ما عارفين محا يمشو وين؟ قالت لي ما كدا لكن برضو ما بنعرف اصلهم وفصلهم شنو الليله اي زول يجي بيتك انت بتدخلوا ساي كدا؟ قلت ليها في حاله زي دي بدخلو بعدين دي بتو فاهمه يعني شنو؟ يعني عندها حق في البيت دا زيي وزي اخواتي ،قالت لي غايتو ما عارفه لكن قلبي ما مطمن للناس ديل الله يستر بس.. سكت وقمت صليت المغرب، لحدي ما رقدنا الجو كان مكهرب في البيت حليمه جات شالت جك مويه وابو ياكلو قالو متغدين ،رقدت في العريشه وانا بتقلب في السرير يعني اخر شي في الدنيا دي كنت بتوقعو الحصل الليله دا؟ دي ما حاجه هينه عشان ابوي يدسها مننا نحن ما شفع عشان ما يكلمنا والمحيرني اكتر تصرفو بعد كلامهم دا؟ يعني المرا دي كعبه للدرجه دي عشان ابوي يطلعها من البيت ويقول ليها امشي بيت اهلك،طيب لو فهم ابوي صح عايزه مننا شنو ما اظن عندها مصلحه مننا... كل صدمه بقت تجي علي ورا التانيه وكل مره بتصدم اكتر من المره الاولى ما قادره اصدق ولا عقلي قادر يستوعب الشفتو دا حاسه اني في حلم وما قادره اصحى منو.. قطعت سرحتي ريناد قالت لي تلفونك دا من قبيل بضرب ما داير يخلينا ننوم، جدعتو لي في السرير ومشت لقيت مكالمتين من ايهاب اتصل تاني في نفس الوقت رديت ب نعم، قال لي نمتي ولا شنو، قلت ليهو لا صاحيه، قال لي تلفونك صامت؟ قلت ليهو كان جوا ، قال لي اتعشيتي واخدتي ادويتك، قلت ليهو اي، قال لي جماان ، قلت ليهو نسيت ياخ بقوم باخدها هسي، قال لي ما تاخديها لو ما اكلتي ، قلت ليهو قبيل مشيت ليه؟ سكت ساي قلت ليهو ليه مشيت يا ايهاب ،قال لي وجودي مت كان مناسب في اللحظه ديك، قلت ليهو ليه يعني، قال لي ما واضح ليه؟ قلت ليهو ايهاب انت ما خاتي نفسك فرد من العيله دي؟ وجودك اللحظه ديك كان اهم من اي لحظه تانيه وجودك جنبي كان حيخفف علي شويه، قال لي اعفي لي لو كنت عارف كدا صدقيني ما كنت اتحركت من مكاني ابداً وهسي كمان انا جنبك لو عايزه تحكي لي حاسمعك ان شاء الله للصباح، حكيت ليهو الحصل كلو كان بسمع وهو ساكت بدون ما يعلق بعد انتهيت قال لي عارفه حاجه ؟ قلت ليهو شنو، قال لي انا متزوج مرا بي مية راجل.. سكت بعد مسافه قال لي ما عارف يا جمان لكن انتي عارفه ابوك كويس لو ما خاتي في بالو حاجه ما كان اتصرف معاهم كدا يعني عم محمد ما من النوع الزي قصدي ما يتحمل مسؤولية أخطاءو الزمان او يتهرب منها اكيد في سبب قوي خلاهو يقول كلامو دا ، قلت ليهو ما عارفه ياخ يا ايهاب راسي مشوش وفي الف سؤال في عقلي، قال لي اتفاهمو برواق بكرا وأساليهو من اي حاجه عايزه تعرفيها هسي قومي اكلي واخدي ادويتك.... ما قدرت انوم كويس بالليل بسبب التفكير ،تاني يوم قمت متأخر بعد صليت مشيت العريشه لقيت رهام واخواتي قاعدين متمحنين قلت ليهم في شنو مالكم صانين كدا، ريناد قالت لي ابوي قال حيقسم البيت ، قلت ليها شنو ؟ رهام قالت لي داير يقسم الصالون والحوش والحمام البهناك لي حليمه وبتها، قلت ليها هو قال كدا؟ قالت لي اي امس لحدي ما نام ما قال حاجه مشا الصباح بهناك عليهم ولمن جا قال كلامو دا انا والله بقيت بخاف منهم عديل البشوف محمد امس ما يشوفوا هسي ، قلت ليهم وينو هسي طلع الشغل ؟ ريناد قالت لي يا بت الليله السبت شغل شنو مشا يكلم العمال يبدو يشتغلوا من هسي.. استغربت من تصرف ابوي يعني في يوم وليله غير رائو بالطريقه دي؟.... عدا كم يوم العمال كانو شغالين حليمه وجويريه قالو بتصرفو في اليومين ديل يشوفو حته يقعدوا فيها ابوي قال لي عشان تعرفي استهبالهم دا عندهم المكان اليقعدوا فيهو، صراحه ما قدرت افهم ابوي يعني مره بحس بيهو عايزهم يقعدوا هنا ومره عكس ،يوم خلصو مشينا نشوف لقينا الصالون قسموهو غرفه وصاله صغيره اصلا كان كبير وبي ورا عملو مطبخ صغير كدا، العصر كدا جو راجعين كالعاده نحن في الحوش سلمو علينا ودخلو طوالي طبعاً حليمه بتسلم علي كويس وعلى اخواتي برضو وجات مره قعدت معانا شويه لكن بتطيق رهام ورهام نفس الشي ، ابوي يومتها جا متأخر اول شي دخل ليهم كان شايل اكياس كتيره ،بعد ختينا الغدا قال لي ريناد امشي نادي ناس حليمه جو اتغدو معانا بعد الغدا عملنا الشاي وقعدنا كلنا ابوي اتنحنح وقال البيت دا بقى بيتين واي جزء مفصول براهو ما داير جوطه وشكل وكلام فاضي اي زول يلتزم حدودو ويتصرف مع الباقين بادب كأنو من ناس البيت وانتي يا حليمه لو سمعت صوتك عِلى ساي عارفه كويس انا حاتصرف معاك كيف، ريناد انتي بالزات لمي لسانك عليك حليمه دي زي خالتك رهام وجويريه دي اختك فصاحه وطولة لسان انا ما داير .. كلامي دا مفهوم؟ كلنا هزينا راسنا قال لينا يلا تصبحو على خير .. بعد مشو رهام قالت لي نحن ياداب قادرين نكفي روحنا ابوك حيقدر يمسك بيتين كيف، ريناد قالت ليها خليك من دا ناس الحله ديل حنقول ليهم شنو ،رهام قالت ابوكم قال لي لو زول سأل قولي ليهو دي بت خالتي ظروفهم صعبه ومحمد اتكفل بيهم،كلم حليمه زاتها تقول كدا، قلت ليهم هسي حيطلعوا مية قصه يألفوها من راسهم ما حيقتنعوا بكلامنا .. بنتونس كدا جات جويريه دقت باب العريشه قلنا ليها خشي قعدت معانا بقت ساكته ونحن مواصلين في الونسه ومرات نسألها تجاوب وتسكت بس، بعد مسافه مرام مشت تنوم وريناد قعدت في التلفزيون ورهام دخلت غرفتها ، بقينا لاا وهي برانا قالت لي انا من قبيل جيت عشان اتكلم معاك، قلت ليها قولي، قالت لي اول شي عايزه اعتذر ليك على التصرف العملتو معاك، قلت ليها تصرف شنو، قالت لي بتكلم عن حسام، قلت ليها ما فهمتك، قالت لي نحن جيران ناس حسام من اتولدت يعني من قمت لقيتو في وشي لمن كنت صغيره كان بشرح لي وبفسحني وبجي بيتنا طوالي لحدي ما كبرت بقى ما زي الاول يعني في مسافه