دخلت لقيتهم كلهم في الصاله حتى حبوبة ريان فرحت لأنها من طلعت من المستشفى ما قعدت في الصاله سلمت وقعدت كانو ساكتين علا بهمس قالت لي قومي بوسي يد امي.. قمت سريع مسكت يدها ودنقرت كدا جرت يدها مني استغربت ورفعت راسي عاينت ليها قالت لي قعدتي في البيت دا وعملتي لي نفسك مكان فيهو ونحن اضطرينا نستحملك الفترة دي عشان ظافر ولدي، في الدقيقه دي تلمي حاجاتك وترجعي من الوساخه الجيتي منها.... ما كنت مستوعبه كلامها حسيت راسي لف عديل عاينت للباقين هبه جات جاريه علي امها قامت مسكتها قبل تصلني وقالت ليها اوعك تلمسي ناس زي ديل.. شالتها ورجعت قعدت ، عاينت لي علا طوالي قامت ومشت فوق.. عاينت لي ران قالت لي سوري ياسمين وقامت ورا علا .. حبوبه ريان قالت لي انتي ما سمعتي كلامي دا ولا عامله نفسك ما سامعاهو؟... عبير قالت ليها ما توجعي خشمك ساي يا امي.. بقت تنادي مارينا ماريناا .. مارينا جات جارة شنطه كبيرة ختتها ومشت عبير قالت لي اهو اتبرعنا ليك بشوية حاجات.. جرت شنطتي لحدي الباب وشالتها جدعتها برا
حسيت كأنو في كهرباء ضربتني عاينت لي حبوبة ريان وقلت ليها ليه؟ عمل ليكم شنو انا؟.. قالت لي كان ناقص تعملي كفايه انك بت حر*ام ودا ما ملجأ ولا دار عشان نستقبلك فيهو، دموعي جات جارية عبير قالت لي انتي ما بتفهمي عربي؟ ولا اناديهم يجدعوك زي الشنطه دي... طلعت برا وانا ماشه بسرعه و بمسح دموعي بقيت ماشه في الشارع بدون اي وجهه ما كنت شايفه ولا سامعه شي غير كلامهم البتردد في اضاني فجأة في نور قوي جا في وشي، لمن انتبهت لقيت نفسي قاطعه الزلط الراجل قال لي يا بتنا ما تعايني قدامك دايرة تموتي انتي؟؟ قلت ليهو م.. معليش.. قطعت الزلط وانا جسمي برجف فجأة سمعت صوت زول بناديني قبلت لقيت امير جاي علي قال لي ماشه وين زي الوقت دا.. قلت ليهو انت كمان كانو جابرنك؟ خلاص ظافر سافر ماف داعي تلعب الدور ، قال لي انتي بتقولي في شنو دور شنو ولعب شنو... مسحت دموعي وقلت ليهو عايزه منك شي واحد، وصلني بيتنا انا عايزه امشي لي امي وابوي.. مسكني من ذراعي وقال لي ياسمين تعالي معاي خلينا نمشي البيت ونتفاهم براحه... جريت يدي وقلت ليهو انا ما برجع البيت داك ما برجع وما دايرة اتفاهم مع زول وديني بيتنا بس... قال لي طيب تمام حاوديك اهدي بس وروقي، تعالي معاي عشان نمشي بعربية إسلام.. قلت ليهو بحزم: لاا ... قال لي طيب نشوف ترحال.. لمن جا قال لي اقيفي دقيقه مشا اتكلم معاهو بعدين قبل علي وقال لي ارح
ركبنا و قبلت على الشباك كل ما دموعي تنزل بمسحها كنت حاسه بنظرات امير لي بالمرايه العربية وقفت في حته غريبة قلت ليهو دا شنو؟ قال لي انزلي.. قلت ليهو امير انت لو ما داير توديني كان تكلمني من البدايه انا براي كنت بشوف لي طريقة وامشي ... عاين للولد السايقنا بعدين قال لي ياسمين انزلي نتفاهم برا.. نزلت وقلت ليهو نحن وين وجينا هنا ليه؟ قال لي عايني حاوديك بس ما هسي الوقت اتأخر وناس البيت حـيقلقوا بيتي عند رشا وخلي الواطه تصبح وبوديك... قلت ليهو انا ما ببيت عند زول عايزه امشي بيتنا بس مسح وشو اتنهد بعدين عمل مكالمه ومشا مسافه لكن كنت سامعاهو " اي يا ايمن انت وين؟ كدي تعال عند رشا، تعال وبفهمك الحاصل، قريب؟ خلاص تمام".. قفل وجاني قال لي حنبيت في الشارع يعني؟ ياسمين الله يهديك ارح ادخلي... سكت ساي بعد ١٠ دقائق ايمن جا قال لينا الحاصل شنو؟ امير قال ليهو والله ما فاهم اي شي كدي اتصل لي رشا قول ليها ياسمين حتبيت معاك الليله عشان ما نخلعها.. قلت ليهو امير انا قلت ليك ما ببيت عند زول.. ايمن عاين لي مسافه وهو مكشر حواجبو ومستغرب بعدين طلع تلفونو ومشا من جمبنا امير قال لي ما حتوريني في شنو؟ ما رديت عليهو ايمن بعد جا قال لينا ارح خشو... عاينو لي الاتنين ايمن قال لي انتي عايزه شنو يعني؟ قلت ليهو ماشه بيتنا ، قال لي قبيل انا مش وصلتك؟ امير قال ليهو قصدها بيتها القديم .. ايمن قال لي في زول سألك من ناس عمتي؟ سكت ساي، امير قال لي قولي عليك الله يا ياسمين خوفتينا والله.. قلت ليهم حتودوني ولا لا.. ايمن قال لي اذا ما وريتينا الحاصل شنو ماف زول حيوديك، قلت ليهم تمام شكراً ليكم.. مشيت كم خطوة فجأة جا وقف قدامي وما احس نفسي الا واقعه على ظهرو وشايلني من رجولي .. دخل العمارة الكنا واقفين جمبها بعد استوعبت الحاصل بقيت بضرب فيهو وبكورك اقول ليهو نزلني انت حيوان ولا شنو نزلني قلت ليك.. امير قال ليهو ايمن دا شنو البتسوي فيهو دا نزلها .. قال ليهو اتصل لي روش خليها تفتح الباب... جو مرا وراجل نازلين بالسلم غطيت وشي بي يدي بالخجل... بعد مشو قلت ليهو نزلني ياخ خلاص بمشي براي نزلنيييي، ما رد علي لحدي ما وصلنا الشقه امير لزا الباب ودخلنا لمن نزلني ورشا كانت بتعاين لينا بطريقة غريبه اتمنيت الارض تتشق وتبلعني ما عرفت اقول شنو ولا اقبل على وين رشا قالت لينا اتفضلو... ماف زول فينا قعد كنت منزلة راسي وخجلانه شديد، تاني قالت لينا اتفضلو يا جماعه مالكم ؟ ايمن وامير قعدو وانا لسه واقفه مكاني ايمن قال لي اقعدي.. طوالي قعدت كنت خايفه يشيلني ويقعدني في الكرسي قعدت وانا شابكه يديني وبعاين تحت... الجو كان هادي الا من كركبة رشا الفي المطبخ جات بعد مسافه ختت جمبي تربيزة وصينيه فيها كبايه قالت انا جوا لو احتجتو لي حاجه البيت بيتكم.... بقيت بدعك يديني سمعت صوت امير قال لي احكي لينا الحصل، سكت ساي ايمن قال لي قولي... دموعي جات نازلة ما كنت عايزه احكي ليهم امير جا قعد جمبي ومدا لي كباية العصير قال لي اشربي، شربت منها وختيت الكبايه مسحت دموعي وصلحت الطرحه حكيت ليهم الحصل وعيني لسه في الارض بعد انتهيت امير قال ما قادر اصدق.. ايمن قام وقال لي قومي، رفعت راسي وقلت ليهو ما عايزه امشي انا.. قال لي قومي يا ياسمين .. امير قال ليهو ايمن، خليني اتكلم معاها.. وقف عاين لينا مسافه بعدين دخل الغرفه، امير قال لي ما عارف اقول ليك شنو خجلان منك شديد ما اتوقعت ابدا انو يبدر منهم تصرف زي دا وما بلومك على زعلك واصراراك في انك ترجعي بيتكم لكن يا ياسمين اذا مشيتي موقف ظافر قدام ناس بيتكم حيكون شنو، فكرتي فيها؟ صدقيني ظافر لو عرف حيجي راجع قبل يصل فرنسا، انا حاكلمو بعد يصل واخليهو يحل الموضوع دا مع ناس بيتهم... دايرك بس الفترة دي تقعدي مع رشا لحدي ما الموضوع دا يتحل ولو عايزه تمشي بيتكم انا حاوديك لكن... سكت لثواني بعدين واصل: ما تجيبي ليهم سيرة عن الحصل دا قولي ليهم انك جايه تقعدي معاهم فترة وترجعي، اتفقنا؟ قلت ليهو انا ما عايزه ارجع البيت داك قال لي طيب حاضر، بكرا شغاله جامعه ؟ قلت ليهو اي قال لي طيب بوديك المساء..