بيناتنا لكن انا كنت بريدو شديد ما كنت شايفه غيرو، لمن امو مرضت ورقدت بقيت بجي بيتهم اقعد معاها لحدي ما يرجع من الجامعه، كان بحكي لامو عنك لمن حكت حسيت انو بدا يميل ليك بالزات لمن جيتي معاهو البيت كدا اتأكدت انو في حاجه بيناتكم، قلت لي امو في عريس جايني واهلي حيوافقو ،هي كانت بتريدني ودايرانا لي بعض من زمان لمن قلت ليها كدا كلمت حسام في البدايه ما قال حاجه لكن امو اصرت عليهو وهو كان ما برفض لي امو طلب عشان كدا وافق واتزوجنا، قلت ليها اي شي بحصل في حياتنا لي خير بعلمه ربنا وحدو ونحن بنعرفو في يوم من الايام، وانا بحمد ربنا كل يوم انو زح حسام من طريقي عشان اقدر اشوف الناس البتستاهل وجودي في حياتها والبستاهلو وجودهم في حياتي يمكن لو ما عملتي كدا كنت هسي حاكون مع حسام لكن ما حاكون مبسوطه، عسى ان تكرهوا شيئاً وهو خير لكم وعسى ان اتحبوا شيئاً وهو شر لكم.. وانا ابدا ما ندمانه على تجربتي العشتها مع حسام لأنها ورتني حاجات كتيره وخلتني اعرف اخت حدود لي اي زول في حياتي وما اتعشم في الناس ساي، قالت لي صح كلامك والله فعلا كل شي بحصل لي خير حتى انا ما ندمانه على زواجي من حسام لأني قدرت اعرف انو حتى لو حبينا حاجات واخدناها بالقوه ما حنستمتع بيها لأنو الحب بالزات ما بنقدر نجبر زول عليهو ايوه صح اتكسرت شديد بعد انفصلنا لكن مؤمنه انو ربنا حيقدر يجبرني، قلت ليها لو اتكلمنا عن الانكسار حتلقيني ماف حته فيني سليمه لكن زي ما قلتي ربنا ما بنسى عبادو ، قالت اي عارفه انو ما صح اقول ليك كدا لكن حسام كان مرات بهضرب بيك بالليل عديل كذب على نفسو وعليك لمن كان بقول انك زي اختو ،انا ما شفتو منو حاحه كعبه قبل يتزوجني وبعد اتزوجني كمان وما بقدر الومو على حبو ليك لأنو ما بيدو لمن طلقني قال لي اعفي لي يا جويريه لكن كل ما اشوفك بتذكرها وما حاقدر اظلمك معاي اكتر من كدا، قلت ليها ربنا يعوضك ويعوضوا بالاحسن، قالت لي اميين يارب، يلا انا حامشي بهناك الوقت اتأخر شكراً ليك كمان لأنك سمعتي مني، قلت ليها العفو... ما عارفه ليه ارتحت بعد اتكلمت معاها يمكن لأنو فتحت لي قلبها او قدرت تخفي الغموض الفيها من يوم جات ، الفتره البعديها عدت عادي جويريه كانت مره مره بتجي تتونس حليمه لو جات بتقضيها قطيعه وتمشي، ايهاب يوم اتصل لي قال لي ما ناويه ترجعي بعد دا قلت ليهو لالا قال لي شكلو ناس بيتكم مدلعنك بهناك المهم المساء جاي اسوقك مشوار خليك جاهزه، قلت ليهو وين؟ قال لي مفاجأه، قلت ليهو نوع الطلعه شنو طيب حفله ولا طلعه خفيفه عشان اعرف حالبس شنو، قال لي البسي احلى حاجه عندك مع انك اصلا لو لبستي شوال خيش حتطلعي قمره،قلت ليهو شوال خيش؟ الله عالرومانسيه .. فعلاً بعد المغرب جا، رسلت ريناد بيتي عشان تحي لي حاجاتي لبست فستان اسود واكسسوار بالفضي طرحه رماديه وشبط عالي رمادي شنطه صغيره سوداء وعملت ميكب خفيه، لمن طلعت صفر وقال لي قلت ليك البسي حاجه سمحه لكن ما تبقي سمحه للدرجه دي كمان، قلت ليهو ملاحظ انك بقيت جنك كسير تلج ولا لا ؟ قال لي لا ، قلت ليهو ماشين وين، فتح لي الباب وقال لي اتفضلي وما تسأليني من شي لحدي ما نصل، في الطريق كنا بنتونس قال لي اها كيف مع الوضع الجديد قدرتو تتأقلمو؟ قلت ليهو يعني بنحاول نتأقلم، قال لي هو الموضوع صعب وحصل فجأه وبسرعه لكن حتتعودوا مع الزمن، قلت ليهو ان شاء الله، لسه ما قربنا؟ قال لي شويه كدا.. بعد ربع ساعه وقف قال لي يلا نزلنا جمب محلات ايسكريم وحلويات كتيرة جمب بعض مشينا برجولنا ووقفنا بعد محلين كدا كان محل ظاهر عليهو جديد وما فيهو لافته في الباب كانت معلقه ورقه مكتوب عليها close دخل قدامي ومسك الباب قال لي تعالي دخلت وانا ما فاهمه شي ولع الانوار وبقيت بعاين كان محل كبير كدا زي محل حلويات الطاولات كانت على طول الحيطان وفي باب صغير في ركن كدا مسكني من يدي ودخلنا بالباب الصغير نزلنا بالسلم لحدي ما وصلنا تحت لغرفه كبييره كانت مطبخ فيهو دولاب فيهو صلفتين واجهزه مطبخ ومصطبه كبيره وقوالب وحاجات بالشكل دا ، من دخلت ما اتكلمت بس كنت بعاين يمين شمال فوق تحت قلت ليهو ايهاب دا شنو؟ ساقني تاني لي فوق وقف وراي وحضني قال لي ما عارف اذا التصميم عجبك ولا لا استشرت كم مصمم حتى عملتو بالشكل دا ما كنت عايز اوريك ليهو وهو فاضي، المهم ممكن تغيريهو لو ما عجبك، قبلت عليهو وقلت ليهو ما فاهمه شي انا، قال لي اللافته حتصل بكرا عايزه تسمي محلك شنو؟؟ ياداب قدرت استوعب دموعي جات نازله وما قدرت انطق بحرف مسحها لي بطرف سبابتو بعدين باسني في راسي وحضني قال لي دي اقل حاجه ممكن اقدمها ليك .. قلت ليهو انا ما مصدقه ما قادره اصدق والله، فكاني وقال لي صدقي يا نور عيوني ها ما قلتي لي التصميم عجبك ولا عايزه نغيرو ليك؟ قلت ليهو كدي خليني استوعب اول شي بعدين افكر، قال لي طيب عندك وقت خمسه دقايق لحدي ما تستوعبي والا حاسحب منك صلاحية التغيير، قلت ليهو انت بس قول عاجبك التصميم وما عايزني اغيرو، قال لي لو ما عجبني ما كنت وافقت بيهو لكن المهم رايك انتي ،قلت ليهو متين عملت دا كلو وما خليتني احس بي شي ولا حتى اشك،قال لي ما كنت بتكلم جمبك حتى لمن زول من الشغالين يتصل لي وانا فب البيت ما كنت برد الا اطلع برا، قلت ليهو انا ما عارفه اقول ليك شنو بالجد كدا، قال لي فرحتك دي بتغنيني عن اي رد كفايه اشوف عيونك بقدر اقرا اي رد فيهم، قلت ليهو وريني طيب عيوني بتقول شنو، ضحك وقال لي انتي كمان ما تدققي ولا شاكه اني ما بفهم لغة العيون، قلت ليهو ابدا ابدا، قال لي ناويه تعملي شنو وتبدي متين، قلت ليهو هسي حالاً من الحماس قايمه اعمل اي شي براي، قال لي يلا طيب نعمل شنو؟ قلت ليهو جادي؟ قام وهو بكفكف قميصو قال لي جادي اي ، قلت ليهو حنعمل حلا مغربي لينا نفتتح بيهو المكان لو لقيت الحاجات ماف حتمشي تفتشتهم لي بالليل دا، قال لي جبت كم حاجه غايتو نشوف لو في شي ناقص حاقوم افتش يعني اعمل شنو امري لله.. قمنا دخلنا المطبخ لحسن الحظ لقينا كل الحاجات في عملت الحلا وايهاب كان بناولني الحاجات لمن خلصنا قلت ليهو محتاج يدخل الفريزر ساعه بعدين يتاكل ،قال لي خلاص نمشي نتعشى لحدي ما يبرد، قلت ليهو لو اتعشينا ما حنقدر ناكلو قال لي انا عن نفسي باكل انتي ممكن تستنيني هنا خلاص، قلت ليهو هاهاها ظريف يلا، طلعنا كان في مطعم قريب طلب لينا سندوتشات شاورما وقعدنا ناكل قال لي ممكن اقول ليك حاجه؟ قلت ليهو احكي، اتنحنح وقال لي انا ما عايزك تشتغلي في المحل يعني وظفي ناس وديري المحل انتي لكن حالياً ما تنزلي تشتغلي فيهو، رفعت حاجبي باستغراب، قال لي على الاقل الفتره دي لحدي ما تولدي، قلت ليهو شغلة المحل ما صعبه بعدين المسافه ما بعيده شديد ، قال لي جمان لو سمحتي، سكت بعد مسافه قال لي انا كنت عايز اوريك المكان بعد الولاده لكن ما قدرت استنى كنت عايز اخليك تفرحي شويه في عز الظروف الانتي فيها دي وفي نفس الوقت ما عايزك ترهقي نفسك انتي سمعتي كلام الدكتور وعارفه انو الفتره دي صعبه وما عايزه تعب واجهاد لو عايزه كمان ما تفتحيهو هسي استني سنه على الاقل بعدين افتحيه وانزلي بنفسك، قلت ليهو ما بقدر استنى دا كلو بعد شفت المكان، قال لي طيب الحل شنو ؟ شوفي انا ما حاجبرك على حاجه بس عايزك تفكري في الموضوع كويس تمام ؟ اتنهدت وقلت ليهو طيب قال لي يلا طيب، رجعنا المحل اكلنا الحلا بعدين طلعنا قال لي حترجعي معاي البيت صح؟ قلت ليهو لا راجعه بيتنا، مسك يدي وقال لي انا عايزك ترجعي معاي، قلت ليهو حاجاتي هناك ، قال لي الحاجات هينه بجيبها ليك بكرا ،قلت ليهو لا وديني بيتنا، قال لي حاضر.. لمن وصلنا دخل العربيه في بيتهم قلت ليهو هي قلت ليك وصلني بيتنا ،قال لي هدا بيتنا يلا انزلي ، بعد نزلنا قلت ليهو ليهو انا جاده معاك ناس البيت حيكونوا منتظرني، قال لي انا كلمتهم انك ما راجعه بعدين حتى لو ما عارفين انتي كنت وين ما مع راجلك،قلت ليهو وديني بيتنا بس،قال لي انتي شكلك عايزاني اعمل ليك حركة سعيد مع سوزان.. فكيت الضحكه وهو زاتو ضحك معاي ضربتو في كتفو وقلت ليهو والله انت.. دخلنا شقتنا استحميت وغيرت ملابسي بعدين كعكت شعري لمن قمت جا داخل من برا جا وقف قصادي وبقى بفكهم لي قلت ليهو يا ايهاب ياخ الحركه دي بتزهجني والله، قال لي عشان كدا انا بحب اعملها ،قلت ليهو حتسرحوا لي انت بكرا ، مسكني من حنكي بي طرف يدو وباسني في خدي رجع لي شعري لي ورا وقال لي من عيوني الاتنين...... صحيت تاني يوم لقيت ايهاب مافي جمبي قمت لميت شعري ودخلت استحميت وصليت طلعت لقيتو مجهز اكل في السفره وبكب في عصير منقه جيت قلت ليهو صباح الخير، ضماني بعدين بقى بمشي ايهامو على حواجبي قال لي صباح النور يا كل النور، قلت ليهو ايهاب؟؟؟ انا بقيت بخاف مالك بقيت كدا؟ قال لي كدا كيف، قلت ليهو يعني رومانسي شديد ،قال لي في الفترة الكنتي بعيده فيها دي كنت بفكر لقيت اني مقصر شديد في حقك، قلت ليهو كويس انك عرفت، قال لي والله؟ بدل ما تقولي لي حاشا وكلا ،ضحكت وقلت ليهو ما كنت مقصر لكن خليك كدا دائماً ، قال لي نشوف كدي لقدام، قلت ليهو عارفاك انا بكرا ترجع لشخصيتك القديمه، مشا قعد وقال لي انتي محبطه بشكل ما طبيعي تعالي تعالي خلينا ناكل اصلا الرومانسيه دي ما شبهنا، قعدت في الكرسي القصادو وشلت المعلقه اشرت بيها عليهو قلت ليهو قصدك الرومانسيه دي ما شبهك لأني من يومي رومانسيه.... اليوم دا كلو قضاهو معاي ما طلع الشغل ،ما خلينا حاجه ما عملناها لعبنا وحضرنا فيلم لي سكسك دي لعبناها ضحكنا فيها ضحك كل ما يقبضنا كان بكلكني🤣 حتى الاكل عملو معاي المغرب عملنا شاي لبن وزلابيه وقعدنا في البلكونه شربنا الشاي ونحن بنتونس بعدين دخلت اغسل العده جا قال لي انا طالع بجي هسي،قلت ليهو ماشي وين،طلع علبة السيجاره وهزاها.. من بعد الحمل بقى لو عايز يسجر بطلع برا ، قلت ليهو دي شنو الخيانه دي من الصباح اي شي بنعملو سوا هسي عايز تعمل حركات، قال لي عايزه تجربي؟ قلت ليهو اي، قال لي تعالي ،مشيت وقفت جمبو وبقيت مستنياهو شالني ومشى لحدي البلكونه قلت ليهو دا شنو واديني وين وقف وقال لي ارميك من هنا؟ ضحكت وقلت ليهو اي، قال لي يلا ١،٢،٣ هوووبا .. رفعني فوق ونزلني في الارض بقيت بضحك قلت ليهو الليله انت ما طبيعي خالص ، قال لي يلا ما بتأخر ... طلع وانا قعدت احضر واقلب في التلفون كنت بتكلم مع ريا قلت ليها رجعت بيتي قالت لي اخيرا ناس بيتكم حيكونوا ارتاحوا منك ،قلت ليها هي وهي قبيل اتصلو قالو لي تعالي راجعه البيت ما بتقعد بدونك، رسلت لي ايموشنات ضحك وقالت لي اي اضحكي على روحك كويس ،جاني اشعار رسالة من قروب غريب لمن دخلت لقيت في صور مرسله ما فتحت معاي طوالي بقيت بقرا الرسايل.. اححا من الجسم احححا من الشعر... الرقم يخوانا ما ترسلو صور ساي وتشحتفونا .. الرقم دخلتو ليكم يا شباب روقو .. الرسايل كانت كلها بتجي ورا بعض ومقرفه شديد غادرت طوالي افتكرت زول مدخلني بالغلط لمن جيت احذف الرسايل ظهرت لي الصور لقيتها صورتي!!! كنت واقفه في مطبخ ناس الحجه قدام المغسله ولابسه قميص قصير تحت الركبه والصور كلها مصوره من ورا ،التلفون وقع يدي من الخلعه وبقيت برجف ،فجأة سمعت صوت الباب بفتح ايهاب جا داخل بي سرعه مسكني من ذراعي وختا التلفون قدام وشي قال لي دا شنو دا؟؟

يتبع....